Ntalu 36:1-13
-
Nsiku mu kuma kia sompa nkento una ye vua (1-13)
36 E mfumu za makanda ma mbongo a Ngiladi, wa mwan’a Makire,+ wa mwan’a Manase, wa vumu ya wan’a Yosefe, bafinamene Mose ye mfumu za Aneyisaele.
2 Bavovele vo: “Yave wakanikina mfumu ame vo wakayanesa e nsi kwa Aneyisaele se vua muna ntew’a nkas’a mienze;+ o mfumu ame wakanikinua kwa Yave vo wavana e vua dia mpangi eto Selofekade kwa wan’andi amakento.+
3 Avo basompelo kwa akala a kanda diankaka dia Isaele, e vua dia akento dikatulwa muna vua dia mase meto yo kudikilwa muna vua dia kanda dina dikubasompa, ozevo e vua muna kunku kia vua dieto dikatulwa.
4 Vava o Mvu wa Luvevoko+ ufwana kuna kwa nkangu a Isaele, e vua dia akento dikudikilwa mpe muna vua dia kanda dina dikubasompa, ozevo e vua diau mu vua dia kanda dia mase meto dikatulwa.”
5 I bosi, muna lutumu lwa Yave, Mose okanikini Aneyisaele vo: “Dina divovele e kanda dia wan’a Yosefe diambote.
6 I wau wuwu kakanikini o Yave mu kuma kia wan’amakento a Selofekade: ‘Balenda kwau sompwa kwa konso muntu bazolele. Kansi, kafwete kala mosi muna vumu kia kanda dia se diau.
7 Ke vena vua ko dia Aneyisaele difwete katulwa mu kanda edi yo kwenda mu kanda diankaka, kadi Aneyisaele bafwete tatidila e vua dia kanda dia akulu au.
8 Konso mwan’ankento muna makanda ma Isaele una ye vua, kafwete sompwa kaka kwa mosi muna mbongo a kanda dia se diandi,+ kimana Aneyisaele batatidila e vua dia akulu au.
9 Ke vena vua ko difwete katulwa mu kanda edi yo kwenda mu kanda diankaka, kadi o makanda ma Isaele mafwete tatidila e vua diau.’”
10 O wan’amakento a Selofekade bavangidi wauna Yave kakanikini Mose.+
11 Muna kuma kiaki, Makela, Tiresa, Kongela, Mileka yo Noa, o wan’amakento a Selofekade,+ basompanene yo wan’a mpangi za se diau.
12 Basompelo kwa wan’amakala a vumu ya Manase wa mwan’a Yosefe, kimana e vua diau diakwamanana muna kanda dia vumu kia se diau.
13 Emiami i nkanikinu ye nzengo za mfundisa zina Yave kavana kwa Aneyisaele muna Mose, muna makanga ma Moabe, muna nlambu a Yodani, vana ndambu a Yeriko.+
