Rute 2:1-23
2 Naomi wakala ye yitu muna kanda dia Elimeleke wa nkaz’andi, nkumbu andi Boaze,+ mvuama kikilu kakala.
2 Rute wa musi Moabe ovovese Naomi vo: “Dodokolo, ungiambula ngienda kuna kiana yawonzolola+ kuna nim’a konso muntu okunsonga e dienga.” Naomi umvutwidi vo: “Wenda e mwan’ame.”
3 Rute wele, oyantikidi wonzolola muna mpatu kuna nima asadi. Lembi wo zaya, olweke muna mpatu a Boaze+ wa yitu kia Elimeleke.+
4 Muna ntangwa yayina, Boaze otukidi kuna Beteleme, olweke yo vovesa asadi vo: “Yambula Yave kakala yeno.” Bavutwidi vo: “Yave kasàmbula.”
5 I bosi, Boaze oyuvuidi mfumu asadi vo: “O mwan’a ndumba ndioyo yitu kia nani?”
6 O mfumu asadi ovutwidi vo: “O mwan’a ndumba ndioyo musi Moabe+ ona wayizidi yo Naomi tuka kuna nsi a Moabe.+
7 Undombele vo: ‘Dodokolo, nga ndenda wonzolola+ e mbongo isisidi asadi kuna nima?’ Tuka kalwakidi muna mene kayambwidi sala ko, wau kaka kakotele muna sudi* kavunda fioti.”
8 I bosi, Boaze ovovese Rute vo: “Wá, e mwan’ame kuwonzolwela mu mpatu yankaka ko, kwendi mpe ku fulu kiankaka ko; kala vamosi ye asadi ame akento.+
9 Sia sungididi muna mpatu bekutikila, wenda yau. Nkanikini matoko balembi kutokanesa. Avo mwene vuina, wenda vana mvungu wanua maza mana matoko batekele.”
10 Rute ofukamene, obokekele o luse yo kumvovesa vo: “Ekuma mbweneno e dienga ova ndose aku? Ekuma unsididi e sungididi wau vo i nzenza?”+
11 Boaze umvutwidi vo: “Yazayiswa mawonso wavanga kwa kô waku vava nkaz’aku kafwa ye mpila wasisila se diaku, ngudi aku, nsi aku ye yitu yaku yo kwiza kwa nkangu una kwateka zaya ko.+
12 Yambula Yave kasambula mu mambu ovanganga+ ye tambula nsendo walunga kwa Yave wa Nzambi a Isaele, kuna nsi a mave ma ndiona wizidi tinina.”+
13 Rute ovutwidi vo: “Yambula yamwenua dienga va ndose aku e mfumu ame, kadi umfiaulwisi yo kumpovesela kuna ngemba, kana una vo ki ntaudi aku ko.”
14 Muna ntangw’a dia, Boaze umvovese vo: “Wiza vuanda wadia e mbolo, vunga e mbolo aku muna vinyu ya ngani.” Ovuende vana ndambu asadi. Boaze umvene masa makangwa, odidi yo yukuta, osidi nkutu ye ndambu a madia.
15 Vava katelamene kenda wonzolola,+ Boaze okanikini matoko vo: “Nunyambula kawonzolwela vana vena mbongo isâkilu, ke nuntokanesa ko.+
16 Nukatulanga mpe ntu mia masa muna ntete yo kunsisila kimana kawonzolola, ke nunsimi ko.”
17 Muna kuma kiaki, okwamanene wonzolola yakuna masika.+ Vava kabundidi mbongo ina kawonzolola, ivaikisi tezo kia efa* mosi ya mbongo a bale.
18 I bosi, onete yo kuna mbanza, o kô wandi omwene ina kawonzolola. Rute ovaikisi mpe madia masuva+ vava kadia yo yukuta, umvene mo.
19 O Naomi wa kô wandi umvovese vo: “Akweyi owonzolwele o unu? Akweyi osadidi? Yambula kasambulwa ndiona usongele dienga.”+ Ovovese kô wandi oma ma mfumu a mpatu ina kasadidi, oku vo: “O mfumu a mpatu nsadidi o unu nkumbu andi Boaze.”
20 Naomi ovovese mwan’andi a longo vo: “Yambula kasambulwa kwa Yave ona osonganga walakazi kwa awana bena moyo ye awana bafwa.”+ Naomi ovovele diaka vo: “Muntu ndioyo yitu kieto.+ Yandi i mosi muna akûdi eto.”+
21 Rute wa musi Moabe ovovele vo: “Umpovese mpe vo, ‘Kala kaka kumosi ye asadi ame yavana kifokoka e nkutika yawonso.’”+
22 Naomi ovovese Rute wa mwan’andi a longo vo: “E mwan’ame, diambote wendanga ye asadi andi akento ke mu kwenda tokaneswa mu mpatu yankaka ko.”
23 Muna kuma kiaki, okedi kumosi ye asadi akento a Boaze yo wonzolola yavana kiafokoka e nkutik’a mbongo a bale+ ye masa. Wakwamanana zinga kumosi yo kô wandi.+
