Ntalu 4:1-49
4 I bosi, Yave ovovese Mose yo Arone vo:
2 “O wan’a Koate+ bafwete sonekwa vana vena o wan’a Levi, mun’owu wa vumu yau ye nzo za mase mau,
3 i sia vo, awonso bena ye kimbuta kia mvu 30+ yakuna 50,+ ana bena muna buka kia awana basolwa mu sadila muna saba kia wananina.+
4 “Ekiaki i salu kia wan’a Koate muna saba kia wananina.+ Ekiaki i salu kisundidi o vauka:
5 Avo e ndo se iyaluka, Arone yo wan’andi bekota muna saba yo katula e rido yakakidila+ yo fukila yo e nkel’a+ Kimbangi.
6 Betenseka e fukilwa kia nkand’a takasi* vana ntandu andi, beyala nlele a bule vana ntandu andi yo kotesa e mbindi+ zandi za natina.
7 “Beyala mpe nlele a bule vana meza ma mbolo za lutambiku,+ besia malonga, makopo, pidi ye mbidika za lukau lwa ndua vana ntandu;+ e mbolo zitambikwanga ntangwa ke ntangwa+ zifwete kalanga kaka vana meza.
8 Beyala o nlele ambwaki vana ntandu a lekwa yayi, befukila o meza muna fukilwa kia nkand’a takasi* yo kotesa e mbindi zandi za natina.+
9 I bosi, bebonga nlele a bule yo fukila e zangikilwa kia minda+ kisadilwanga mu kuma kia ntemo, kumosi ye minda miandi,+ ziminua yandi ya minda, lekwa yandi ya natina ntoto ampolo+ ye lundilwa yandi yawonso ya mazi mesadilwanga kimana e minda miakalanga miakwama.
10 Bezinga kio va fukilwa kia nkand’a takasi* kumosi ye sadilwa yandi yawonso, besia kio vana nti a natina.
11 Beyala nlele a bule vana ntandu a ziku dia wolo,+ befuka dio e fukilwa kia nkand’a takasi* yo kotesa e mbindi zandi za natina.+
12 I bosi, bebonga e salanganu yawonso+ ina besadilanga vana fulu kiavauka yo sia yo vana nlele a bule, befuka yo e fukilwa kia nkand’a takasi* yo sia yo vana nti a natina.
13 “Bafwete katula o ntoto ampolo* vana ziku+ yo yala o nlele wavangilwa muna mika mia se kia nduwa vana ntandu a ziku.
14 I bosi, besia vo e sadilwa yandi yawonso isadilwanga vava besadilanga vana ziku: lekwa ya natina tiya, nsoma, pawu ye pidi, i sia vo, sadilwa yawonso ya ziku.+ Besia e fukilwa kia nkand’a takasi* vana ntandu a ziku yo kotesa e mbindi zandi za natina.+
15 “Arone yo wan’andi bafwete fokola fukila e lekwa ya fulu kiavauka+ ye salanganu yawonso ya fulu kiavauka, i bosi e ndo iyaluka. O wan’a Koate bekota banata yo,+ kansi ke bafwete simba lekwa ya fulu kiavauka ko, wana fwa befwa.+ Ekiaki i kiyekwa kia* wan’a Koate mu kuma kia saba kia wananina.
16 “O Elaza+ wa mwan’a Arone wa nganga yandi i nkengi muna salu kia lunga-lunga o mazi ma minda,+ ndumbu ansunga,+ lukau lwa mbwaza lwa lumbu ke lumbu yo mazi mankusa.*+ Yandi i nkengi a saba kiawonso ye yawonso ina mo, kumosi ye fulu kiavauka ye salanganu yandi.”
17 Yave ovovese diaka Mose yo Arone vo:
18 “Ke nuyambula ko vo e kanda dia vumu ya Anekoate+ diafukiswa vana vena Anelevi.
19 Kansi, owu ovanga mu kuma kiau kimana bakwamanana kala o moyo yo lembi fwa vava befinama e lekwa isundidi o vauka:+ Arone yo wan’andi bekota muna saba kia wananina yo vana kwa konso muntu muna yau e salu kiandi ye lekwa ina kenata.
20 Anekoate ke bafwete mo kota ko yo tala lekwa yavauka kana nkutu mu fikolo, wana fwa befwa.”+
21 I bosi, Yave ovovese Mose vo:
22 “Soneka wan’a Ngeresone+ mun’owu wa nzo za mase mau ye vumu yau.
23 Soneka awonso bena ye kimbuta kia mvu 30 yakuna 50, ana bena muna buka kia awana basolwa mu sadila muna saba kia wananina.
24 Eyayi i lekwa iveno kwa vumu ya Anengeresone balunga-lunga yo nata yo:+
25 Yau benata o nlele a saba,+ saba kia wananina, fukilwa yandi ye fukilwa kia nkand’a takasi* kina vana ntandu andi,+ rido a mwelo a saba kia wananina,+
26 nlele mia yanzala,+ rido ya mwelo a yanzala kiazunga e saba+ ye ziku, nsinga miau, salanganu yau yawonso ye lekwa yawonso isadilwanga muna saba. Kiaki i salu kiau.
27 Arone yo wan’andi yau bekala akengi muna salu yawonso ye mazitu mawonso menata Anengeresone;+ nukubavana mazitu mama mawonso; ekiaki i kiyekwa kiau.
28 Kiaki i salu kisala e vumu ya Anengeresone muna saba kia wananina.+ O Itama+ wa mwan’a Arone wa nganga yandi okubafila muna salu yau.
29 “Vo i wan’a Merare,+ okubasoneka mun’owu wa vumu ye nzo a se diau.
30 Soneka ana bena ye kimbuta kia mvu 30 yakuna 50, awonso bena muna buka kia awana basolwa mu sadila muna saba kia wananina.
31 Eyayi i lekwa bena ye kiyekwa kia nata+ mun’owu wa salu kiau muna saba kia wananina: valanganza ya mabaya+ ya saba, mbindi zandi,+ malunzi mandi,+ telamesenua yandi;+
32 malunzi+ ma kinzieta kia yanzala, telamesenua yau,+ mpalu zau,+ nsinga miau kumosi ye sadilwa yandi yawonso ye salu yawonso isadilwanga muna lekwa yayi. Nuvana konso muntu e lekwa ina kenata mun’owu wa nkumbu zau.
33 E vumu kia wan’a Merare+ i wau besadila muna saba kia wananina, o Itama wa mwan’a Arone wa nganga+ yandi ovita o ntu.”
34 I bosi, Mose yo Arone ye mfumu+ za nkangu basonekene wan’amakala a Anekoate+ mun’owu wa vumu yau ye mun’owu wa nzo a se diau,
35 awonso bena ye kimbuta kia mvu 30 yakuna 50, ana bena muna buka kia awana basolwa mu sadila muna saba kia wananina.+
36 O lutangu lwa awonso lwa awana basonekeno mun’owu wa vumu yau, 2.750.+
37 Awaya i basonekeno muna vumu ya Anekoate, awonso ana basadilanga muna saba kia wananina. Mose yo Arone babasonekene wauna Yave kakanikina muna Mose.+
38 O wan’a Ngeresone+ basonekeno mun’owu wa vumu yau ye nzo a se diau,
39 awonso bena ye kimbuta kia mvu 30 yakuna 50, ana bena muna buka kia awana basolwa mu sadila muna saba kia wananina.
40 O lutangu lwa awonso lwa awana basonekeno mun’owu wa vumu yau ye mun’owu wa nzo a se diau, 2.630.+
41 Awaya i basonekeno muna vumu ya wan’a Ngeresone, awonso ana basadilanga muna saba kia wananina. Mose yo Arone babasonekene wauna kakanikina o Yave.+
42 O wan’a Merare basonekeno mun’owu wa vumu yau ye mun’owu wa nzo a se diau,
43 awonso bena ye kimbuta kia mvu 30 yakuna 50, ana bena muna buka kia awana basolwa mu sadila muna saba kia wananina.+
44 O lutangu lwawonso lwa awana basonekeno mun’owu wa vumu yau, 3.200.+
45 Olwalu i lutangu lwa vumu ya wan’a Merare, ana o Mose yo Arone basonekene wauna Yave kakanikina muna Mose.+
46 Mose yo Arone ye mfumu a Isaele basonekene Anelevi awaya awonso mun’owu wa vumu yau ye mun’owu wa nzo za mase mau;
47 ana bena ye kimbuta kia mvu 30 yakuna 50, awonso baveno e kiyekwa kia sala yo nata mazitu ma saba kia wananina.+
48 O lutangu lwa awonso lwa awana basonekeno, 8.580.+
49 Basonekeno wauna Yave kakanikina muna Mose, konso muntu mun’owu wa salu kiandi ye funda kiandi; basonekeno wauna o Yave kakanikina Mose.
Mvovo vana yand'a lukaya
^ Yovo “mbw’a mbu.”
^ Yovo “mbw’a mbu.”
^ Yovo “mbw’a mbu.”
^ Yovo “mbw’a mbu.”
^ Yovo “mbw’a mbu.”
^ Yovo “ntoto ampolo a mazi,” i sia vo, ntoto ampolo wasangana yo mazi ma yimenga.
^ Yovo “mbw’a mbu.”
^ Mvovo wa sina: “Ediadi i zitu dia.”
^ I sia vo, mazi masadilwanga muna tumbika muntu.
^ Yovo “mbw’a mbu.”
