Ntalu 8:1-26
8 Yave ovovese Mose vo:
2 “Vovesa Arone vo: ‘Vava okwika e minda, e minda miau nsambwadi mifwete minika kuna ntwal’a zangikilwa kia minda.’”+
3 I bosi, Arone ovangidi wo: Okwikidi e minda+ mu minika kuna ntwal’a zangikilwa kia minda, wauna o Yave kakanikina Mose.
4 I wau wuwu kiavangilwa e zangikilwa kia minda: Mu wolo watutilwa mu malutelo; tuka muna vimbu diandi yamuna mvuma zandi, kia wolo watutilwa mu malutelo.+ E zangikilwa kia minda kiavangilwa mun’owu wa mona meso+ kina Yave kasonga kwa Mose.
5 Yave ovovese diaka Mose vo:
6 “Bonga Anelevi vana vena Aneyisaele, ubavelelesa.+
7 I wau wuwu okubavelelesela: Ubazaza maza ma luveleleso,* bafwete vala e nsuki ye mika miawonso mia nitu muna mbele a vuayi,* sukula e mvuatu miau yo kuyivelelesa.+
8 I bosi, bebonga mwan’a ngombe+ yo lukau lwandi lwa mbwaza+ lwa mfumfu yambote yasangwa o mazi, ongeye obonga mwan’a ngombe ankaka se lukau lwa sumu.+
9 Ongeye osunzula Anelevi vana ntwal’a saba kia wananina yo kutakesa o nkangu awonso a Isaele.+
10 Vava osunzula Anelevi vana ndose a Yave, Aneyisaele betenseka moko mau kwa Anelevi.+
11 Arone kafwete tambika* Anelevi vana ndose a Yave se lukau lwa zunganisa+ lutukidi kwa Aneyisaele, Anelevi besala e salu kia Yave.+
12 “Anelevi betenseka moko vana ntu mia ngombe.+ I bosi, e ngombe imosi itambikwa se lukau lwa sumu, e yankaka se lukau lwa ngioka kwa Yave, muna lomba luyambulwilu lwa masumu+ ma Anelevi.
13 Ongeye otelamesa Anelevi vana ndose a Arone yo wan’andi yo kubatambika* se lukau lwa zunganisa kwa Yave.
14 Ofwete vambula Anelevi vana vena Aneyisaele, Anelevi bekituka se i bame.+
15 I bosi, Anelevi bekota mu sadila muna saba kia wananina. I wau wuwu okubavelelesela yo kubatambikila* se lukau lwa zunganisa.
16 Kadi oyau i baveno kwa mono se lukau vana vena Aneyisaele. Ikubabonga bakala se bame vana fulu kia wan’antete* awonso a Aneyisaele.+
17 Kadi konso mwan’antete vana vena Aneyisaele i wame, kiakala mwan’a muntu yovo mwan’a bulu.+ Yabavaula bakala bame muna lumbu kina yavonda wan’antete awonso muna nsi ya Engipito.+
18 Ibonga Anelevi vana fulu kia wan’antete awonso vana vena Aneyisaele.
19 Ivana Anelevi kwa Arone yo wan’andi se lukau lutukidi vana vena Aneyisaele, basadila muna saba kia wananina+ muna wete dia Aneyisaele yo lomba luyambulwilu lwa masumu ma Aneyisaele, kimana valembi bwa vuku vana vena Aneyisaele+ avo nkangu a Isaele ufinamen’e fulu kiavauka.”
20 O Mose yo Arone yo nkangu awonso a Isaele bavangidi e diambu diadi kwa Anelevi. Mun’owu wawonso kakanikina o Yave kwa Mose mu kuma kia Anelevi, i wau Aneyisaele bavangidi kwa yau.
21 Ozevo, Anelevi bayivelelese yo sukula e mvuatu miau,+ Arone ubatambikidi* se lukau lwa zunganisa vana ntadisi a Yave.+ I bosi, Arone olombele luyambulwilu lwa masumu mu kuma kiau muna kubavelelesa.+
22 I bosi, Anelevi bakotele mu sala e salu kiau muna saba kia wananina, vana ndose a Arone yo wan’andi. Wauna o Yave kakanikina kwa Mose mu kuma kia Anelevi, i wau bavangidi kwa yau.
23 Yave ovovese Mose vo:
24 “Ediadi i divangama kwa Anelevi: Tuka muna kimbuta kia mvu 25 yovo vioka, o mwan’a yakala kafwete kota muna buka kia awana besadilanga muna saba kia wananina.
25 Kansi, avo oviokele kimbuta kia mvu 50, okuyikatula muna buka kia salu, kesala diaka konso salu ko.
26 Olenda kwandi sadila e mpangi zandi ana belunga-lunganga e yiyekwa muna saba kia wananina, kansi kalendi mo sadila konso salu ko. I wau wuwu nufwete vanga mu kuma kia Anelevi ye iyekwa yau.”+
Mvovo vana yand'a lukaya
^ Yovo “mekatulanga e sumu.”
^ I sia vo, mbele yatoma twa ya zengela nzevo ye nsuki.
^ Mvovo wa sina: “zunganisa,” i sia vo, ozunganisa kuna ntwala y’oku nima.
^ Mvovo wa sina: “kubazunganisa,” i sia vo, zunganisa kuna ntwala y’oku nima.
^ Mvovo wa sina: “kubazunganisina,” i sia vo, zunganisa kuna ntwala y’oku nima.
^ Yovo “konso mwan’antete oziula e vumu.”
^ Mvovo wa sina: “ubazunganese,” i sia vo, zunganisa kuna ntwala y’oku nima.
