Kuna kwa Esi Roma 2:1-29
2 Dianu vo, ongeye muntu, kana nkutu u nani+ kuna y’edi ovova ko; e kuma kadi mana ofundisila o nkwaku, i mau okukiyelesela, kadi ngeye ofundisanga, mana ofundisilanga akaka i mau ovanganga.+
2 Owau tuzeye wo vo e tumbu kia Nzambi ngwizani kina ye ludi kuna kw’awana bevanganga mambu mama.
3 Kansi, ongeye muntu, wau ofundisanga awana bevanganga mambu mama, nga obenze vo otina mfundis’a Nzambi ekolo ngeye kibeni ovanganga mambu mama?
4 Yovo, ongeye ovezanga umvuama wa ngemba zandi+ yo ntim’a vunda+ ye luzindalalu,+ wau olembele zaya vo Nzambi muna ngemba zandi ovavanga kufila muna luviluku lwa ntima e?+
5 Kansi, muna kuma kia lulendo lwaku yo lembi viluka o ntima, makasi ma Nzambi ukuyilundilanga. O Nzambi osengomona makasi mandi muna lumbu kia mfundis’andi yansongi.+
6 Osenda konso muntu mun’owu wa mavangu mandi:+
7 ovana moyo a mvu ya mvu kw’awana bevavanga nkembo, zitu ye nitu ilembi wola+ wau bezindalala muna mavangu mambote;
8 kansi kuna kwa akwa ntantani ye awana bekolamenanga e ludi yo lemvokela umpumbulu, okubatwasila makasi ye nganzi zandi.+
9 Mpasi ye ntantu kw’awonso bevanganga mambu mambi, entete kwa Nyuda ye Mungerekia mpe;
10 kansi nkembo, zitu ye luvuvamu kw’awonso bevanganga mambu mambote, entete kwa Nyuda+ ye Mungerekia mpe.+
11 Kadi o Nzambi ke sianga mpambula ko.+
12 Kadi awonso ana basumuka kondwa nsiku, befwa kondwa nsiku;+ kansi awonso basumukina muna nsiku, muna nsiku befundisilwa.+
13 Kadi, awana bewanga o nsiku ke yau ko i ansongi vana ndose a Nzambi, kansi awana belundanga o nsiku, yau bebadikilwa vo ansongi.+
14 Kadi vava esi zula ana ke bena ye nsiku ko,+ bevanganga mambu melombwanga muna nsiku muna kingutukila, wantu awaya, kanele vo ke bena yo nsiku ko, bena se nsiku muna yau kibeni.
15 Besonganga vo mambu melombwanga muna nsiku masonama muna ntima miau, e ntona zau zikubasilanga umbangi, e ngindu zau mpe zikubatumbanga yovo kubalungisa.
16 Ediadi divangama muna lumbu kina Nzambi muna Kristu Yesu kefundisa mambu maswekama ma wantu,+ mun’owu wa nsangu zambote isamunanga.
17 Avo Nyuda oyikilwanga+ yo bunda e vuvu muna nsiku yo kuyisana muna Nzambi,
18 avo ozeye luzolo lwandi, yo tambulwila mambu mambote, wau walongwa o Nsiku,+
19 avo una ye ziku vo u mfidi a mpofo, u ntemo kw’awana bena mu tombe,
20 u nludiki a mazowa, u nlongi a yingiana-ngiana, obakulanga mambu masina ye ludi kina muna Nsiku—
21 kansi ongeye olonganga akaka, kukuyilonganga ko e?+ Ongeye osamunanga vo: “Kuyiyi ko,”+ ongeye yiya kwaku e?
22 Ongeye ovovanga vo: “Ku te zumba ko,”+ ongeye tá kwaku e zumba e? Ongeye okenonokanga e teke, tempelo yiya kwaku e?
23 Ongeye okuyisananga muna nsiku, nga Nzambi veza kwandi wau okolamenanga Nsiku e?
24 Kadi “e nkumbu a Nzambi itiangunuanga vana vena esi zula mu kuma kieno,” wauna wasonama.+
25 Kieleka, o zengwa+ mfunu kwina avo nsiku olundanga;+ kansi avo kulundanga nsiku ko, o zengwa kwaku kukituka se lembi zengwa.
26 Kansi, avo mundembi zengwa+ olundanga e nkanikinu miansongi mina muna Nsiku, olembi zengwa kwandi, nga kubadikilwa se zengwa e?+
27 O mundembi zengwa muna nitu, ona olundanga o Nsiku, okufundisa ongeye okululanga o nsiku, kanele vo una ye nsiku yo zengwa.
28 Kadi o Nyuda ke ndiona ko una vo Nyuda kuna mbazi,+ ngatu o zengwa kuna vo kwa mbazi, muna nitu.+
29 Kansi Nyuda i ndiona una vo Nyuda muna kati,+ o zengwa kwandi kwa ntima,+ muna mwanda, ke muna nsiku ko.+ O lusanisinu lwa muntu ndioyo kwa Nzambi lutukanga, ke kwa wantu ko.+
