Tuku 45:1-28
45 Vava Yosefe kawidi e mvovo miami, kalendele diaka kanga ntima ko vana vena selo yandi yawonso.+ Muna kuma kiaki, okazidi vo: “Nuvaika yeno awonso!” Ke vasala muntu ko vava Yosefe kayisunzula kwa mpangi zandi.+
2 Obokomokene ye dilu, esi Engipito bawidi e dilu kiandi, e nzo a Faro mpe bawidi wo.
3 I bosi, Yosefe ozayisi mpangi zandi vo: “Mono i Yosefe. Nga o se diame wakinu o moyo e?” Kansi, e mpangi zandi ke balendele kumvana mvutu ko, kadi bazakamene mu kuma kiandi.
4 Muna kuma kiaki, Yosefe ovovese mpangi zandi vo: “Dodokolo, nufinama oku ngina.” Bamfinamene.
I bosi, ovovele vo: “Mono i Yosefe wa nlek’eno, ona nuateka kwa esi Engipito.+
5 Owau ke nukendalala ko, ke nutumbi muntu yo nkwandi ko wau nuanteka kwaku; kadi Nzambi wampitisa ku ntwal’eno muna vuluza mioyo mieno.+
6 Owau i mvu wanzole wa mvengele omu nsi,+ mvu ntanu misidi, ke mu kunua ko ngatu kutika.
7 Kansi, Nzambi wampitisa ku ntwal’eno kimana nuakala ye nsadiswa+ ova ntoto,* yo tanina mioyo mieno muna mpuluz’anene.
8 Ozevo, ke yeno ko nuamfila okwaku, kansi Nzambi aludi, kimana kantumbika se nludiki antete* kwa Faro ye mfumu muna nzo andi yawonso yo yala e nsi yawonso ya Engipito.+
9 “Nuvutuka mu nzaki kwa se diame, nunzayisa vo: ‘I wau wuwu kavovele o mwan’aku Yosefe: “Nzambi wantumbika se mfumu omu Engipito yawonso.+ Kulumuka oku ngina. Kuzingidi ko.+
10 Okala muna nsi a Ngosene,+ kimana wakala yame lukufi—ongeye, wan’aku ye atekolo aku ye mameme maku ye ngombe zaku ye lekwa yawonso una yau.
11 I kûna ikuvanina madia, kadi mvu ntanu mia mvengele misidi.+ Avo ke nuvangidi wo ko, ongeye ye nzo aku sukama nusukama, yawonso luna yau ifokoka.”’
12 Oyeno yo nleke ame Benyamini, owau nuyimwenene muna meso ma yeno kibeni vo i mono kikilu ivovananga yeno.+
13 Nusamuna kwa se diame e tunda diawonso ngina diau omu Engipito ye mawonso numwene. Owau, nuzabuka yo twasa se diame okwaku.”
14 Obimbanene yo* Benyamini wa nleke andi, oyantikidi dila, Benyamini mpe umbimbakene,+ odididi.
15 Yosefe ofibidi mpangi zandi zawonso, odididi ekolo kababimbakenenge. I bosi, mpangi zandi bamokene yandi.
16 E nsangu zilweke kuna nzo a Faro, oku vo: “E mpangi za Yosefe zizidi!” Ediadi diyangidikidi Faro ye selo yandi.
17 Muna kuma kiaki, Faro ovovese Yosefe vo: “Zayisa mpangi zaku basia e lekwa vana ntandu a bulu yau yo kwenda kuna nsi ya Kenani,
18 babonga o se dieno y’esi nzo eno yo kwiza oku ngina. Ikunuvana lekwa yambote ya nsi ya Engipito, nudia eyi isundidi o wete* mu nsi.’+
19 Ikanikini wabazayisa vo:+ ‘I wau wuwu nuvanga: Nubonga makalu+ ma nsi ya Engipito mu kuma kia wan’eno ye akento eno, nuatwasa se dieno muna dimosi muna makalu yo kwiza yandi kwaku.+
20 Ke nutokani ko mu kuma kia lekwa yeno,+ kadi e lekwa isundidi o wete ya nsi yawonso ya Engipito i yeno.’”
21 I wau wuwu bavangidi o wan’a Isaele, Yosefe ubavene makalu wauna kakanikini o Faro, ubavene ma kia dia muna nkangalu.
22 Ovene mvuatu kwa konso muntu muna yau, kansi kwa Benyamini ovene 300 za sekele za palata ye mvuatu ntanu.+
23 Kuna kwa se diandi otwikidi lekwa eyi: Mabuluku kumi mazala ye lekwa yambote ya Engipito, mabuluku kumi mankento manete witi ye mbolo ye madia mankaka mana se diandi kevua o mfunu muna nkangalu.
24 Yosefe osindikidi e mpangi zandi, ekolo bayendanga ubavovese vo: “Ke nuzonzi ko muna nzila.”+
25 Bakatukidi kuna Engipito yo lwaka kwa Yakobo wa se diau kuna nsi ya Kenani.
26 Bansamunuini vo: “Yosefe wakinu o moyo, yandi i mfumu muna nsi yawonso ya Engipito!”+ Kansi, kasidi dio mu ntima ko, kadi kabakwikidi ko.+
27 Ekolo bekunzayisanga mawonso mana Yosefe kabavovese yo mona makalu mana Yosefe katwikidi muna kunata, o Yakobo wa se diau oyanzidi diaka.*
28 Isaele okazidi vo: “Owau nkwikidi! O Yosefe wa mwan’ame wakinu o moyo! Mfwete kwenda yo monana yandi ekolo kiafwidi ko!”+
Mvovo vana yand'a lukaya
^ Yovo “omu nsi.”
^ Mvovo wa sina: “kankitula se se.”
^ Mvovo wa sina: “Ozingalakene muna nsingu a.”
^ Yovo “mazi.”
^ Mvovo wa sina: “o mwand’a Yakobo wa se diau ufulukidi diaka.”
