Yeremiya 26:1-24
26 Muna lubantiku lwa luyalu lwa Yoyakime+ wa mwan’a Yosiya, wa ntinu a Yuda, e diambu dia Yave dizidi, oku vo:
2 “I wau wuwu kavovele o Yave: ‘Telama vana yanzala kia nzo a Yave, vova kwa Ayuda awonso ana bekwiza sambilanga omu nzo a Yave. Ubavovesa mambu mawonso ikanikini; kukondesa diambu ko.
3 Nanga bewá, beviluka konso muntu muna nzil’andi ambi, ozevo omono yavutuka manima* muna mbi ina nkanini kubatwasila muna kuma kia mavangu mau mambi.+
4 Ubavovesa vo: “I wau wuwu kavovele o Yave, ‘Avo ke nukungwila ko nualanda nsiku* una yasia vovo nuina,
5 nuawila mambu ma ntaudi zame angunza, ana itumanga kwa yeno ntangwa ke ntangwa,* kansi oyeno ke nubawididi ko,+
6 ozevo ikitula nzo yayi nze Silo,+ e mbanza yayi se sibu kwa zula yawonso ya nza.’”’”+
7 Anganga y’angunza yo nkangu wawonso bawidi Yeremiya wau kevovanga mambu mama muna nzo a Yave.+
8 Yeremiya vava kamana vova mawonso kankanikina o Yave vo kavovesa nkangu wawonso, anganga y’angunza yo nkangu wawonso bambakidi, oku vo: “Fwa kikilu ofwa.
9 Ekuma osakulwidi muna nkumbu a Yave, oku vo: ‘E nzo yayi ikituka nze Silo, e mbanza ifwaswa yo kondwa wantu’?” O nkangu wawonso uzungidi Yeremiya muna nzo a Yave.
10 Akuluntu a Yuda vava bawidi mambu mama, batombokele tuka kuna nzo a* ntinu yakuna nzo a Yave, bavuende vana nkotelo a vitu diampa dia nzo a Yave.+
11 Anganga ye angunza bavovele kwa akuluntu yo nkangu wawonso vo: “O muntu ndioyu tumbu kia lufwa kimfwene,+ kadi osakwidi e mbi mu kuma kia mbanza yayi nze una nuwidi muna matu meno.”+
12 I bosi, Yeremiya ovovese akuluntu awonso ye nkangu awonso, oku vo: “Yave untumini yasakula mu kuma kia nzo yayi ye mbanza yayi mambu mawonso mana nuwidi.+
13 Owau, nusingika e nzila zeno ye mavangu meno, nulemvokela nding’a Yave wa Nzambi eno, o Yave ovutuka manima* muna mpasi zina kakanini kunutwasila.+
14 Avo i mono, va moko meno ngina. Numpanga konso dina numwene vo diambote ye diansongi vana meso meno.
15 Kansi nuzaya wo vo, avo numpondele, menga ma munkondwa-kuma nutwasa muna ntu mieno, muna mbanza yayi ye muna ntu mia nkangu andi, kadi i ludi, Yave untumini kwa yeno yavova mambu mama mawonso muna matu meno.”
16 I bosi, akuluntu ye nkangu wawonso bavovese anganga ye angunza vo: “Muntu ndioyo kafwanukini tumbu kia lufwa ko, kadi mu nkumbu a Yave wa Nzambi eto katuvovesele.”
17 I bosi, mutelamene ankaka muna akuluntu a nsi, bavovese nkutakani a nkangu vo:
18 “Mika+ wa musi Morasa wasakula muna lumbu ya Kizekeya+ wa Ntinu a Yuda, wavova kwa nkangu awonso a Yuda vo: ‘I wau wuwu kavovele o Yave a vu:
“E Zione ivatwa nze mpatu,Yerusaleme ikituka se mazudika ma mazumbu,+O mongo a Nzo* ukituka nze kundubulu muna mfinda.”’+
19 “Nga Kizekeya wa Ntinu a Yuda yo nkangu wawonso a Yuda bamvonda? Nga kavumina Yave ko yo vava e dienga dia Yave, kimana Yave kavutuka manima* muna mpasi zina kavovela vo okubatwasila zo?+ I dianu vo, mpasi tuzolele kuyitwasila.
20 “Vakala mpe ye muntu wasakula muna nkumbu a Yave, Ureya wa mwan’a Semaya wa musi Kireyate-yarimi,+ ona wasakula e mbi mu kuma kia mbanza yayi ye nsi yayi nze mambu ma Yeremiya.
21 O Yoyakime wa Ntinu+ yo makesa mandi mawonso, ye akuluntu awonso vava bawidi mambu mandi, o ntinu obakidi nzengo za kumvonda.+ Ureya vava kawidi wo, vana vau obakamene kwa wonga, otinini, wele kuna Engipito.
22 I bosi, Yoyakime wa Ntinu, otumini Elenatane+ wa mwan’a Akebo ye wantu ankaka bakedi yandi kuna Engipito.
23 Bavaikisi Ureya kuna Engipito, bantwese kwa Yoyakime wa Ntinu ona umvondele muna nsosolo,+ otubidi e vimbu diandi muna ziami kia mpasi wantu.”
24 Kansi, Akikami+ wa mwan’a Safani+ oyikamene Yeremiya kimana kalembi yekolwa vana moko ma nkangu yo vondwa.+
Mvovo vana yand'a lukaya
^ Yovo “ikuyibanza.”
^ Yovo “luludiku.”
^ Mvovo wa sina: “ibundumunanga muna mene-mene yo kubatuma.”
^ Yovo “lûmbu lwa.”
^ Yovo “okuyibanza.”
^ Yovo “mongo a tempelo.”
^ Yovo “kayibanza.”
