Sefaniya 1:1-18
1 Ediadi i diambu dia Yave dina katambula o Sefaniya* wa mwan’a Kusi, wa mwan’a Ngedaleya, wa mwan’a Amareya, wa mwan’a Kizekeya, muna lumbu ya Yosiya+ wa mwan’a Amone,+ wa ntinu a Yuda:
2 “Ifwasa e mvimba yawonso ina ova nza,” u kavovele o Yave.+
3 “Ifwasa o muntu ye bulu.
Ifwasa e nuni za zulu ye mbizi za kalunga.+
Ifwasa masakuba*+ kumosi ye yimpumbulu;Ivempola wantu ova ntoto,” u kavovele o Yave.
4 “Nlambula koko kwame mu fwasa e YudaYe nkangu awonso a Yerusaleme,Ifwasa e mvimba e nsadiswa za Bale ova fulu kiaki,+E nkumbu za nganga za nzambi zaluvunu kumosi ye nganga zaluvunu vana vena nkangu ame,+
5 Ye awana befukamenanga e vu kia zulu vana nludi mia nzo,+Awana befukamanga yo dia ndofi ya sambila kaka Yave+Ekolo bedianga mpe ndofi ya sambila kaka Malekame;+
6 Awana bayambwidi landa Yave+Ye awana ke bevavanga Yave ko ngatu kunyuvula.+
7 Nukala e pi-i vana ndose a Mfumu Yave, kadi e lumbu kia Yave kifinamene.+
Yave okubikidi kimenga; osambwidi awana kabokele.
8 “Muna lumbu kia kimenga kia Yave, itá mbalu ye akuluntu,Yo wan’a ntinu,+ ye awonso bevuatanga e mvuatu mia kinzenza.
9 Muna lumbu kiakina, itá mbalu ye awonso bemantanga vana ntend’a nkongolo,*Awana bezadisanga e nzo za mfumu zau yo umpumbulu yo luvunu.
10 Muna lumbu kiakina,” u kavovele o Yave,“Mukala kazu tuka kuna Vitu* dia Mbizi za Maza,+Dilu tuka kuna belo kiampa muna mbanza,+Ye mazu mangolo tuka kuna miongo.
11 Nudila, oyeno esi Makatesi,*Kadi akiti awonso bafukisu;Awonso betezanga e palata bafwasilu.
12 Muna lumbu kiakina, isatulula Yerusaleme ye mini,Itá mbalu ye minkondwa ntokani,* ana bevovanga muna ntima miau vo,‘Yave ke vanga diambote ko, ke vanga mpe diambi ko.’+
13 Mavua mau mesanzwa, e nzo zau zifwaswa.+
Betunga nzo, kansi ke bekala mo ko;Bekuna mpatu za vinyu, kansi ke benua mo vinyu ko.+
14 E lumbu kia Yave kifinamene!+
Kifinamene, mu nzaki kikwizilanga!+
E zú dia lumbu kia Yave dia ndudi.+
Muna lumbu kiakina o kesa okaza.+
15 E lumbu kiaki, lumbu kia makasi,+Lumbu kia mpasi ye kia wonga,+Lumbu kia tembwa kiangolo yo lufwasu,Lumbu kia tombe yo lomboka,+Lumbu kia matuti ye tombe kiangolo,+
16 Lumbu kia sika mpungi ye kazu kia vita,+Lumbu kia lufwasu lwa mbanza zangolo ye mayingidilu mazanguka.+
17 Imwesa wantu e mpasi,Bekangala nga mpofo,+Kadi Yave basumukini.+
O menga mau meyitilwa nga mbundukutu a ntoto,E nitu* zau nga mvindu a vumu.+
18 E palata yo wolo wau ke ukubavuluza ko muna lumbu kia makasi ma Yave;+O ntoto wawonso uziniswa muna tiya twa vema kwandi,+Kadi otwasa lufwasu, lufwasu lwangolo kwa wantu awonso ova nza.”+
Mvovo vana yand'a lukaya
^ Ina ye nsasa vo: “Yave Oswekele (Olundidi).”
^ Dilenda kala vo salu yovo lekwa ina ngwizani ye nsambil’a teke.
^ Yovo “kun’evovelo.” Nanga vana vasiwanga e kunda kia ntinu.
^ Yovo “mwelo ampwena.”
^ Dilenda kala vo belo kia Yerusaleme kiakala lukufi ye Vitu dia Mbizi za Maza.
^ Mvovo wa sina: “awana bekangamanga muna maboto mau,” nga muna mvungu a vinyu.
^ Mvovo wa sina: “ndia.”
