Rute 3:1-18
3 Naomi wa kô wandi umvovese vo: “E mwan’ame, yambula yavavila e nzo+ yakala se vundilu diaku.
2 O Boaze ona oyambwidi vo wakala ye ntaudi zandi zamakento, yitu kieto.+ Mu fuku wau, bale kekwenda veva kun’e bundilu.
3 Ozevo, yowela, uyikusa mazi; i bosi vuata mvuatu miaku,* wakulumuka kuna bundilu. Kuyambula ko vo kamona yavana kemana dia yo nua.
4 Vava kekwenda leka, vava zaya fulu kina keleka; i bosi, ndá fukula tambi yandi yo leka vana ndambu a tambi yandi. Okuvovesa dina ovanga.”
5 Rute ovutwidi vo: “Se yavanga mawonso umpovese.”
6 Okulumukini kuna bundilu, ovangidi mawonso kazayisu kwa kô wandi.
7 Boaze vava kamene dia yo nua, o ntim’andi uyangalele. I bosi wele leka vana ndambu a mbub’a bale. Rute wele yomboki vana kena, ofukwidi tambi yandi yo leka vana ndambu.
8 Muna dingi-dingi, Boaze omwene kiozi, ovumbukidi yo mona nkento olele vana ndambu a tambi yandi.
9 Oyuvuidi vo: “Ongeye u nani?” Ovutwidi vo: “Mono i Rute wa ntaudi aku. Yalumwina ntaudi aku o nlele,* kadi ngeye i nkûdi.”+
10 Ovovele vo: “E mwan’ame, yambula Yave kasambula, o walakazi osongele owau usundidi una wasongèle mu nkumbu antete,+ wau kulende matoko ko, nsukami yovo mvuama.
11 E mwan’ame, kumoni wonga ko. Ivanga mawonso ovovele,+ kadi wantu awonso mu mbanza* bazeye wo vo u nkento ambote.
12 Dialudi vo i nkûdi,+ kansi vena ye nkûdi akaka una vo i yitu undutidi o finama.+
13 Kala vava mu fuku wau, avo okukûla muna mene, ke diambu ko! Yambula kakûla. Kansi avo kakudidi ko, ndidi e ndofi muna Yave wa Nzambi amoyo, omono kibeni ikukûla.+ Leka ovava yavana o kuma kukiá.”
14 Olele vana ndambu a tambi yandi yaku mene, ekolo kwakinu tombe osikamene kimana kalembi moneka kwa wantu. I bosi, Boaze ovovele vo: “Ke muntu ko ofwete wo zaya vo nkento wizidi oku bundilu.”
15 Ovovele diaka vo: “Twasa o nzak’aku, yalumuna wo.” Oyalumwini wo, osidi vo nzongo sambanu* mia bale yo kumvana mio, i bosi Boaze wele kuna mbanza.
16 Rute ovutukidi kwa kô wandi, o kô wandi umvovese vo: “E mwan’ame, o mambu masikidi e?”* Umvovese mawonso Boaze kavangidi kwa yandi.
17 Ovovele vo: “Nzongo sambanu mia bale kampene, umpovese mpe vo: ‘Kwendi moko mankatu ko kwa kô waku.’”
18 Muna kuma kiadi, Naomi ovovele vo: “E mwan’ame, vingila vava yavana ozaya una ufokokela e diambu, kadi o muntu ke vunda ko yavana kesingika e diambu diadi o unu.”
Mvovo vana yand'a lukaya
^ Yovo “yunga kiaku.”
^ Yovo “nswiku a yunga kiaku.”
^ Mvovo wa sina: “vitu diawonso dia nkangu ame.”
^ Mvovo wa sina: “U nani?”
