Yeremiya 34:1-22
34 E diambu dia Yave diayiza kwa Yeremiya ekolo Nebukandesa* wa Ntinu a Babele ye makesa mandi mawonso ye yimfumu yawonso ya nza ina kayalanga ye nkangu miawonso banuanisanga Yerusaleme ye mbanza zandi zawonso, oku vo:+
2 “I wau wuwu kavovele o Yave wa Nzambi a Isaele: ‘Wenda mokena yo Sedekiya wa Ntinu+ a Yuda, umvovesa vo: “I wau wuwu kavovele o Yave, ‘Yekola iyekola mbanza yayi vana moko ma ntinu a Babele, kayoka yo muna tiya.+
3 Kuvuluzwa ko vana moko mandi, kadi bakama obakama yo tambikwa kwa yandi.+ Omonana ye ntinu a Babele, omokena yaku mantalani; i bosi onatwa kuna Babele.’+
4 Kansi, wá diambu dia Yave, e Sedekiya wa Ntinu a Yuda, ‘I wau wuwu kavovele o Yave muna kuma kiaku: “Kufwila muna nsosolo ko.
5 Muna luvuvamu ofwila,+ bekuyokela ndumbu a luziku, nze una bavanga kwa mase maku, atinu ana bavita. Bekudila, oku vo, ‘Ekwe mfumu!’ kadi mono mpovele diambu diadi,’ u kavovele o Yave.”’”’”
6 I bosi, Yeremiya wa ngunza ovovese mambu mama mawonso kwa Sedekiya wa Ntinu a Yuda muna Yerusaleme,
7 vava makesa ma ntinu a Babele banuanisanga Yerusaleme ye mbanza zawonso za Yuda zina zasala,+ i sia vo, Lakisi+ ye Azeka;+ kadi zazi i mbanza zangolo kaka zasala muna Yuda.
8 E diambu dia Yave diayiza kwa Yeremiya vava Sedekiya wa Ntinu kamana kanga e kangu ye nkangu wawonso muna Yerusaleme kimana bavevola ntaudi zau,+
9 i sia vo, yau awonso bavevola ntaudi zau za Ayibere, akala ye akento kimana valembi kala muntu okwamanana bunduna Nyuda wa mpangi andi.
10 Idianu vo akuluntu awonso ye nkangu wawonso ulemvokele. Bakotele muna kangu dia sia vo, awonso bavevola ntaudi zau z’akala ye akento, ke bafwete kala diaka ntaudi ko. Oyau balemvokele yo kubavevola.
11 Kansi, kuna kwalanda batwasa diaka ntaudi z’akala ye z’akento ana bavevola, babakitwidi diaka se abundu.
12 Muna kuma kiaki, Yeremiya otambwidi diambu dia Yave dina ditukidi kwa Yave, oku vo:
13 “I wau wuwu kavovele o Yave wa Nzambi a Isaele, ‘Yakanga e kangu yo mase meno+ muna lumbu yabavaikisa muna Engipito, muna nsi ya ubundu,*+ oku vo:
14 “Kuna mfoko a mvu nsambwadi, konso muntu vovo nuina kafwete vevola mpangi andi wa Nyibere ona katekelwa yo kunsadila mu mvu sambanu; kafwete kumvevola.”+ Kansi, o mase meno ke bawa ko ngatu kuntamba matu.
15 Ke kolo ko nuasobele e ngindu, nuavangidi diambu diansongi vana meso mame wau nuabakidi nzengo zavevola mfinangani zeno, lwakangidi e kangu vana ndose ame muna nzo ina iyikilwanga e nkumbu ame.
16 Kansi nuvilukidi diaka yo safula nkumbu ame+ muna vutukila ntaudi z’akala ye z’akento ana nuavevola mun’owu wa luzolo lwau yo kubabunduna diaka.’
17 “Ozevo, i wau wuwu kavovele o Yave: ‘Ke nundemvokele ko wau nubokelese nkoki a luvevoko, konso muntu kwa mpangi andi yo nkwandi.+ Owau nsikidisi luvevoko mu kuma kieno,’ u kavovele o Yave, ‘nufwila muna nsosolo, muna vuku,* muna mvengele,+ ikunukitula se kuma kia wonga muna yintinu yawonso ya nza.+
18 Ediadi i diambu dibwila ana bakulwidi e kangu diame muna lembi lungisa mambu ma kangu dina bakanga vana ndose ame vava babukuna mwan’a ngombe mu tini yole yo viokela vana kati kwa tini yau yole ya mwan’a ngombe,+
19 i sia vo, akuluntu a Yuda, akuluntu a Yerusaleme, mbanda-mbanda za lûmbu, anganga ye nkangu wawonso wa nsi ana baviokela vana kati kwa tini yau yole ya mwan’a ngombe:
20 Ikubayekola vana moko ma mbeni zau ye vana moko m’awana bevavanga katula mioyo miau, mavimbu mau mekituka se madia ma nuni za zulu ye bulu ya ntoto.+
21 Iyekola Sedekiya wa Ntinu a Yuda ye akuluntu andi vana moko ma mbeni zau ye vana moko m’awana bevavanga mioyo miau ye vana moko ma makesa ma ntinu a Babele,+ ana se beyambula kunuzunga.’+
22 “‘Ivana nkanikinu,’ u kavovele o Yave, ‘ikubavutulwisa mu mbanza yayi, benuanisa yo kutumuna yo, beyoka yo muna tiya;+ ikitula mbanza za Yuda se mfuta, zakondwa wantu.’”+
Mvovo vana yand'a lukaya
^ Mvovo wa sina: “Nebukadrezare,” mpila yankaka yasonekena yo.
^ Mvovo wa sina: “nzo ya ubundu.”
^ Yovo “mayela.”
