Ntalu 30:1-16
30 I bosi, Mose ovovese ana bavitanga o ntu+ muna makanda ma Isaele vo: “I wau wuwu kakanikini o Yave:
2 Avo mwan’ayakala osidi nsilu+ kwa Yave yovo odidi ndofi+ ya kuyisila nsilu walembi* vanga diambu dimosi, kafwete kulula mvovo miandi ko.+ Kafwete lungisa mawonso kasididi o nsilu.+
3 “Avo mwan’ankento osidi nsilu kwa Yave yovo uyisididi nsilu walembi vanga diambu dimosi wau kena ndumba ye ozingilanga muna nzo a se diandi,
4 o se owidi o nsilu andi yovo owidi o nsilu kayisididi* walembi vanga diambu dimosi, kansi o se diandi kamengene dio ko, e nsilu miandi miawonso misikila, konso nsilu kayisididi walembi vanga diambu dimosi usikila.
5 Kansi, avo se diandi unsimini vava kawidi vo mwan’andi ankento nsilu kasidi yovo nsilu kayisididi mialembi vanga diambu dimosi, o nsilu andi ke usikila ko. Yave okunloloka wau vo se diandi unsimini.+
6 “Kansi, avo osompelo kwa yakala ekolo kena muna nsilu andi yovo muna nsilu kayisila lembi teka yindula,
7 o yakala diandi owidi wo ye kamengene dio ko muna lumbu kawidi wo, e nsilu miandi yovo nsilu mina kayisididi mialembi vanga diambu dimosi, misikila.
8 Kansi, avo yakala diandi unsimini muna lumbu kawidi wo, o yakala olenda vunzuna e ndofi yovo nsilu kayisididi o nkento lembi teka yindula,+ Yave ololoka o nkento.
9 “Kansi, avo nkento wafwilwa yakala yovo nkento wavonda longo osidi nsilu, mawonso kayisididi o nsilu mesikila muna yandi.
10 “Kansi, avo nkento osidi nsilu yovo uyisididi nsilu walembi vanga diambu dimosi ekolo kena muna nzo a yakala diandi,
11 o yakala diandi avo owidi wo, kansi kamengene dio ko ye kansimini ko, e nsilu miandi miawonso yovo konso nsilu kayisididi walembi vanga diambu dimosi usikila.
12 Kansi muna lumbu kina yakala diandi kawidi mio, avo yakala ovunzidi emvimba konso nsilu yovo nsilu una kayisididi walembi vanga diambu dimosi, e nsilu miomio ke misikila ko.+ O yakala diandi ovunzidi mio, Yave ololoka o nkento.
13 Muna diambu ditadidi konso nsilu yovo ndofi yalembi vanga diambu muna kuyiyimina lekwa,* o yakala diandi una yo nswa wa sikidisa wo yovo vunzuna wo.
14 Kansi, avo yakala diandi kamengene konso diambu ko muna lumbu kina ye muna lumbu ilanda, o yakala osikidisi mpe nsilu miawonso mia nkento yovo e nsilu mina kayisididi mialembi vanga diambu dimosi. O yakala osikidisi mio wau vo kamengene mio ko muna lumbu kina kawidi o nkento osidinge e nsilu.
15 Kansi, avo oviokese fikolo tuka muna lumbu kawila mio, i bosi obakidi nzengo za vunzuna mio, o yakala otumbwa mu kuma kia ngielele ya nkento.+
16 “Emiami i nsiku mina Yave kakanikina Mose mu kuma kia yakala yo nkento andi, mu kuma kia se yo mwan’andi ankento una vo ndumba ona ozingilanga muna nzo andi.”
Mvovo vana yand'a lukaya
^ Yovo “okangidi e kangu yo moyo andi dialembi.”
^ Yovo “kasididi moyo andi.”
^ Yovo “nsilu wa mwesa moyo e mpasi.”
