Ntalu 16:1-50
16 I bosi, o Kora+ wa mwan’a Yisa,+ wa mwan’a Koate,+ wa mwan’a Levi,+ otelamene kumosi yo Datani yo Abirami, o wan’a Eliabe,+ yo One wa mwan’a Peleti, o wan’a Rubeni.+
2 Oyau kumosi ye 250 ma wan’amakala a Isaele, e mfumu za nkangu, ana basolwa vana vena e nkutakani, akwa tunda, batelamene Mose.
3 Balungalakene vamosi mu telamena+ Mose yo Arone, babavovese vo: “Oyeno mpe nusakisi! O nkangu awonso wavauka,+ yau awonso, o Yave una vana kati kwau.+ Ozevo, ekuma nufwete kuyitundikila vana vena e nkutakani a Yave?”
4 Vava Mose kawidi e mvovo miami, vana vau ofukamene yo bokeka lose.
5 I bosi, ovovese Kora ye awonso banyikama vo: Muna mene, Yave osonga nani ovuilu kwa yandi,+ nani i wavauka ye nani ofwete kumfinama,+ konso ndiona kesola+ i yandi okumfinama.
6 Owu nuvanga: Ongeye Kora ye awonso bekuyikamanga,+ nubonga yokelwa+ ya ndumbu,
7 o mbazi, nusia tiya ye ndumbu muna yokelwa ya ndumbu vana ndose a Yave, o muntu ona kesola o Yave,+ yandi i wavauka. Kadi, oyeno wan’a Levi+ nusakisi!”
8 I bosi, Mose ovovese Kora vo: “Dodokolo, nuwá, yeno wan’a Levi.
9 Nga nubenze vo diambu diakete wau vo Nzambi a Isaele wanuvambula vana vena nkangu a Isaele+ yo yambula vo nuamfinama kimana nuasala e salu kia saba kia Yave yo telama vana ntadisi a nkangu muna kubasadila e?+
10 O Nzambi ufinamese ova ndambu andi kumosi ye mpangi zaku zawonso, o wan’a Levi. Owau, nga nuzolele mpe tambula e kinganga e?+
11 Muna kuma kiaki, ongeye ye awonso bekuyikamanga, ana balungalakene vamosi, Yave nutelamene. Vo i Arone, oyandi i nani nuanyidimina?”+
12 Kuna kwalanda, Mose otumisi Datani yo Abirami,+ o wan’a Eliabe, kansi oyau bavutwidi vo: “Ke tukwiza ko!
13 Nga obenze vo diambu diakete wau watuvaikisa muna nsi ifwamfumukanga kimvumina yo wiki watuvondela mu makanga?+ Owau ozolele mpe kuyikitula se mfumu watudiatidila?
14 Muna vova e ludi, ongeye kututwese mu nsi ifwamfumukanga kimvumina yo wiki ko,+ kutuvene mpe ntoto ko ngatu mpatu za vinyu se vua. Nga ozolele vo wantu awaya balanda nze mpofo?* Ke tukwiza ko!”
15 Muna kuma kiaki, Mose ofungidi kikilu makasi yo vova kwa Yave vo: “Kutondi lukau lwau lwa mbwaza ko. Kibongele kana buluku diau dimosi ko ngatu vanga mbi kwa mosi muna yau.”+
16 I bosi, Mose ovovese Kora vo: “Ongeye ye awonso bayikamene nuyisunzula o mbazi vana ndose a Yave, ongeye yo wantu bayikamene yo Arone.
17 Konso muntu kabonga e yokelwa kiandi kia ndumbu yo sia mo e ndumbu, konso muntu kasunzula e yokelwa kiandi kia ndumbu vana ntadisi a Yave, 250 ma yokelwa ya ndumbu, kumosi yo ngeye yo Arone, konso muntu ye yokelwa kiandi kia ndumbu.”
18 Muna kuma kiaki, konso muntu muna yau obongele yokelwa kiandi kia ndumbu, batudidi mo tiya ye ndumbu, batelamene vana mwelo a saba kia wananina kumosi yo Mose yo Arone.
19 Vava Kora kalungalakese awana banyikamene+ mu telamena Mose yo Arone vana mwelo a saba kia wananina, o nkembo a Yave umonekene kwa nkangu awonso.+
20 I bosi, Yave ovovese Mose yo Arone vo:
21 “Nuyivambula ye buka kiaki, kimana yabafukisa nkumbu mosi.”+
22 Muna kuma kiadi, Mose yo Arone bavumbamene yo bokeka e ndose zau vana ntoto, bavovele vo: “E Nzambi, e Nzambi a mwand’a wantu awonso,*+ nga ofungila o nkangu awonso+ makasi mu kuma kia sumu dia muntu mosi?”
23 I bosi, Yave ovovese Mose vo:
24 “Zayisa o nkangu vo: ‘Nuvavuka e nzo za ngoto za Kora, Datani yo Abirami!’”+
25 I bosi, Mose otelamene, wele kwa Datani yo Abirami, akuluntu+ a Isaele bele yandi kumosi.
26 Ovovese nkangu vo: “Dodokolo, nuvavuka e nzo za ngoto za wantu awaya ambi, ke nuviakani konso lekwa kiau ko, kimana nualembi fwaswa mu kuma kia masumu mau mawonso.”
27 Vana vau bavavukidi e nzo za ngoto za Kora, Datani yo Abirami. O Datani yo Abirami bavaikidi muna nzo zau za ngoto yo telama vana mielo miau kumosi ye akento au, wan’au ye yingiana-ngiana yau.
28 I bosi, Mose ovovele vo: “Muna wau i nuzayila wo vo Yave untumini yavanga mambu mama mawonso, ke ditukidi mu ntim’ame ko:*
29 Avo wantu awaya bafwididi wauna wantu awonso befwilanga, avo batumbilu wauna utumbilwanga wantu awonso, ozevo Yave kantumini ko.+
30 Kansi, avo Yave ubavangidi diambu diansisi, o ntoto waziuka* yo kubamina, oyau ye lekwa yau yawonso bakulumuka bamoyo muna Ziami,* kieleka, nuzaya wo vo wantu awaya Yave bakondelo luzitu.”
31 Vava kamene vova mambu mama mawonso, vana vau o ntoto kunansi au ubasukini.+
32 O ntoto uziukidi,* ubaminini kumosi ye esi nzo zau ye awonso bavuilu kwa Kora+ ye lekwa yau yawonso.
33 Muna mpila yayi, oyau ye awonso bavuilu kwa yau bakulumukini bamoyo muna Ziami,* o ntoto ubafukidi, bavididi vana kati kwa nkutakani.+
34 Aneyisaele awonso ana bakedi vana ndambu au, vava bawidi e kazu kiau batinini, kadi bavovele vo: “Wonga tuna wau kadi o ntoto ulenda mpe kutumina!”
35 I bosi, tiya tutukidi kwa Yave+ tukulumukini yo zinisa e 250 ma wan’amakala batambikanga e ndumbu+
36 Yave ovovese Mose vo:
37 “Zayisa Elaza wa mwan’a Arone wa nganga kakatula e yokelwa ya ndumbu+ vana tiya, kadi yavauka. Unzayisa mpe vo kenda mwanga o tiya kwandá.
38 E yokelwa ya ndumbu ya wantu basumukini yo vidisa e mioyo miau,* ifwete kitulwa se tukandala twababama yo lamika to muna ziku,+ kadi vana ntadisi a Yave basunzuidi yo, ikitukidi se yavauka. Ifwete kala se sinsu kwa Aneyisaele.”+
39 Muna kuma kiaki, Elaza wa nganga obongele yokelwa ya ndumbu yansongo ina yasunzulwa kwa awana bayokwa, otutidi yo kimana yalamikwa muna ziku,
40 wauna Yave kankanikina muna Mose. E yokelwa yoyo yakala se luyindulu kwa Aneyisaele vo ke vena muntu ko ona kavewa nswa ko,* una vo ke mbongo a Arone ko ofinama vana ndose a Yave+ kayoka e ndumbu, ke vakadi muntu ko okituka nga Kora ye awana banyikama.+
41 Muna lumbu kialanda, o nkangu awonso wa Isaele uyantikidi yidimina Mose yo Arone,+ oku vo: “Yeno awole nuvondele o nkangu a Yave.”
42 Vava o nkangu ulungalakene vamosi mu telamena Mose yo Arone, batadidi kuna saba kia wananina, bamwene tuti difukidi e saba, o nkembo a Yave uyantikidi moneka.+
43 Mose yo Arone bele vana ntwal’a saba kia wananina,+
44 Yave ovovese Mose vo:
45 “Nukatuka ova kati kwa nkangu wau, kimana yabafukisa nkumbu mosi.”+ Muna kuma kiaki, bafukamene yo bokeka e ndose zau vana ntoto.+
46 I bosi, Mose ovovese Arone vo: “Bonga e yokelwa kia ndumbu, wasia mo tiya tutukidi vana ziku+ yo sia vo e ndumbu, wenda mu nzaki kuna kwina o nkangu yo lomba luyambulwilu lwa masumu+ mu kuma kiau, kadi o makasi ma Yave mafusukidi. E vuku kiyantikidi!”
47 Vana vau Arone obongele e yokelwa, wauna o Mose kavovele, ozawidi vana kati kwa nkutakani, tala, e vuku kiakiyantikila vana vena o nkangu. Muna kuma kiaki, Arone osidi e ndumbu vana yokelwa yo yantika lomba luyambulwilu lwa masumu mu kuma kia nkangu.
48 Otelamene vana kati kwa awana bafwidi ye awana bena o moyo, e vuku kifokokele.
49 O lutangu lwa awana bafwidi muna vuku, 14.700, lembi tanga awana bafwa mu kuma kia Kora.
50 Vava Arone kavutukidi kwa Mose vana mwelo a saba kia wananina, e vuku kiakifokokela.
Mvovo vana yand'a lukaya
^ Mvovo wa sina: “Nga ozolele tobola meso ma wantu awaya?”
^ Mvovo wa sina: “mianda mia nitu zawonso.”
^ Yovo “ke mu luzolo lwa mono kibeni ko.”
^ Mvovo wa sina: “waziula o nu’andi.”
^ Yovo “Seol,” i sia vo, ziami kia wantu awonso. Tala Nsas’a Mvovo.
^ Mvovo wa sina: “uziudi o nu’andi.”
^ Yovo “Seol,” i sia vo, ziami kia wantu awonso. Tala Nsas’a Mvovo.
^ Yovo “basumukini e mioyo miau.”
^ Mvovo wa sina: “ke vena nzenza ko.”
