Tuku 21:1-34
21 Yave ovutwidi e sungididi kiandi kwa Sara nze una kavova, Yave ovangidi kwa Sara dina kasia o nsilu.+
2 Sara oyimiti,+ owutidi Abarayama mwan’ayakala muna kinunu kiandi, muna ntangwa ina Nzambi kasila o nsilu.+
3 Abarayama oyikidi o mwana kanwutidi o Sara vo Isaki.+
4 Abarayama ozengele Isaki wa mwan’andi vava kalungisa lumbu nana, wauna o Nzambi kankanikina.+
5 Abarayama mvu 100 kakala miau vava kawutilwa Isaki wa mwan’andi.
6 I bosi, Sara ovovele vo: “Nzambi umpen’e kuma kia sevela; wantu awonso bewá wo beseva yame.”*
7 Sara okudikidi vo: “Nani wayindulanga wo vo: ‘Sara wa nkaz’a Abarayama wadi yemeka wana’? Kansi, inwutìdi mwan’ayakala muna kinunu kiandi.”
8 O mwana okolele yo tauka. Abarayama ovangidi lambu dianene muna lumbu kina Isaki katauka.
9 Kansi, Sara wamonanga vo mwan’a Anga+ wa musi Engipito ona kawutila Abarayama, wasakanenanga Isaki.+
10 Muna kuma kiaki, ovovese Abarayama vo: “Yinga ntaudi ankento ndioyu yo mwan’andi, kadi o mwan’a ntaudi ndioyu ke kala mvingidi a vua ko kumosi yo Isaki wa mwan’ame.”+
11 Kansi, dina kavovele mu kuma kia mwan’andi dikendelekele Abarayama.+
12 Nzambi ovovese Abarayama vo: “Kukendalala ko mu dina Sara kavovese mu kuma kia mwana ye mu kuma kia ntaudi aku ankento. Wá e mvovo miandi,* kadi ina iyikilwa vo mbongo aku muna Isaki+ ituka.
13 Vo i mwan’a ntaudi akento,+ ikunkitula mpe se zula,+ wau kena vo mbongo aku.”
14 Abarayama osikamene muna menemene, obongele mbolo ye nsaku* a maza ovene yo kwa Anga. Unsidi yo vana vembo, unsindikidi kumosi yo mwana.+ Anga wele, oyantikidi yungana muna makanga ma Bere-seba.+
15 I bosi, o maza muna nsaku mamene, osisidi o nleke kuna nsi a finti.
16 Wele vuanda va fulu ki’ankaka, tini kilenda tubwa e nzanza, kadi edi kavovele vo: “Kizolele mona mwana ko vava kefwa.” Ovavukidi kwandá yo bokomoka ye dilu.
17 Nzambi owidi e nding’a nleke,+ o mbasi a Nzambi obokele Anga tuka kuna zulu. Umvovese vo:+ “Nkia diambu una diau e Anga? Kumoni wonga ko, kadi Nzambi owidi e nding’a nleke vana kena.
18 Telama, zangula o nleke yo kunsimba muna koko, kadi ikunkitula se zula kianene.”+
19 Nzambi untemwene meso, omwene sima kia maza. Wele kûna, ozadisi e nsaku ye maza, onuikini o nleke.
20 Nzambi okedi yo nleke+ ekolo kakudidinge. Ozingidi muna makanga, okitukidi se nkongo a nzanza.
21 Okedi muna makanga ma Parani,+ o ngudi andi umbongele nkento muna nsi ya Engipito.
22 Muna kolo kiakina, Abimeleke kumosi yo Fikole wa mfumu a makesa mandi bavovese Abarayama vo: “Nzambi una yaku muna mambu mawonso ovanganga.+
23 Owau, undila e ndofi ova meso ma Nzambi vo kukumvunginika ko, kuvunginika mpe wan’ame ko ye atekelo ame. O walakazi una yasonga, i wau mpe osonga kwa mono ye kwa nkangu a nsi ozingilanga se nzenza.”+
24 Abarayama ovovele vo: “Ndidi e ndofi.”
25 Kansi, Abarayama otumbidi Abimeleke mu kuma kia sima kia maza kina e ntaudi za Abimeleke bakutumuna.+
26 Abimeleke ovutwidi vo: “Kizeye ko kana nani wavangidi wo; ongeye kwanzayisi wo ko, kiawidi diambu ko yamu unu.”
27 Muna diadi, Abarayama obongele mameme ye ngombe ovene zo kwa Abimeleke, yau wole bakangidi e kangu.
28 Vava Abarayama kavambwidi wana nsambwadi a mameme ankento muna kambi,
29 Abimeleke oyuvuidi Abarayama vo: “Ekuma ovambulwidi wana nsambwadi awaya a mameme?”
30 Abarayama ovutwidi vo: “Ongeye otambula wana nsambwadi a mameme ankento ova koko kwame se kimbangi vo mono yatima e sima kiaki.”
31 Ekiaki i kuma kayikidi e fulu kiaki vo Bere-seba,*+ kadi i vau badididi e ndofi.
32 Vava bakangidi e kangu+ vana Bere-seba, Abimeleke yo Fikole wa mfumu a makesa mandi, bavutukidi kuna nsi ya Afelesetia.+
33 I bosi, Abarayama okunini nti a tamareseke vana Bere-seba, i vana kavovele nkumbu a Yave+ wa Nzambi a mvu ya mvu.+
34 Abarayama okele* muna nsi ya Afelesetia mu kolo kiandá.*+
Mvovo vana yand'a lukaya
^ Nanga, “bekunseva.”
^ Mvovo wa sina: “nding’andi.”
^ Nsaku yavangilwanga muna nkand’a bulu.
^ Ina ye nsasa vo: “Sima kia Ndofi; Sima kia Nsambwadi.”
^ Yovo “okele se nzenza.”
^ Mvovo wa sina: “lumbu yayingi.”
