Kwa Tito 2:1-15
2 Vo i ngeye, kwamanana vova mambu mena e ngwizani ye longi diavimpi.*+
2 Akala anunu bafwete kala akwa volo muna mawonso, akwa zitu, akwa lulungalalu, akumama muna lukwikilu, muna zola, muna luzindalalu.
3 Akento anunu mpe diau dimosi, bafwete kala akwa vumi muna fu yau, ke akumbi ko, ngatu bundunua kwa vinyu yayingi, kansi alongi a mambu mambote,
4 kimana balonga* ndumba bazolanga akazi au, bazola mpe wan’au,
5 bakala alungaladi, avelela, akwa fululu muna salu ya nzo,* akwa fu yambote, basakalelanga akazi au+ kimana e diambu dia Nzambi dialembi tiangunua.
6 Diau dimosi mpe, kasakesanga matoko bakala akwa lulungalalu,+
7 ongeye kibeni kala se mbandu a mavangu mambote muna mambu mawonso. Longa oma mavelela kuna zitu wawonso,+
8 sadilanga mvovo miambote mina ke milendi tumbwa ko,+ kimana atantu bamona e nsoni, balembi kala ye diambu diambi bevova mu kuma kieto.+
9 E ntaudi balemvokelanga mfumu zau muna mambu mawonso+ yo kubayangidika, ke bafilani yau mpaka ko,
10 ngatu kubayiya,+ kansi basonga vo bafwana kikilu bundwa e vuvu, kimana muna mambu mawonso baviengesa e longi dia Nzambi wa Mvuluzi eto.+
11 Kadi e nkenda za Nzambi zisengomokene yo twasa luvuluzu kwa wantu a mpila zawonso.+
12 Zikutulonganga vo twatina e fu kia lembi vumina Nzambi ye zolela ya nza,+ twakala yo lulungalalu yo unsongi yo vumina Nzambi mu tandu* kiaki,+
13 wau tuvingilanga e nsambu za vuvu kieto+ yo lusengomoko lwa nkembo a Nzambi anene yo Mvuluzi eto Yesu Kristu,
14 ona wakivana mu kuma kieto,+ kimana katukûla+ muna umpumbulu wawonso, kayivelelesela o nkangu andi akivuila, akwa vema muna mavangu mambote.+
15 Kwamanana vova mambu mama, wondelela* yo tumba kuna wisa kiawonso.+ Kuyambula ko vo muntu kaveza.
Mvovo vana yand'a lukaya
^ Yovo “diambote; diamfunu.”
^ Yovo “baludika.”
^ Yovo “balunga-lunganga e nzo zau.”
^ Tala Nsas’a Mvovo.
^ Yovo “kasakesa.”
