Osea 4:1-19
4 Nuwá diambu dia Yave, e nkangu a Isaele,Kadi o Yave diambu kena diau yo nkangu a nsi,+Kadi muna nsi ke muna ludi ko, walakazi, ngatu zayi wa Nzambi.+
2 Ndofi za luvunu, vuna,+ vonda,+Wivi ye zumba+ iwokele,O nkangu ubungulanga menga m’akwau ntangwa zawonso,+
3 Dianu vo e nsi idila,+Wantu awonso bena mo beyoya;E bulu ya mfuta, nuni za zulu,Ye mbizi za kalunga nkutu, zifwa.
4 “Kansi, ke vakadi muntu ko otantana ngatu semba,+Kadi nkangu aku una nze awana betantana ye nganga.+
5 Dianu vo ota sakuba muna mwini,O ngunza ota yaku sakuba nze muna fuku.
Fwasa ifwasa ngudi aku.
6 Nkangu ame ufwaswa, kadi ke banzeye ko.
Wau vo obembwele o zayi,+Omono mpe ikubembola kimana walembi kala diaka nganga ame;Kadi ovilakene o nsiku wa Nzambi aku,+Omono mpe vilakana ivilakana wan’aku.
7 Vava bewokela, beluta kunsumukina.+
Isinga kitula nkembo au se nsoni.*
8 Bedilanga muna sumu dia nkangu ame,Yo zinukina o* bi wau.
9 O nkangu ye nganga bafwanana;Ikubatumba mu kuma kia nzila zau,Yo kubatwasila mfwilu mu kuma kia mavangu mau.+
10 Bedia, kansi ke beyukuta ko.+
Beta zumba, kansi ke bewokela ko+Kadi ke bazitisi Yave ko.
11 E zumba, vinyu ye vinyu ampaIkatula e tima dia vanga edi diansongi muna muntu.*+
12 O nkangu ame wele yuvula teke ya nti,Bevanganga mana bevoveswa kwa nkau miau;*Kadi o mwand’a zumba ukubavukumunanga,Muna kuma kia zumba yau ke bazolele lemvokela Nzambi ko.
13 Bakelele yimenga kuna ntandu za miongo,+Yo yoka ndumbu kuna kundubulu,Kuna nsi a nti mia sene ye terebinte ye nti miawonso mianene,+Kadi e viozi yau yambote.
Ekiaki i kuma wan’aku amakento batelele zumbaYo wan’aku a longo batelele zumba.
14 Kitumba wan’aku amakento ko mu kuma kia zumba yau,Yo wan’aku a longo mu kuma kia zumba yau.
Kadi wan’amakala bavaikidi ye akembiYo tambika yimenga ye akembi a tempelo;O nkangu wau wakondwa umbakuzi,+ fwaswa ufwaswa.
15 E Isaele, kana una vo ngeye otanga e zumba,+E Yuda ke nata nkanu ko.+
Kwendi kuna Ngilengale ko+ ngatu kuna Betavene,+Kudie ndofi ko vo: ‘I nkal’a Yave kaka!’+
16 Kadi Isaele okitukidi nkwa lulendo nze ngombe a lulendo.+
Nga Yave ke kumvungula ko nze mwan’a meme muna madilu?*
17 Eferaime otatamene e teke.+
Yambula kakala yandi mosi!
18 Avo malavu* mau mamene,Bakitukidi minta-zumba.
Ayadi andi* bazolele kikilu e nsoni.+
19 E tembwa kinata mave mandi,Bemwena yimenga yau e nsoni.”
Mvovo vana yand'a lukaya
^ Nanga, “Bakitwidi nkembo ame se nsoni.”
^ Yovo “betelamena moyo muna.” Tala Nsas’a Mvovo, “Moyo.”
^ Mvovo wa sina: “Ikatula ntim’a muntu.”
^ Yovo “nkau wa ngang’a ngombo.”
^ Mvovo wa sina: “fulu yasanzuka.”
^ Yovo “selevezia.”
^ Mvovo wa sina: “ngubu andi.”