Yeremiya 28:1-17
-
Yeremiya yo Kananiya wa ngunz’a luvunu (1-17)
28 Muna mvu wauna, muna lubantiku lwa luyalu lwa Sedekiya+ wa Ntinu a Yuda, muna mvu una wayá, muna ngonde yatanu, Kananiya wa ngunza wa mwan’a Azu wa musi Ngibone,+ umpovese muna nzo a Yave vana vena anganga ye nkangu wawonso, oku vo:
2 “I wau wuwu kavovele o Yave a vu wa Nzambi a Isaele: ‘Tolola itolola e vangu kia ntinu a Babele.+
3 Vava kilunga mvu miole,* ivutula va fulu kiaki e salanganu yawonso ya nzo a Yave ina Nebukandesa wa Ntinu a Babele kanata kuna Babele.’”+
4 “‘Itwasa Yekoneya+ wa mwan’a Yoyakime,+ wa ntinu a Yuda va fulu kiaki, ye nkangu awanso a Yuda ana banatwa muna kinkole kuna Babele,’+ u kavovele o Yave, ‘kadi tolola itolola e vangu kia ntinu a Babele.’”
5 I bosi, Yeremiya wa ngunza ovovese Kananiya wa ngunza vana vena anganga ye nkangu wawonso ana batelamene muna nzo a Yave.
6 Yeremiya wa ngunza ovovele vo: “Amen!* Yambula Yave kavanga wo! Yambula Yave kalunganesa mambu mana osakwidi vo ovutula e salanganu yawonso ya nzo a Yave va fulu kiaki ye nkangu una wanatwa kuna kinkole kuna Babele!
7 Owau, dodokolo, wá diambu diadi ivova muna matu maku ye muna matu ma nkangu wawonso.
8 Tuka kolo, e ngunza zina zavita, mono yo ngeye, basakula mu kuma kia nsi zayingi ye yimfumu yanene, mambu ma vita, mpasi ye vuku.*
9 Avo ngunza osakwidi oma ma luvuvamu ye diambu diandi dilungane, ozevo dizayakana vo ngunza ndioyo Yave kieleka wantuma.”
10 Muna diadi, Kananiya wa ngunza okatwidi e vangu muna nsingu a Yeremiya, otolwele kio.+
11 Kananiya ovovele vana vena nkangu wawonso vo: “I wau wuwu kavovele Yave, ‘I wau wuwu itololwela e vangu kia Nebukandesa wa Ntinu a Babele, ikatula kio muna nsingu za zula yawonso vava kilunga mvu miole.’”+ Yeremiya wa ngunza wele kwandi.
12 Vava Kananiya wa ngunza katolwele e vangu kiakala muna nsingu a Yeremiya wa ngunza, e diambu dia Yave dizidi kwa Yeremiya, oku vo:
13 “Wenda, vovesa Kananiya vo: ‘I wau wuwu kavovele o Yave: “Ongeye otolwele vangu kia nti,+ kansi ovanga e vangu kia sengwa vana fulu kiandi.”
14 Kadi i wau wuwu kavovele o Yave a vu, wa Nzambi a Isaele: “Vangu kia sengwa isia muna nsingu za zula yayi yawonso yasadila Nebukandesa wa Ntinu a Babele, oyau bafwete kunsadila.+ Ikumvana nkutu e bulu ya mfuta.”’”+
15 I bosi, Yeremiya wa ngunza ovovese Kananiya+ wa ngunza, oku vo: “Dodokolo, wá, e Kananiya! O Yave katumini ko, kansi ngeye ovukumuni nkangu wau wabunda e vuvu muna luvunu.+
16 Ozevo, i wau wuwu kavovele o Yave: ‘Katula ikukatula vana ntoto. O mvu wau fwa ofwa, kadi ovovese nkangu watelamena Yave.’”+
17 Muna kuma kiaki, muna ngonde yansambwadi ya mvu wauna, Kananiya wa ngunza wafwa.
Mvovo vana yand'a lukaya
^ Mvovo wa sina: “mvu mia lumbu.”
^ Yovo “Yambula diakala wowo!”
^ Yovo “mayela.”
