Yeremiya 38:1-28
38 Sefateya wa mwan’a Matane, Ngedaleya wa mwan’a Paseku, Yukale+ wa mwan’a Selemeya ye Paseku+ wa mwan’a Malekiya, bawidi mambu mana Yeremiya kavovele kwa nkangu wawonso, oku vo:
2 “I wau wuwu kavovele o Yave: ‘Ndiona osala mwamu mbanza yayi, muna nsosolo, mvengele ye vuku* kefwila.+ Kansi, ndiona okuyitambika* kwa Akaladi okwamanana zinga yo tanina moyo andi.’+
3 I wau wuwu kavovele o Yave, ‘E mbanza yayi yekolwa iyekolwa kwa makesa ma ntinu a Babele, yandi okutumuna yo.’”+
4 Akuluntu bavovese o ntinu vo: “Dodokolo, yambula muntu ndioyo kavondwa,+ kadi muna mvovo miami oyoyesanga* makesa mana masidi mu mbanza yayi ye nkangu wawonso. Kadi muntu ndioyo ke vavanga luvuvamu lwa nkangu wau ko, kansi mpasi kaka.”
5 Sedekiya wa Ntinu ovutwidi vo: “Una kwandi vana moko meno, kadi ntinu kalendi vanga diambu ko muna kunukakidila.”
6 I dianu vo, babongele Yeremiya, bankobole muna sima kia Malekiya wa mwan’a ntinu, kina kiakala vana Yanzala kia Ayingidi.+ Bakulumwini Yeremiya muna nsinga. E sima ke kiakala ye maza ko, nteke kaka, Yeremiya oyantikidi dimuka muna nteke.
7 Ebede-meleke+ wa Ntiopia, wa nzimba* muna nzo a* ntinu, owidi wo vo basidi Yeremiya muna sima. O ntinu wavuanda kakala vana Vitu dia Benyamini,+
8 Ebede-meleke ovaikidi muna nzo a* ntinu, ovovele kwa ntinu, oku vo:
9 “E mfumu ame wa ntinu, wantu awaya diambu diambi kikilu bavangidi kwa Yeremiya! Bantubidi muna sima, i mûna kefwila ye nzala, kadi mu mbanza ke muna diaka madia ko.”+
10 I bosi, ntinu okanikini Ebede-meleke wa Ntiopia vo: “Nata wantu 30, nuenda tombola Yeremiya wa ngunza muna sima, kalembi fwa.”
11 Ozevo, Ebede-meleke obongele wantu, bakotele muna nzo a ntinu kuna fulu kina kuna nsi a lundilu dia tusalu.+ Babongele mataya ye mvuatu miankulu bakulumwini mio kwa Yeremiya muna sima.
12 Ebede-meleke wa Ntiopia ovovese Yeremiya vo: “Do, bonga nlele ye mataya wasia mo kuna nsi za mpakani, i bosi landisa nsinga vana ntandu.” Yeremiya ovangidi wo,
13 batombwele Yeremiya muna nsinga, bamvaikisi muna sima. Yeremiya okedi kaka vana Yanzala kia Ayingidi.+
14 Sedekiya wa Ntinu otumisi Yeremiya wa ngunza kenda vana kakala, vana mwelo wantatu, una muna nzo a Yave. Ntinu ovovese Yeremiya vo: “Diambu nzolele kuyuvula. Kunsweki diambu ko.”
15 Yeremiya ovovele kwa Sedekiya vo: “Avo ivene mvutu, vonda okumponda. Avo ivene luludiku kukungwila ko.”
16 Muna kuma kiaki, Sedekiya wa ntinu odididi Yeremiya e ndofi kuna kinsweki, oku vo: “I nkal’a Yave kaka, ona watuvana moyo, kikuvonda ko ngatu kuyekola vana moko m’awana bazolele katula moyo aku.”
17 Yeremiya ovovese Sedekiya vo: “I wau wuwu kavovele o Yave wa Nzambi a vu, wa Nzambi a Isaele: ‘Avo ukitambikidi* kwa mbanda-mbanda za ntinu a Babele, ovuluza moyo aku, e mbanza yayi ke iyokwa ko vana tiya. Ongeye ye esi nzo aku nuvuluzwa.+
18 Kansi, avo kukitambikidi* ko kwa mbanda-mbanda za ntinu a Babele, e mbanza yayi iyekolwa kwa Akaladi, beyoka yo muna tiya,+ ongeye kuvuluka ko vana moko mau.’”+
19 O Sedekiya wa Ntinu ovovese Yeremiya vo: “Wonga ngina wau wa Ayuda ana bakitambikidi kwa Akaladi, kadi avo ikitambikidi kwa yau, balenda kunkota nsoki.”
20 Kansi, Yeremiya ovovele vo: “Kuyekolwa kwa yau ko. Dodokolo, lemvokela nding’a Yave muna mana ivovese, okala kiambote yo kwamanana zinga.
21 Kansi, avo kuzolele kuyitambika ko, e diadi i diambu kansongele o Yave:
22 Akento awonso ana basala muna nzo a* ntinu a Yuda mu natwa bena kuna mbazi kuna kw’akuluntu a ntinu a Babele,+ bevovanga vo,‘Wantu ana wabundanga e vuvu, bavunini yo kusunda.+
Badimwini malu maku muna nteke.
Owau bafididi nima yo tina.’
23 Bavaikisi akazi aku awonso yo wan’aku kwa Akaladi. Ongeye kuvuka vana moko mau ko, okangwa kwa ntinu a Babele,+ e mbanza yayi iyokwa muna tiya mu kuma kiaku.”+
24 I bosi, Sedekiya ovovese Yeremiya vo: “Kuzayisi mambu mama kwa muntu ko, kimana walembi fwa.
25 Avo akuluntu bawidi vo mbokene yaku yo kuvovesa vo: ‘Dodokolo, utuzayisa dina ovovese kwa ntinu. Kutusweki diambu ko, ke tukuvonda ko.+ Adieyi ntinu kavovese?’
26 ubavutula vo, ‘Kwa ntinu ndombele kimana kalembi kumvutula kuna nzo a Yonatani yafwila kuna.’”+
27 I bosi, akuluntu awonso bele kwa Yeremiya yo kunyuvula. Yeremiya ubavovese mawonso ntinu kankanikina. I dianu vo, ke bamvovese diaka diambu ko, kadi ke mosi ko muna yau wawá e moko kiau.
28 Yeremiya wakala kaka vana Yanzala kia Ayingidi+ yamuna lumbu kiakutumunua Yerusaleme; wakala kaka vana, vava Yerusaleme yakutumunua.+
Mvovo vana yand'a lukaya
^ Yovo “mayela.”
^ Mvovo wa sina: “ovaika.”
^ Mvovo wa sina: “ozezesanga moko ma.”
^ Yovo “mbanda-mband’a lûmbu.”
^ Yovo “lûmbu lwa.”
^ Yovo “lûmbu lwa.”
^ Mvovo wa sina: “ovaikidi.”
^ Mvovo wa sina: “kuvaikidi.”
^ Yovo “lûmbu lwa.”
