Ntalu 22:1-41
22 I bosi, Aneyisaele bakatukidi, bele sikidisa e ndo muna makanga ma Moabe, mantalani ye Yeriko, kuna simu dia Yodani.+
2 O Balaki+ wa mwan’a Sipo omwene mawonso Isaele kavangidi kwa Aneyamore,
3 Moabe omwene kikilu wonga wa nkangu, kadi ndonga kikilu bakala; kieleka, Moabe otelamene moyo mu kuma kia Aneyisaele.+
4 Moabe ovovese akuluntu a Midiani vo:+ “Owau, e nkutakani yayi ivempola yawonso ituzungidi, wauna e ngombe ivempolwelanga e titi muna mfuta.”
Muna kolo kiakina, Balaki wa mwan’a Sipo yandi wakala ntinu a Moabe.
5 Otumini anati a nsangu benda bokela Bilami wa mwan’a Beo kuna Peto,+ eyi ina vana ndambu a Nzadi,* muna nsi andi akingutukila, oku vo: “Tala! Vezidi nkangu uvaikidi muna Engipito. Bafukidi e ndose a* ntoto,*+ mantalani bezingilanga yame.
6 Owau, dodokolo, wiza wansibila nkangu wau,+ kadi oyau bansundidi e ngolo. Nanga ndenda kubasunda yo kubayinga omu nsi, kadi ntomene wo zaya vo ndiona osambula, osambulwa; ndiona osiba, osibwa.”
7 Muna kuma kiaki, akuluntu a Moabe ye akuluntu a Midiani bele, banete mfutu mu kuma kia ngombo betesa, balweke kwa Bilami+ yo kunsamunuina e nsangu za Balaki.
8 Muna diadi, Bilami ubavovese vo: “Nuleka kwaku mu fuku wau, ikunusamunuina konso diambu dina Yave kekumpovesa.” Dianu vo, akuluntu a Moabe bakedi yo Bilami.
9 I bosi, Nzambi wizidi kwa Bilami yo yuvula vo:+ “O wantu bena yaku, aki nani?”
10 Bilami ovutwidi kwa Nzambi aludi vo: “Balaki wa mwan’a Sipo, wa ntinu a Moabe, untwikidi e nsangu, oku vo:
11 ‘Tala, o nkangu uvaikidi muna Engipito ufukidi e ndose a* ntoto.* Owau, wiza wansibila wantu awaya.+ Nanga ndenda kubanuanisa yo kubayinga.’”
12 Kansi, Nzambi ovovese Bilami vo: “Kwendi yau ko. Kusibi nkangu ko, kadi wasambulwa.”+
13 Bilami osikamene muna mene, ovovese akuluntu a Balaki vo: “Nuvutuka kuna nsi eno, kadi Yave kangiambwidi ko vo ngienda yeno.”
14 Muna kuma kiaki, akuluntu a Moabe balondokele, bavutukidi kwa Balaki yo vova vo: “Bilami kazolele kwiza yeto ko.”
15 Kansi, Balaki otumini diaka akuluntu ankaka ana balutidi e buka kiantete muna lutangu yo zitu.
16 Balweke kwa Bilami, bamvovese vo: “I wau wuwu kavovele Balaki wa mwan’a Sipo: ‘Dodokolo, kuyambula konso diambu ko diakakidila mu kwiza kwa mono,
17 kadi tundidika itoma kutundidika yo vanga konso diambu okumpovesa. Dodokolo diaku, wiza, wansibila nkangu wau.’”
18 Kansi, Bilami ovutwidi selo ya Balaki vo: “Kana nkutu vo Balaki umpene nzo andi yazala ye palata ye wolo, kilendi vanga konso diambu ko avo ke dina dikanikini Yave wa Nzambi ame ko, kiakala diakete yovo dianene.+
19 Kansi, dodokolo, nuleka mpe kwaku o fuku wau kimana yazaya dina Yave kekumpovesa diaka.”+
20 I bosi, Nzambi wizidi kwa Bilami muna fuku yo kumvovesa vo: “Avo wantu awaya ngeye bezidi bokela, wenda yau. Kansi, ofwete vova kaka mana ikuzayisa.”+
21 Muna kuma kiaki, Bilami otelamene muna mene, ovuikidi e buluku diandi* yo kwenda kumosi ye akuluntu a Moabe.+
22 Kansi, makasi ma Nzambi mafusukidi wau kele, e mbasi a Yave itelamene muna nzila muna kunsima. Bilami vana buluku diandi kayendelanga, ntaudi zandi zole bakedi yandi.
23 Vava e buluku dimwen’e mbasi a Yave itelamene muna nzila yo nsosolo vana koko kwandi, e buluku divavidi vengomoka yo kota kuna mfuta. Kansi, Bilami oyantikidi wanda e buluku kimana diavutuka muna nzila.
24 I bosi, e mbasi a Yave itelamene mu nzila yakete, vana kati kwa mpatu zole za vinyu ye yaka ya matadi muna ndambu zau zole.
25 Vava e buluku dimwene mbasi a Yave, diyantikidi kuyifietekesa muna yaka yo fietekesa mpe kulu kwa Bilami muna yaka, o Bilami oyantikidi diaka wanda e buluku.
26 E mbasi a Yave yele diaka kuna ntwala yo telama va fulu kiabatakana, vana ke vakala ye fulu kia vengomokena ko, kiakala ku lunene yovo ku lumonso.
27 Vava e buluku dimwene mbasi a Yave, dibubamene kuna nsi a Bilami, muna kuma kiaki, o Bilami ofungidi makasi yo wanda diaka o nkau andi muna buluku.
28 I bosi, Yave oyambwidi vo e buluku diavova,*+ divovele kwa Bilami vo: “Adieyi ivangidi ungwandidi e nkumbu ntatu zazi?”+
29 Bilami ovutwidi kwa buluku vo: “Kadi mono osakanene. Kele vo nkala yo nsosolo ova koko kwame, nga ivondele!”
30 I bosi, e buluku divovele kwa Bilami vo: “Nga ke mono ko i buluku diaku dina okangalelanga muna zingu kiaku kiawonso yamu unu? Nga yavanga kala e diambu dia mpila yayi kwa ngeye?” Bilami ovutwidi vo: “Nkatu!”
31 I bosi, Yave oziwidi meso ma Bilami,+ omwene mbasi a Yave itelamene muna nzila yo nsosolo andi vana koko. Vana vau Bilami ovumbamene, ofukamene yo bokeka o lose lwandi.
32 I bosi, e mbasi a Yave ivovele kwa Bilami vo: “Ekuma owandidi e buluku diaku mu nkumbu ntatu zazi? Tala! Mono ngizidi muna kusima, kadi e nzil’aku ke ina ngwizani ko yo luzolo lwame.+
33 E buluku dimbwene, divavidi kuntina mu nkumbu ntatu zazi.+ Yindula dina diadi vangama kele vo ke divengomoki ko diantina! Yamu wau nga ivondelenge yo vuluza e buluku.”
34 Bilami ovovese mbasi a Yave vo: “Nsumukini, kadi kizeye wo ko vo mu nzila okedi watelama muna wanana yame. Owau, avo diambi vana meso maku, yambula yavutuka.”
35 Kansi, e mbasi a Yave ivovese Bilami vo: “Wenda yau, kansi ofwete vova kaka mana ikuzayisa.” Muna kuma kiaki, Bilami okwamanene kwenda kumosi ye akuluntu a Balaki.
36 Vava Balaki kawidi vo Bilami olweke, ovaikidi kawanana yandi kuna mbanz’a Moabe, ina muna mbela-mbel’a Arenone muna mwingilu a zunga.
37 Balaki oyuvuidi Bilami vo: “Nga kibokelese ko e? Ekuma kwizidi ko? Nga obenze vo kiafwana kutundidika una ufwene ko e?”+
38 Bilami ovutwidi Balaki vo: “Owau ngizidi kwa ngeye. Kansi, nga iyambulwa vo yavova konso diambu e? Mana kaka o Nzambi kesia muna nua ame i mau ivova.”+
39 Muna kuma kiaki, Bilami wele yo Balaki, balweke muna Kireyate-kusote.
40 Balaki otambikidi ngombe yo mameme se kimenga, otwikidi ndambu a mbizi kwa Bilami ye akuluntu ana bakedi yandi.
41 Muna mene, Balaki onete Bilami yo tomboka yandi kuna Bamote-bale; kimana kamona nkangu awonso tuka vavana.+
Mvovo vana yand'a lukaya
^ I sia vo, Uferate.
^ Mvovo wa sina: “disu dia.”
^ Yovo “nsi.”
^ Yovo “nsi.”
^ Mvovo wa sina: “disu dia.”
^ Mvovo wa sina: “buluku diandi diankento.”
^ Mvovo wa sina: “oziwidi o nua a buluku diankento.”
