Yeremiya 27:1-22
27 Muna lubantiku lwa luyalu lwa Yoyakime wa mwan’a Yosiya, wa ntinu a Yuda, e diambu dia Yave dizidi kwa Yeremiya, oku vo:
2 “I wau wuwu kampovese o Yave: ‘Ukivangila tuvambu ye vangu, wasia yo muna nsingu aku.
3 I bosi twika yo kwa ntinu a Edome,+ ntinu a Moabe,+ ntinu a Aneyamone,+ ntinu a Turo+ ye ntinu a Sidone+ vana moko m’anati a nsangu ana bezidi ku Yerusaleme kwa Sedekiya wa Ntinu a Yuda.
4 Ubatuma bavovesa kwa mfumu zau vo:
“‘“I wau wuwu kavovele o Yave a vu, wa Nzambi a Isaele, i wau nufwete vova kwa mfumu zeno:
5 ‘Mono yavanga o ntoto, wantu ye bulu ina vana ntandu a ntoto muna nkum’ame anene ye muna koko kwame kwalambuka; ivana yo kwa konso ona iyangalela.*+
6 Owau, mpene nsi zazi zawonso vana moko ma Nebukandesa wa Ntinu a Babele wa selo kiame;+ imvene mpe bulu ya mfuta kimana yansadila.
7 E zula yawonso ikunsadila, isadila mpe mwan’andi ye ntekolo andi yavana ntangw’a nsi andi ifwana,+ vava zula yayingi ye ntinu mianene bekumbunduna.’+
8 “‘“‘Konso zula yovo kintinu ke kitonda sadila Nebukandesa wa Ntinu a Babele ko, ngatu sia nsingu zau kuna nsi a vangu kia ntinu a Babele, e zula kiakina itumba kio muna nsosolo,+ muna mvengele ye muna vuku,’* u kavovele o Yave, ‘yavana ikubafukisila muna koko kwandi.’
9 “‘“‘I dianu vo, ke nuwila ngunza zeno ko, nganga zeno za ngombo, aloti eno a ndozi, nganga zeno za mpandu, ye ndoki zeno, ana bekunuvovesanga vo: “Ke nusadila ntinu a Babele ko.”
10 Kadi luvunu besakulanga kwa yeno, muna kuma kiaki, nunatwa kwanda ye nsi eno, ikunumwanganesa yo kunufukisa emvimba.
11 “‘“‘Kansi, e zula kina kisia nsingu kuna nsi a vangu kia ntinu a Babele yo kunsadila, i kiau iyambula vo kiasala* muna nsi au,’ u kavovele o Yave, ‘bevata yo, bezingila mo.’”’”
12 Diau dimosi mpe mpovele kwa Sedekiya+ wa Ntinu a Yuda, oku vo: “Nusia nsingu kuna nsi a vangu kia ntinu a Babele, nunsadila ye nkangu andi, nuakwamanana zinga.+
13 Ekuma ofwete fwila yo nkangu aku muna nsosolo,+ muna mvengele+ ye muna vuku,+ wauna kavovele o Yave kwa zula kina ke kisadila ntinu a Babele ko?
14 Ke nuwe mambu m’angunza ko ana bekunuvovesanga vo: ‘Ke nusadila ntinu a Babele ko,’+ kadi luvunu bekunusakulwilanga.+
15 “‘Kadi kibatumini ko,’ u kavovele o Yave, ‘kansi, besakulanga luvunu muna nkumbu ame, muna kuma kiaki, ikunumwanganisa yo kunufukisa, yeno ye angunza ana besakulanga kwa yeno.’”+
16 Kuna kw’anganga ye nkangu awonso mpovele vo: “I wau wuwu kavovele o Yave: ‘Ke nuwila mambu ma ngunza zeno ko ana besakulanga kwa yeno, oku vo: “Ke kolo ko e salanganu ya nzo a Yave ivutulwa tuka kuna Babele!”+ Kadi luvunu besakulanga kwa yeno.+
17 Ke nubawila ko. Nusadila ntinu a Babele kimana nuakwamanana zinga.+ Ekuma mbanza yayi ifwete kitukila se zumbu?
18 Kansi, avo yau i ngunza ye diambu dia Yave dina yau, yambula badodokela Yave a vu kimana e salanganu ina yasala muna nzo a* Yave, muna nzo a ntinu a Yuda, ye muna Yerusaleme yalembi natwa kuna Babele.
19 “Kadi i wau wuwu kavovele o Yave a vu mu kuma kia malunzi,+ Kalunga,*+ makalu+ ye salanganu ina yasala muna mbanza yayi,
20 ina Nebukandesa wa Ntinu a Babele kasisa vava kayalula Yekoneya wa mwan’a Yoyakime, wa ntinu a Yuda muna Yerusaleme yo kunata kuna kinkole kuna Babele, kumosi y’akwa tunda a Yuda ye Yerusaleme;+
21 elo, i wau wuwu kavovele o Yave a vu, wa Nzambi a Isaele mu kuma kia salanganu ina yasala muna nzo a Yave, muna nzo a* ntinu a Yuda ye muna Yerusaleme:
22 ‘“Inatwa kuna Babele,+ i kuna ikala yavana ikubasia sungididi,” u kavovele o Yave. “I bosi itwasa yo, yo vutula yo muna fulu kiandi.”’”+
Mvovo vana yand'a lukaya
^ Mvovo wa sina: “ona mbwene vo wansongi.”
^ Yovo “mayela.”
^ Mvovo wa sina: “ikubavundisa.”
^ Yovo “lûmbu lwa.”
^ I sia vo, Kalunga kwa nsongo muna tempelo.
^ Yovo “lûmbu lwa.”
