Ntalu 28:1-31
28 I bosi, Yave ovovese Mose vo:
2 “Kanikina Aneyisaele vo: ‘Nufwete kumpananga lukau lwame, e mbolo ame. O tukau twame twayoka vana tiya se lekwa kia nsunga* kwa mono, tufwete vewa muna ntangwa zasikidiswa.’+
3 “Ubavovesa vo: ‘Olwalu i lukau lwayoka vana tiya nusunzula kwa Yave: konso lumbu nufwete vana wan’amameme wole amakoko alunga a mvu mosi se lukau lwa ngioka, lumbu ke lumbu.+
4 Otambika mwan’a meme mosi wakoko muna mene, otambika mwan’a meme wankaka wakoko muna nkokela, vitila e tombe kiabukama,*+
5 kumosi ye tini kiakumi kia efa* ya mfumfu yambote yasangwa e tini kiayá kia yini* ya mazi ma olive yatutwa se lukau lwa mbwaza.+
6 Olwalu i lukau lwa ngioka+ lwa lumbu ke lumbu luna lwasikidiswa kuna Mongo a Sinai se lekwa kia nsunga,* se lukau lwayoka vana tiya kuna kwa Yave,
7 o lukau lwandi lwa ndua, tini kiayá kia yini mu kuma kia konso mwan’a meme.+ Yitila malavu mankolwa vana fulu kiavauka se lukau lwa ndua kwa Yave.
8 Otambika mwan’a meme wankaka wakoko muna nkokela, vitila tombe kiabukama.* Okunsunzula kumosi yo lukau lwa mbwaza nze luna lwa mene, kumosi yo lukau lwa ndua nze luna lwa mene, osunzula lo se lukau lwayoka vana tiya, se lekwa kia nsunga* kuna kwa Yave.+
9 “‘Kansi, muna Lumbu kia Vundu,+ o lukau lufwete kala lwa wana wole amameme amakoko alunga a mvu mosi ye tini kiazole kia efa ya mfumfu yambote yasangwa mazi se lukau lwa mbwaza, kumosi yo lukau lwandi lwa ndua.
10 Olwalu i lukau lwa ngioka lwa Lumbu kia Vundu, kumosi ye lukau lwa ngioka lwa lumbu ke lumbu yo lukau lwandi lwa ndua.+
11 “‘Kuna lubantiku lwa konso ngonde,* nusunzula wana wole a ngombe a makoko, meme dimosi dia koko yo wana nsambwadi a mameme a makoko alunga a mvu mosi-mosi+ se lukau lwa ngioka kwa Yave,
12 tini kiatatu kia mfumfu yambote yasangwa mazi se lukau lwa mbwaza+ mu kuma kia konso ngombe, tini kiazole kia mfumfu yambote yasangwa mazi se lukau lwa mbwaza mu kuma kia meme dimosi dia koko,+
13 tini kiakumi ya mfumfu yambote yasangwa mazi se lukau lwa mbwaza mu kuma kia konso mwan’a meme dia koko, se lukau lwa ngioka, se lekwa kia nsunga,*+ lukau lwayoka vana tiya kuna kwa Yave.
14 O tukau twau twa ndua tufwete kala kati-kati kwa yini ya vinyu muna konso ngombe+ ye tini kiatatu kia yini mu kuma kia meme dia koko+ ye tini kiayá kia yini muna konso mwan’a meme a koko.+ Olwalu i lukau lwa ngioka lwa ngonde ke ngonde, konso ngonde muna mvu wawonso.
15 Nufwete mpe vana kwa Yave nkombo mosi se lukau lwa sumu, vana ntandu a lukau lwa ngioka lwa lumbu ke lumbu kumosi yo lukau lwandi lwa ndua.
16 “‘Muna ngonde antete, muna lumbu kia 14 kia ngonde, kikala se lumbu kia Ndut’a Yave.+
17 Muna lumbu kia 15 kia ngonde yayi, mukala nkinzi. Mbolo zakondwa mfuna zidiwa mu lumbu nsambwadi.+
18 Muna lumbu kiantete mukala lukutakanu lwavauka. Ke nufwete sala konso salu kiangolo ko.
19 Nusunzula wan’a ngombe wole amakoko, meme dimosi dia koko yo wana nsambwadi a mameme a makoko a mvu mosi-mosi se lukau lwa ngioka kwa Yave vana tiya. Nufwete vana bulu yalunga.+
20 Nufwete yo tambika kumosi ye tukau twau twa mbwaza twa mfumfu yambote yasangwa o mazi,+ ndambu yatatu mu kuma kia konso ngombe, ndambu yazole mu kuma kia meme dia koko.
21 Nutambika tini kiakumi mu kuma kia konso mwan’a meme muna wan’a mameme nsambwadi amakoko,
22 nutambika mpe nkombo mosi se lukau lwa sumu muna lomba luyambulwilu lwa masumu meno.
23 Otwatu i tukau nutambika vana ntandu lukau lwa ngioka lwa mene, luna vo i lukau lwa ngioka lwa lumbu ke lumbu.
24 Muna lumbu yau nsambwadi, mu mpila mosi nutambikila tukau twatu konso lumbu, se madia,* lukau lwayoka vana tiya, se lekwa kia nsunga* kuna kwa Yave. Lufwete tambikwa kumosi yo lukau lwa ngioka lwa lumbu ke lumbu yo lukau lwandi lwa ndua.
25 Muna lumbu kiansambwadi, nufwete vanga lukutakanu lwavauka.+ Ke nufwete sala konso salu kiangolo ko.+
26 “‘Muna lumbu kia mbongo antete,+ vava nusunzula lukau lwa mbwaza zampa kwa Yave,+ nufwete vanga lukutakanu lwavauka muna nkinzi mieno mia tumingu.+ Ke nufwete sala konso salu kiangolo ko.+
27 Nusunzula wan’a ngombe wole amakoko, meme dimosi dia koko yo wana nsambwadi a mameme a makoko ma mvu mosi-mosi+ se lukau lwa ngioka, se lekwa kia nsunga* kuna kwa Yave,
28 nufwete yo tambika kumosi ye tukau twau twa mbwaza twa mfumfu yambote yasangwa o mazi, tini kiatatu mu kuma kia konso ngombe, tini kiazole mu kuma kia meme dimosi dia koko,
29 tini kiakumi mu kuma kia konso meme muna mameme nsambwadi ma makoko,
30 nutambika mpe mwan’a nkombo mosi muna lomba luyambulwilu lwa masumu meno.+
31 Katula lukau lwa ngioka lwa lumbu ke lumbu ye lukau lwandi lwa mbwaza, nutambika mpe lekwa yayi. Ifwete kala bulu yalunga,+ kumosi yo tukau twau twa ndua.
Mvovo vana yand'a lukaya
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Mvovo wa sina: “vana kati kwa nkokela zole.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Mvovo wa sina: “vana kati kwa nkokela zole.”
^ Mvovo wa sina: “lwa ngonde zeno.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Mvovo wa sina: “mbolo.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
