Tuku 15:1-21
15 Vava mambu mama maviokele, e diambu dia Yave dizidi kwa Abarama muna mona-meso, oku vo: “Kumoni wonga ko+ e Abarama. Mono i ngubu aku.+ O nsendo aku wanene kikilu ukala.”+
2 Abarama ovutwidi vo: “E Mfumu Yave, nki okumpana, wau vo yamu wau kina yo mwana ko, o muntu nkutu ovua e nzo ame i Elieze+ wa musi Damaseke?”
3 Abarama okudikidi vo: “Kumpene mbongo+ ko, selo kia* nzo ame okala se mvingidi a vua diame.”
4 Kansi Yave umvutwidi vo: “O muntu ndioyo kekala mvingidi a vua diaku ko, o mwan’a ngeye kibeni* yandi okala se mvingidi a vua diaku.”+
5 Nzambi ovaikisi Abarama kuna mbazi yo kumvovesa vo: “Dodokolo, tala kuna zulu watanga e ntetembwa, kana vo olenda wo vanga.” I bosi umvovese vo: “E mbongo aku i wau wuwu ikituka.”+
6 Abarama okwikidi muna Yave,+ Nzambi umbadikidi vo muntu ansongi.+
7 I bosi, Nzambi okudikidi vo: “Mono i Yave, ona wavaikisa muna Ure ya Akaladi muna kuvana e nsi yayi se vua diaku.”+
8 Muna diadi, Abarama oyuvuidi: “E Mfumu Yave, aweyi izayila vo ivua e nsi yayi?”
9 Nzambi umvutwidi vo: “Wenda kumbakila mwan’a ngombe ankento wa mvu ntatu, nkombo ankento a mvu ntatu, meme dia koko dia mvu ntatu, mbwela mosi ye nsweswe a yembe.”
10 Abarama obakidi bulu yayi yawonso, ozengele yo vana kati, osidi konso ndambu mantalani ye yankaka, kansi e nuni kazengele zo ko.
11 I bosi, e nuni zidianga e nsuni ziyantikidi kulumuka vana bulu yafwa, kansi Abarama okwamanene zo yinganesa.
12 Ekolo e ntangwa yadimukanga, Abarama olele e wosola kia tulu, tombe kiangolo ye kiansisi kimbwididi.
13 I bosi, Nzambi ovovese Abarama vo: “Zaya wo vo e mbongo aku ikala se nzenza muna nsi angani, o nkangu a nsi yayina ukubabunduna yo kubabangika mu mvu 400.+
14 Kansi, fundisa ifundisa e zula kina kikubabunduna,+ i bosi bevaika mo yo ulolo wa mavua.+
15 Vo i ngeye, ofwa muna luvuvamu ye kinunu kiafwana yo zikwa kumosi ye akulu aku.+
16 Kansi, muna mbandu ina ya nyá, e mbongo aku ivutuka mu nsi yayi,+ kadi e ntangw’a tumba Aneyamore ke yafwene ko.”+
17 Vava e ntangwa yadimuka, o kuma kwabukama e tombe, vamonekene ziku diafwitanga e mwisi ye mini kialemanga, kiviokele vana kati kwa tini ya bulu.
18 Muna lumbu kiakina, Yave okangidi e kangu+ yo Abarama, ovovele vo: “Ivana e nsi yayi+ kwa mbongo aku, tuka kuna nzadi a Engipito yakuna nzadi anene, e nzadi a Uferate:+
19 e nsi ya Anekene,+ Anekenazi, Anekademo,
20 Anekete,+ Aneperese,+ Anerefa,+
21 Aneyamore, Anekenani, Anengirengase ye Aneyebuse.”+
