Yeremiya 36:1-32
36 Muna mvu wa nyá wa luyalu lwa Yoyakime+ wa mwan’a Yosiya, wa ntinu a Yuda, e diambu dia Yave dizidi kwa Yeremiya, oku vo:
2 “Bonga nkanda wasoneka mo mambu mawonso mana yavovesa mu kuma kia Isaele ye Yuda+ ye zula yawonso,+ tuka muna lumbu kiantete kina yavovesa muna lumbu ya Yosiya yamu unu kiaki.+
3 Nanga esi nzo a Yuda vava bewá mpasi zawonso zina nkanini kubatwasila, beyambula e nzila zau zambi, kimana omono yaloloka bi wau ye masumu mau.”+
4 I bosi, Yeremiya obokele Baruki+ wa mwan’a Neraya, umvovese mambu mawonso mana kamvovesa Yave, Baruki osonekene mo muna nkanda.+
5 Yeremiya okanikini Baruki vo: “Yakangama ngina, kilenda kota muna nzo a Yave ko.
6 Muna kuma kiaki, ngeye ofwete mo kota watanga mambu ma Yave muna nding’angolo mana izayisi wasoneka muna nkanda. Tanga mo muna matu ma nkangu muna nzo a Yave muna lumbu kia mfionkonona;* ozevo, tangila mo Ayuda awonso ana bekwizanga tuka muna mavata mau.
7 Nanga e ndodokela zau zilwaka kuna kwa Yave, beviluka konso muntu muna nzil’andi yambi, kadi Yave kuna nsita ye makasi mayingi kavovesele nkangu wau.”
8 Muna diadi, Baruki wa mwan’a Neraya, ovangidi mawonso kankanikini Yeremiya wa ngunza; otangidi nkanda wakala mambu ma Yave muna nding’angolo muna nzo a Yave.+
9 Muna mvu watanu wa luyalu lwa Yoyakime+ wa mwan’a Yosiya wa ntinu a Yuda, muna ngonde yavua, nkangu wawonso muna Yerusaleme ye nkangu wawonso una wayiza muna Yerusaleme watuka muna mbanza za Yuda, babokele nkoki a mfionkonona* vana ndose a Yave.+
10 I bosi, Baruki otangidi mambu ma Yeremiya makala muna nkanda muna nding’a ngolo muna nzo a Yave, muna suku* dia Ngemareya+ wa mwan’a Safani+ wa nsoneki, vana yanzala kia ntandu, vana nkotelo a vitu diampa dia nzo a Yave+ muna matu ma nkangu wawonso.
11 Vava Mikaya wa mwan’a Ngemareya wa mwan’a Safani kawidi mambu mawonso ma Yave mena muna nkanda,
12 okulumukini kuna nzo a* ntinu, wele muna suku dia nsoneki. Akuluntu* awonso bavuanda mwamuna: Elisama+ wa nsoneki, Delaya wa mwan’a Semaya, Elenatane+ wa mwan’a Akebo,+ Ngemareya wa mwan’a Safani, Sedekiya wa mwan’a Kananiya ye akuluntu awonso.
13 Mikaya ubavovese mambu mawonso mana kawá vava Baruki katanga o nkanda muna matu ma nkangu.
14 I bosi, akuluntu awonso batumini Yekudi wa mwan’a Netaneya wa mwan’a Selemeya wa mwan’a Kusi kwa Baruki, oku vo: “Wiza yo nkanda una otangidi muna matu ma nkangu.” Baruki wa mwan’a Neraya, obongele nkanda, wele kuna bena.
15 Bamvovese vo: “Dodokolo, vuanda vava watutangila wo muna nding’angolo.” Ozevo, Baruki ubatangidi wo.
16 Vava bawidi mambu mama mawonso, bamwene kikilu wonga yo talaziana, bavovele kwa Baruki vo: “Tufwete zayisa mambu mama mawonso kwa ntinu.”
17 Bayuvuidi Baruki vo: “Do, utuzayisa, aweyi osonekene mambu mama, Yeremiya osonekese mo?”
18 Baruki ubavutwidi vo: “Yandi untumini yasoneka mambu mama mawonso, omono nsonekene mo ye tinta muna nkanda wau.”
19 Akuluntu bavovese Baruki vo: “Nuenda swekama, ongeye yo Yeremiya, ke nuyambula muntu ko kazaya kuna nukala.”+
20 I bosi, bele kwa ntinu vana yanzala, balundidi nkanda muna suku dia Elisama wa nsoneki, bavovese ntinu mawonso mana bawidi.
21 I dianu vo, ntinu otumini Yekudi+ kenda bonga o nkanda, Yekudi obongele wo muna suku dia Elisama wa nsoneki. Oyantikidi wo tanga muna matu ma ntinu ye akuluntu awonso ana batelamene vana vena ntinu.
22 Muna ngonde ya vua,* o ntinu wavuanda muna nzo ya sivu, o tiya vana ziku twalemanga vana ntwal’andi.
23 Vava Yekudi kamanisa tanga kunku tatu yovo yá, o ntinu wazenga yo muna mbele ya nsoneki yo tuba yo vana tiya, yavana nkanda wawonso wavia vana tiya.
24 O ntinu ye ntaudi zandi ana bawá mambu mama mawonso ke bamona wonga ko ngatu tiazuna mvuatu miau.
25 Kana una vo Elenatane,+ Delaya+ yo Ngemareya+ badodokela o ntinu kalembi yoka nkanda, kansi kabawila ko.
26 Vana ntandu, o ntinu otumini Yerakemele wa mwan’a ntinu, Seraya wa mwan’a Azerele yo Selemeya wa mwan’a Abadeli, benda kanga Baruki wa nsoneki yo Yeremiya wa ngunza, kansi Yave ubaswekele.+
27 E diambu dia Yave dizidi diaka kwa Yeremiya vava ntinu kamene yoka nkanda wakala ye mambu ma Yeremiya mana kasoneka Baruki,+ oku vo:
28 “Bonga nkanda wankaka, soneka mo mambu mawonso mana makedi muna nkanda wantete, una kayokele Yoyakime wa Ntinu a Yuda.+
29 Ofwete vovesa Yoyakime wa ntinu a Yuda vo: ‘I wau wuwu kavovele o Yave: “Oyokele nkanda wau yo vova vo, ‘Ekuma osonekene mo vo: “O ntinu a Babele okwiza kikilu kafwasa nsi yayi, ke musala wantu ko ngatu bulu”?’+
30 I dianu vo, i wau wuwu kavovele o Yave kwa Yoyakime wa Ntinu a Yuda: ‘Muna mbongo andi ke mukala diaka muntu ko ovuanda vana kunda kia kimfumu kia Davidi,+ e vimbu diandi disenzekwa vana mbangazi a mwini yamuna kiozi kia fuku.+
31 Tumba ikuntumba ye mbongo andi muna diambu dia bi wau. Twasa itwasa kwa yau, kwa esi Yerusaleme ye kwa Ayuda e mpasi zawonso zina yakana muna yau,+ wau balembi kungwila.’”’”+
32 Ozevo, Yeremiya obongele nkanda wankaka, ovene wo kwa Baruki wa nsoneki, wa mwan’a Neraya,+ osonekene mo mambu mawonso mana kamvovese Yeremiya mana mateka kala muna nkanda una Yoyakime wa Ntinu a Yuda kayoka vana tiya.+ Mukudikilu mambu mayingi mankaka mafwanana ye mana mantete.
Mvovo vana yand'a lukaya
^ Yovo “lumbu kia mina nsoki.”
^ Yovo “mina nsoki.”
^ Yovo “seka dia dila.”
^ Yovo “mbanda-mbanda za lûmbu.”
^ Yovo “lûmbu lwa.”
