Yeremiya 20:1-18
20 O Paseku wa mwan’a Ime, ona wakala nganga ye mfidi muna nzo a Yave, owidi Yeremiya vava kasakwidi mambu mama.
2 I bosi, Paseku owende Yeremiya wa ngunza, unsidi muna nsuku*+ vana Vitu Diantandu dia Benyamini, muna nzo a Yave.
3 Kansi, e lumbu kina kialanda vava Paseku kakatula Yeremiya muna nsuku, o Yeremiya umvovese vo:
“Yave osobele e nkumbu aku, ke Paseku diaka ko, kansi Wonga Muna Fulu Yawonso.+
4 Kadi i wau wuwu kavovele o Yave: ‘Ikukitula se kuma kia wonga kwa ngeye kibeni ye akundi aku awonso, bebwila muna nsosolo a mbeni zau, o meso maku memona wo;+ iyekola Yuda yawonso vana moko ma ntinu a Babele, okubanata kuna kinkole kuna Babele yo kubavondela muna nsosolo.+
5 Iyekola umvuama wawonso wa mbanza yayi, tusalu twau twawonso, lekwa yau yantalu ye tusalu twawonso twa ntinu a Yuda vana moko ma mbeni zau.+ Bekubasanza yo kubabaka kimana babanata kuna Babele.+
6 Vo i ngeye, e Paseku ye awonso bena muna nzo aku, kuna kinkole nukwenda. Onatwa kuna Babele, i kûna ofwila, ozikwa ye akundi aku, kadi mambu ma luvunu ubasakulwidi.’”+
7 E Yave, ngeye umvunini, mvuninu.
Osongele vo ngolo zayingi una zau lutila mono yo kunsunda.+
Nkitukidi se kuma kia tusevo e lumbu kiamvimba;Awonso bekuntiangunanga.+
8 Kadi konso ntangwa ivova, ikaza, oku vo,“Nsoki yo lufwasu!”
Kadi kuna kwa mono, e diambu dia Yave dikitukidi se lusembo yo luvezo e lumbu kiawonso.+
9 I bosi mpovele vo: “Kikumvovela diaka ko,Ngatu vovela muna nkumbu andi.”+
Kansi muna ntim’ame, e diambu diaku dikitukidi nze tiya twanyuyi tuzikamene muna visi yame,Ngioyele wau nswekele dio;Kilendi dio zizidila ko.+
10 Kadi ngwidi makumbu mayingi bakumbidi;O wonga unzungidi.+
“Numfunda; yambula twamfunda!”
Awonso ana bampavidi luvuvamu, bavingidi vo yabwa:+
“Nanga se kavanga o bi muna uzowa,Tulenda kunsunda yo kunlanda e kunda.”
11 Kansi, Yave okedi yame nze kesa diakondwa wonga.+
I dianu vo awana bekumbangikanga, sakuba beta, ke besunda ko.+
Befusulwa kikilu e nsoni, kadi ke besikila ko.
O luvezo lwau lwakwele mvu, ke lulendi vilakanua ko.+
12 Vo i ngeye, e Yave a vu, ngeye ofimpanga nkwa unsongi;Omonanga nsi a mbundu yo ntima.+
Yambula yamona e kunda olanda muna yau,+Kadi kwa ngeye ngiekekele mfundu ame.+
13 Nuyimbidila Yave! Nukembelela Yave!
Kadi ovuluzi nsukami vana moko ma yimpumbulu.
14 Kiasibwa e lumbu kina yawutuka!
Yambula kialembi sambulwa e lumbu kina o ngudi ame kanguta!+
15 Wasibwa o muntu ona watwasa nsangu kwa se diame, oku vo:
“Mwan’aku owutukidi, mwan’ayakala!”
Kiese kiayingi kantwasidi.
16 O muntu ndioyo yambula kakituka nze mbanza zina Yave kafwasa kondwa kwa nkenda.
Yambula kawá kazu kia mene-mene ye mpungi a vita muna midi.
17 Ekuma kalembi kumpondela muna vumu kia ngudi ame,Kimana e vumu kiandi kiakala se ziami kiame,Kakala wayimita yakwele mvu?+
18 Ekuma yavaikila muna vumu?
Nga yamona kaka e mpasi ye ntantu,Yo manina e lumbu yame muna nsoni?+
Mvovo vana yand'a lukaya
^ Yovo “ku.”
