Tuku 17:1-27
17 Vava Abarama kakala ye mvu 99, Yave omonekene kwa Abarama yo kumvovesa vo: “Mono i Nzambi a Mpungungolo. Kangalela muna nzila zame yo songa vo u nkwa ziku.*
2 Tatidila itatidila e kangu diame yo ngeye,+ wokesa kikilu iwokesa e mbongo aku.”+
3 Abarama ofukamene yo bokeka o lose, Nzambi okwamanene kumvovesa vo:
4 “Tala, e kangu diame dina yaku,+ okituka e se dia zula yayingi.+
5 Kubokelelwa diaka Abarama* ko, e nkumbu aku ikala Abarayama,* kadi ikukitula e se dia zula yayingi.
6 Wokesa iwokesa e mbongo aku yo kitula yo se zula yayingi, omo ngeye muvaika atinu.+
7 “Lunda ilunda e kangu diame nkangidi yo ngeye+ ye mbongo aku ye mbandu zikubalanda, dikala se kangu diakwele mvu, kimana yakala se Nzambi kwa ngeye ye kwa mbongo aku.
8 Ongeye ye mbongo aku ikulandila, ikunuvana e nsi ozingilanga se nzenza+—e nsi yawonso ya Kenani—se vua dia mvu ya mvu, omono ikala Nzambi au.”+
9 Nzambi ovovese diaka Abarayama vo: “Vo i ngeye, ofwete lunda e kangu diame, ongeye ye mbongo aku ye mbandu zikubalandila.
10 Ediadi i kangu diame yo ngeye, dina ngeye ye mbongo aku nulunda: O wan’amakala awonso vovo nuina bafwete zengwa.+
11 Nufwete zengwa kutu yeno, ekiaki kikala se sinsu kia kangu diame yo yeno.+
12 Muna mbandu zeno zawonso, konso mwan’ayakala vovo nuina kafwete zengwa+ muna lumbu kianana kia zingu kiandi, konso ona owutukidi muna nzo ye konso ona una vo ke mbongo aku ko, kansi wasumbilwa muna nzimbu kwa nzenza.
13 Konso mwan’ayakala owutukìdi muna nzo aku ye konso mwan’ayakala wasumbilwa muna nzimbu zaku, kafwete zengwa.+ E kangu diame omu nitu zeno, dikala se kangu dia mvu ya mvu.
14 Konso yakala olembi zengwa e kutu kiandi, kafwete vondwa vana vena o nkangu ame. Kadi kangu diame kakulwidi.”
15 I bosi, Nzambi ovovese Abarayama: “Vo i nkaz’aku Sarai,*+ kumbokelela diaka Sarai ko, kadi owau e nkumbu andi Sara.*
16 Ikunsambula, muna yandi ikuvanina mwan’ayakala;+ ikunsambula yo kunkitula se zula yayingi; muna yandi muvaika ntinu mia nkangu.”
17 Abarayama ofukamene yo bokeka o lose, oyantikidi seva yo vova muna ntim’andi+ vo: “Nga e yakala dia mvu 100 olenda wuta diaka mwana? Nga Sara olenda wuta,+ wau kena ye 90 lwa mvu e?”
18 Abarayama ovovese Nzambi aludi vo: “Dodokolo, sambula Yisemaele!”+
19 Muna kuma kiaki, Nzambi ovovele vo: “O nkaz’aku Sara okuwutila mwan’ayakala, umvana e nkumbu Isaki.*+ Ikanga yandi e kangu diame, se kangu dia mvu ya mvu ye mbongo ikunlandila.+
20 Vo i Yisemaele, ngwidi mana ovovele. Tala, sambula ikunsambula yo kumvana wana, wokesa kikilu iwokesa e mbongo andi. Muna yandi muvaika akuluntu 12, ikunkitula se zula kianene.+
21 Kansi, ikanga e kangu diame yo Isaki,+ ona o Sara kekuwutila muna nsungi yayi muna mvu ukwiza.”+
22 Nzambi vava kamene mokena yandi, okatukidi vana vena Abarayama.
23 Abarayama obongele mwan’andi Yisemaele yo wan’amakala awonso bawutukila muna nzo andi ye awonso kasumbila muna nzimbu, wan’amakala awonso a nzo ya Abarayama, ubazengele kutu yau muna lumbu kiakina, nze una Nzambi kamvovesa.+
24 Abarayama mvu 99 kakala miau vava kazengwa e kutu kiandi.+
25 O mwan’andi Yisemaele mvu 13 kakala miau vava kazengwa e kutu kiandi.+
26 Muna lumbu kiakina, Abarayama yo Yisemaele wa mwan’andi bazengwa.
27 O wan’amakala awonso a nzo andi, konso ona wawutukila muna nzo ye konso ona wasumbilwa muna nzimbu kwa nzenza, bazengwa kumosi yo yandi.
Mvovo vana yand'a lukaya
^ Yovo “wakondwa e tumbu.”
^ Ina ye nsasa vo: “O Se Otundidikilu (Ozangikilu).”
^ Ina ye nsasa vo: “Se dia Nkangu; Se dia Ndonga.”
^ Ina ye nsasa vo: “Mwan’a Nkento a Ntinu.”
^ Nanga ina ye nsasa vo: “Nkwa Ntatani.”
^ Ina ye nsasa vo: “Tusevo.”
