Yeremiya 3:1-25
3 Wantu bayuvuidi vo: “Avo yakala osindikidi nkaz’andi, o nkento mpe unyambwidi yo kwenda kwa yakala diankaka, nga o yakala diantete olenda kumvutukila diaka?”
Nga nsi yayina ke ifunzukidi ko e?+
“Ongeye wata zumba ye akala ayingi,+Owau nga wafwana vutuka diaka kwa mono?” u kavovele o Yave.
2 “Sengola meso kuna miongo miakondwa titi, watala.
Akweyi walembi lekelwa mu kingolo?
Wavuandanga vana ndambu a nzila muna kubavingila,Nze nyaluki* muna makanga.
Okwamanananga safula e nsiMuna zumba ye umpumbulu waku.+
3 Dianu vo e mvula zayingi zikakilu,+Muna nsungi a kintombo, e mvula nkatu.
Ongeye wakondwa e nsoni nze* nkento una vo nkembi;*Kumonanga nsoni ko.+
4 Owau umbokele, oku vo:
‘E Tata, u nkundi ame tuka muna kileke kiame!+
5 Nga ofwete lunda makasi yakwele mvu,Yovo fidititi yakwele mvu?’
I wau wuwu ovovele,Kansi okwamanene muna mavangu maku mambi.”+
6 Muna lumbu ya Yosiya wa Ntinu,+ Yave wampovesa vo: “‘Nga omwene dina divangidi Isaele wakondwa kwikizi? Otombokele muna miongo miawonso miandá, wele kuna nsi a nti miawonso miasavuka muna tá zumba.+
7 Kana nkutu vava kavanga mambu mama mawonso, yakwamanana kumvovesa vo kavutuka kwa mono,+ kansi kasidi vutuka ko; Yuda wamona mana mavanganga nsanga andi wakondwa e kwikizi.+
8 Wau yamona mawonso mama, yasindika Isaele wakondwa kwikizi,+ yamvana nkanda wa vondela longo mu kuma kia zumba yandi.+ Kansi nsang’andi Yuda wanyekodi kamona wonga ko; yandi mpe wayenda tá e zumba.+
9 Katokanena zumba yandi ko, wakwamanana funzula nsi yo tá zumba yo matadi ye nti.+
10 Kana una vo i wau, Yuda wa nsang’andi wanyekodi, kavutuka kwa mono ko yo ntim’andi wawonso, kansi wavutuka ye disu ku nsi a lukaya,’ u kavovele o Yave.”
11 I bosi Yave umpovese vo: “Isaele wakondwa kwikizi olutidi muna unsongi ke mu Yuda wanyekodi ko.+
12 Wenda samuna mambu mama kuna node:+
“‘“Vutuka, e Isaele wankolami,” u kavovele o Yave.’+ ‘“Kikunutadila kuna makasi ko,*+ kadi i nkwa ziku,” u kavovele o Yave.’ ‘“Kilunda makasi yakwele mvu ko.
13 Zaya kaka o bi waku, kadi wakolamena Yave wa Nzambi aku. Wakwamanana tá zumba ye nzenza* kuna nsi a nti miawonso miasavuka. Kansi ke nuazola lemvokela nding’ame ko,” u kavovele o Yave.’”
14 “Nuvutuka, e yeno wan’akolama,” u kavovele o Yave. “Kadi nkitukidi kikilu se mfumu eno;* ikunutambula, mosi mosi muna konso mbanza, nzole nzole muna konso nzo, ikunutwasa oku Zione.+
15 Ikunuvana avungudi ana bevanga luzolo lwame,+ yo kunudikila muna zayi ye ngangu.
16 Muna lumbu yayina, nuwuta wana yo wokela muna nsi,” u kavovele o Yave.+ “Wantu ke bevova diaka ko vo: ‘Ekwe nkel’a kangu dia Yave!’ Ke beyindula yo diaka ko ngatu sungamena yo, ke bemwena yo viangi ko; ke bevava yo diaka ko.
17 E ntangwa yayina beyikila Yerusaleme vo kunda kia Yave;+ e zula yawonso bekutakana muna Yerusaleme muna nkumbu a Yave,+ ke bekala diaka ye wonga walanda ntima miau miambi ko.”
18 “Muna lumbu yayina, e nzo a Yuda ye nzo a Isaele bekangala kumosi,+ bekatuka kumosi tuka kuna nsi a node yo kwenda kuna nsi ina yavana kwa mase meno se vua.+
19 Yayindula vo: ‘Ekwe kiese yamona wau yanusia vana vena wan’ame yo kunuvana nsi yambote-mbote, e vua disundidi o wete vana vena e zula!’*+ Yayindula mpe vo nukungikila vo: ‘E Tata!’ ke nuyambula kundanda ko.
20 ‘Kieleka, nze una nkento wakondwa kwikizi ke yambulwilanga nkaz’andi,* oyeno mpe, e nzo a Isaele, nungiambwidi muna umpuki,’+ u kavovele o Yave.”
21 Muna kundubulu yakondwa e titi muwakane ndinga,Dilu ye ndodokela za nkangu a Isaele,Kadi babendomwene nzil’au;Bavilakene Yave wa Nzambi au.+
22 “Nuvutuka, yeno wan’akolama.
Wuka ikunuwuka muna ukolami weno.”+
“Tuna vava! Twizidi kwa ngeye,Kadi ngeye, e Yave, u Nzambi eto.+
23 Kieleka, e kundubulu yo mazu muna miongo i mpavala kwandi.+
Kansi, muna Yave wa Nzambi eto i mwina luvuluku lwa Isaele.+
24 Kansi tuka muna kileke kieto, e lekwa kia nsoni kivempolanga* e nluta mia mfuntuk’a mase meto,+Mameme mau ye ngombe zau,Wan’au amakala yo wan’au amakento.
25 Yambula twalavalala muna nsoni zeto,O luvezo lweto lwa tufuka,Kadi tusumukini Yave wa Nzambi eto,+Oyeto ye akulu eto tuka muna kileke kieto yamu unu kiaki,+Ka twalemvokela nding’a Yave wa Nzambi eto ko.”
Mvovo vana yand'a lukaya
^ Mvovo wa sina: “Nyaraba.”
^ Mvovo wa sina: “una ye ndose a.”
^ Yovo “nkento a ndumba.”
^ Mvovo wa sina: “Kiyambula ko vo ndose ame yanubwila.”
^ Yovo “nzambi za nzenza.”
^ Nanga, “nkaz’eno.”
^ Mvovo wa sina: “vu ya zula.”
^ Mvovo wa sina: “nkundi andi.”
^ Yovo “nzambi a nsoni ovempolanga.”
