Yeremiya 35:1-19
-
Anerekabe basongele mbandu ambote ya nlemvo (1-19)
35 Muna lumbu ya Yoyakime+ wa mwan’a Yosiya wa ntinu a Yuda, e diambu dia Yave diayiza kwa Yeremiya, oku vo:
2 “Wenda kuna nzo ya Anerekabe,+ mokena yau yo kubatwasa muna nzo a Yave, muna suku dimosi dia dila;* i bosi ubavana vinyu banua.”
3 Muna kuma kiaki, mbongele Yazaneya wa mwan’a Yeremiya wa mwan’a Kabasiniya ye mpangi zandi yo wan’andi awonso ye nzo yawonso ya Anerekabe,
4 ibatwese muna nzo a Yave. Ibanete muna suku dia dila dia wan’a Kanane wa mwan’a Yingedaleya wa muntu a Nzambi aludi. E suku diadi diakala vana ndambu a suku dia dila dia akuluntu, edi diakala vana ntandu a suku dia Maseya wa mwan’a Salumi wa nlangididi a mwelo.
5 I bosi nsidi makopo ye mbungwa zazala ye vinyu vana vena wan’a nzo ya Anerekabe, oku vo: “Lunua vinyu.”
6 Kansi oyau bavovele vo: “Ke tunua vinyu ko, kadi Yonadabe+ wa mwan’a Rekabe wa nkulu eto watuvana nsiku wau: ‘Oyeno yo wan’eno ke nufwete nua vinyu ko.
7 Ke nufwete tunga nzo ko, yovo kuna mbongo ngatu vua mpatu za vinyu. Nuzingilanga kaka muna saba, kimana nuazinga lumbu yayingi muna nsi ina nukala nze anzenza.’
8 Muna kuma kiaki, twakwamanana lemvokela nding’a Yonadabe wa mwan’a Rekabe wa se dieto yo vanga mawonso katukanikina, oyeto, akazi eto, wan’eto amakala y’amakento ke tunuanga vinyu ko.
9 Ke tutunganga nzo ko muna zingila, ke tuna ye mpatu za vinyu ko yovo mavia ngatu mbongo.
10 Twakinu zingila muna saba yo lemvokela mawonso katukanikina Yonadabe wa se dieto.
11 Kansi, vava Nebukandesa* wa ntinu a Babele kayiza nuanisa e nsi,+ twavova vo, ‘Twenda, twakota muna Yerusaleme kimana twalembi vondwa kwa makesa ma Akaladi ye Asuria,’ owau tuzingilanga mwamu Yerusaleme.”
12 E diambu dia Yave dizidi kwa Yeremiya, oku vo:
13 “I wau wuwu kavovele o Yave a vu wa Nzambi a Isaele, ‘Wenda vovesa Ayuda y’esi Yerusaleme vo: “Nga ke nulukiswanga ko ntangwa ke ntangwa vo nualemvokela mvovo miame?”+ u kavovele o Yave.
14 “Yonadabe wa mwan’a Rekabe wakanikina wan’andi balembi nua vinyu, oyau belemvokelanga nkanikinu andi muna lembi nua vinyu yamu unu kiaki, balemvokela nkanikinu wa se diau.+ Kansi, omono yanuvovesanga ntangwa ke ntangwa,* oyeno ke nuandemvokela ko.+
15 Yanutwikilanga ntaudi zame zawonso, angunza, yabatumanga ntangwa ke ntangwa,*+ oku vo, ‘Dodokolo, nuviluka konso muntu muna nzil’andi yambi,+ nuvanga edi diansongi! Ke nulandi nzambi zankaka ko yo sadila zo. Ozevo, nukwamanana zingila mwamu nsi yayi yavana kwa yeno yo mase meno.’+ Kansi, ke nuangwila ko ngatu kuntamba matu.
16 O wan’a Yonadabe wa mwan’a Rekabe balunda nkanikinu una bavewa kwa se diau,+ kansi o nkangu wau ke bangwila ko.”’”
17 “Ozevo, i wawu wuwu kavovele o Yave wa Nzambi a vu, wa Nzambi a Isaele: ‘Itwasa muna Yuda ye kwa nkangu wawonso wa Yerusaleme e mpasi zawonso zina yabalukisila,+ kadi yabavovesa, kansi ke bangwila ko, yakwamanana kubabokela, kansi ke batambulwila ko.’”+
18 Yeremiya ovovese Anerekabe vo: “I wau wuwu kavovele o Yave a vu, wa Nzambi a Isaele, ‘Wau vo nulemvokelanga nkanikinu wa Yonadabe wa se dieno yo kwamanana lunda nkanikinu miandi miawonso yo vanga mawonso kanukanikina,
19 i wau wuwu kavovele o Yave a vu, wa Nzambi a Isaele: “Ke vekondwa muntu ko muna wan’a Yonadabe wa mwan’a Rekabe ona otelama va ndose ame yo kunsadila.”’”
Mvovo vana yand'a lukaya
^ Yovo “masuku.”
^ Mvovo wa sina: “Nebukadrezare,” mpila yankaka yasonekena yo.
^ Mvovo wa sina: “yabundumukanga muna mene-mene yo vova.”
^ Mvovo wa sina: “yabundumukanga muna mene-mene yo vova.”
