Ntalu 27:1-23
27 I bosi, wan’amakento a Selofekade+ wa mwan’a Kefe, wa mwan’a Ngiladi, wa mwan’a Makire, wa mwan’a Manase, muna vumu ya Manase wa mwan’a Yosefe, bafinamene. Ezazi i nkumbu za wan’andi amakento: Makela, Noa, Kongela, Mileka yo Tiresa.
2 Batelamene vana ndose a Mose, Elaza wa nganga, amfumu+ ye vana ndose a nkangu awonso, vana mwelo a saba kia wananina yo vova vo:
3 “O se dieto wafwila muna makanga, kansi kakala mu buka kia awana batelamena Yave ko, ana bayikama Kora,+ kansi mu sumu dia yandi kibeni kafwila, kawuta wan’amakala ko.
4 Nga e nkumbu a se dieto yafukiswa kwandi muna luvila lwandi wau kalembi wuta mwan’ayakala e? Utuvana kunku kia ntoto vana vena mpangi za se dieto.”
5 Muna kuma kiaki, Mose osunzwidi diambu diau kwa Yave.+
6 I bosi, Yave ovovese Mose vo:
7 “O wan’amakento a Selofekade ndungidi bena yau. Ofwete vanga mawonso muna kubavana e kunku kia ntoto se vua vana vena mpangi za se diau, ubavana e vua dia se diau.+
8 Vovesa Aneyisaele vo: ‘Avo yakala ofwidi lembi wuta mwan’ayakala, nufwete vana e vua diandi kwa mwan’andi ankento.
9 Avo kena yo mwan’ankento ko, nuvana e vua diandi kwa mpangi zandi.
10 Avo kena ye mpangi ko, nuvana e vua diandi kwa mpangi za se diandi.
11 Avo se diandi kena ye mpangi ko, nuvana e vua diandi kwa yitu kiandi kia menga mamosi muna luvila lwandi, yandi otambula dio. E nzengo zazi zamfundisa zikala se nkanikinu wa mvu ke mvu kwa Aneyisaele, wauna Yave kakanikini Mose.’”
12 I bosi, Yave ovovese Mose vo: “Tomboka oku mongo wau wa Abarimi,+ watala e nsi ivana kwa Aneyisaele.+
13 Vava omona yo, ongeye mpe ofwa+ wauna wafwila Arone wa mpangi aku,+
14 kadi vava o nkangu watantana yame muna makanga ma Zini, oyeno nuakolamena nkanikinu ame yo lembi kumpaula vana ndose au vava yavaikisa o maza.+ Omama i maza ma Meriba+ kuna Kadese,+ muna makanga ma Zini.”+
15 I bosi, Mose ovovese Yave vo:
16 “Yambula vo Yave wa Nzambi a mwand’a wantu awonso,* kasola muntu mu kuma kia nkangu,
17 ona ovaika yo kota kuna ntwal’au, ona okubavaikisa yo kubakotesa, kimana o nkangu a Yave walembi kala nze mameme makondwa mvungudi.”
18 Muna kuma kiaki, Yave ovovese Mose vo: “Bonga Yosua wa mwan’a Nuni, o muntu wina yo mwanda, untenseka o koko kwaku.+
19 I bosi, untelamesa vana ndose a Elaza wa nganga ye vana ndose a nkangu awonso, untumbika se mfidi vana meso mau.+
20 Ofwete kumvana e ndambu a wisa kiaku,*+ kimana o nkangu awonso a Isaele wanwila.+
21 O Yosua okuyisunzula vana ndose a Elaza wa nganga, ona ovava luludiku lwa Yave muna Urimi+ muna wete dia Yosua. Muna lutumu lwandi i bevaikila, muna lutumu lwandi i bekotela, oyandi ye Aneyisaele awonso bena yandi ye nkutakani yawonso.”
22 I bosi, Mose ovangidi wauna o Yave kankanikina. Obongele Yosua, untelamese vana ndose a Elaza wa nganga ye vana ndose a nkangu awonso,
23 untensekele o moko mandi yo kuntumbika se mfidi,+ wauna o Yave kavova muna Mose.+
