Ntalu 5:1-31
5 Yave ovovese diaka Mose vo:
2 “Kanikina Aneyisaele bavaikisa kuna mbazi a ndo konso muntu una yo wazi,+ konso muntu osonswanga ma muna nitu+ ye konso muntu ofunzukidi wau kasimbidi e vimbu dia muntu.*+
3 Kiakala yakala yovo nkento, nufwete kubavaikisa. Nufwete kubavaikisa kuna mbazi a ndo, kimana balembi sambukisa+ e ndo za nkangu ame, kadi omono ikalanga va kati kwau.”+
4 Muna kuma kiaki, Aneyisaele bavangidi wo, babavaikisi kuna mbazi a ndo. Wauna Yave kavovesa Mose i una mpe Aneyisaele bavanga.
5 Yave okwamanene vovesa Mose vo:
6 “Vovesa Aneyisaele vo: ‘Avo yakala yovo nkento ovolele dimosi muna masumu bevolanga o wantu yo kondwa kwikizi muna Yave, o muntu* ndioyo okuzukidi.+
7 Kafwete* funguna+ e sumu dina kavolele* yo vutula e ntalu yawonso mu kuma kia kuzuka diandi, okudikila mpe tini kiatanu kia ntalu andi;+ ovana zo kwa muntu kavangidi e mbi.
8 Kansi, avo muntu ndioyo ofwidi ye kena ye yitu kiamenga ko ona olenda tambula kina kifutilu, kina kifutilu kifwete vutulwa kwa Yave, kikala se kia nganga, vana ntandu a meme dia koko dia luyambulwilu lwa masumu dina kelombela luyambulwilu lwa masumu ma ndiona ovangidi e mbi.+
9 “‘Konso lukau lwavauka+ luna Aneyisaele besunzula kwa nganga, lufwete kituka se lwandi.+
10 E lekwa yavauka ina konso muntu kesunzula kwa nganga, ikala se yandi. Konso lekwa kesunzula o muntu kwa nganga, e lekwa kiokio kikala se kia nganga.’”
11 Yave ovovese diaka Mose vo:
12 “Vovesa Aneyisaele vo: ‘I wau wuwu ufwete vangwa avo nkento asompwa obendomokene yo kondwa e kwikizi muna yakala diandi,
13 o yakala diankaka kavukana yandi,+ kansi e diambu diadi ke dizayakene ko kwa yakala diandi, dikwamanene dia nsweki, o nkento uyifunzwidi kana una vo ke vena mbangi ko olenda kumfunda kadi kabakamene ko:
14 Avo yakala okitukidi nkwa nsongo yo katikisa e kwikizi kia nkento andi, ye o nkento funzula kikilu kayifunzwidi, yovo yakala okitukidi nkwa nsongo yo katikisa e kwikizi kia nkento andi, kansi o nkento kayifunzwidi kwandi ko,
15 o yakala kafwete nata o nkento andi kwa nganga kumosi yo lukau mu kuma kia nkento, tini kiakumi kia efa* kia mfumfu ya bale. Kafwete lo yitila mazi ko ngatu sia lo e ndumbu a nti a lebona, kadi i lukau lwa mbwaza mu kuma kia nsongo, lukau lwa mbwaza lusungamesanga e kuzuka.
16 “‘O nganga onata o nkento kuna ntwala yo kuntelamesa vana ntadisi a Yave.+
17 O nganga obonga maza mavauka muna kinzu kia tuma, obonga ndambu a mbundukutu a ntoto a saba yo sia yo muna maza.
18 O nganga otelamesa o nkento vana ndose a Yave, okutulula e nsuki za nkento yo sia vana moko ma nkento o lukau lwa mbwaza lwa luyindulu, i sia vo, lukau lwa mbwaza mu kuma kia nsongo,+ o nganga okala yo maza mandudi vana moko, mana metwasanga e sibu.+
19 “‘I bosi, nganga odisa o nkento e ndofi yo kumvovesa vo: “Avo ka vena yakala diankaka ko ovukane yaku ekolo wina muna wisa kia yakala diaku,+ avo kubendomokene ko ngatu kuyifunzula, yambula wavevoka muna mpasi za maza mama mandudi metwasanga e sibu.
20 Kansi, avo wabendomokene ekolo wina muna wisa kia yakala diaku muna kuyifunzula yo vukana yo yakala diankaka—”+
21 Ozevo, o nganga olomba kwa nkento kadia e ndofi ya sibu, nganga ovovesa nkento vo: “Yambula Yave kakitula se mbandu ifwete yikwa muna sibu ye muna ndofi vana vena o nkangu aku. Avo vanga ovangidi wo, yambula Yave kabwisa* e tungi* diaku dia kulu yo vimbisa e vumu kiaku.
22 O maza mama metwasanga e sibu mekota muna ndia miaku mu vimbisa e vumu kiaku yo bwisa* e tungi* diaku dia kulu.” Muna diadi, o nkento ovova vo: “Amen! Amen!”*
23 “‘I bosi, o nganga osoneka e sibu yayi muna nkanda yo vunzunuina yo muna maza mandudi.
24 I bosi, onuika maza mandudi metwasanga e sibu kwa nkento, o maza mama mekota muna nkento yo twasa e mpasi.
25 Nganga obonga lukau lwa mbwaza mu kuma kia nsongo+ vana koko kwa nkento yo zunganisa lukau lwa mbwaza kuna ntwala y’oku nima se lukau lwa zunganisa vana ntadisi a Yave yo twasa lukau vana ndambu a ziku.
26 Nganga obonga koko kumosi kwa lukau lwa mbwaza se sinsu kisunzulanga lukau lwawonso* yo futumuna ko vana ziku,+ i bosi onuika nkento o maza.
27 Vava kenuika maza kwa nkento, avo nkento funzula kikilu kayifunzwidi yo kondwa e kwikizi muna yakala diandi, o maza metwasanga e sibu mekota muna yandi yo twasa e mpasi, e vumu kiandi kivimba, e tungi* diandi dia kulu dibwa,* o nkento okituka se mbandu a sibu vana vena o nkangu andi.
28 Kansi, avo nkento kayifunzwidi ko ye wavelela, ovevoka muna tumbu kiaki, wafwana yimita yo wuta wana.
29 “‘Owau i nsiku mu kuma kia nsongo,+ avo nkento obendomokene yo kuyifunzula ekolo kena muna wisa kia yakala diandi,
30 yovo avo yakala okitukidi nkwa nsongo yo katikisa e kwikizi kia nkento andi; o yakala kafwete telamesa o nkento andi vana ntadisi a Yave, o nganga kafwete lungisa o nsiku wau wawonso mu kuma kiandi.
31 O yakala ovevoka muna kuzuka, kansi o nkento andi otumbwa mu kuma kia kuzuka diandi.’”
Mvovo vana yand'a lukaya
^ Yovo “moyo.” Tala Nsas’a Mvovo.
^ Yovo “moyo.”
^ Mvovo wa sina: “Bafwete.”
^ Mvovo wa sina: “bavolele.”
^ Yovo “kayumisa.” Nanga disongele vo vidisa mawuta.
^ Mvovo wau yikwa ya wutila uyikanga.
^ Yovo “yumisa.” Nanga disongele vo vidisa mawuta.
^ Mvovo wau yikwa ya wutila uyikanga.
^ Yovo “Yambula diakala wowo! Yambula diakala wowo!”
^ Yovo “se kunku kia luyindulu kia lukau.”
^ Mvovo wau yikwa ya wutila uyikanga.
^ Yovo “diyuma.” Nanga disongele vo vidisa mawuta.
