Yeremiya 4:1-31
4 “E Isaele, avo ovutukidi,” u kavovele o Yave,“Avo ovutukidi kwa monoAvo okatwidi e teke yaku yangemi ova ntadisi ame,Kukala diaka muntayila ko.+
2 Avo didi e ndofi vo:
‘I nkal’a Yave kaka!’ muna ludi, muna unsongi ye muna ndungidi,Ozevo, e zula ivua nsambu muna yandi,*Yo kuyisanina muna yandi.”*+
3 Kadi i wau wuwu kavovele o Yave kwa nkangu a Yuda ye Yerusaleme:
“Nuvata ntoto una ke wavatwa ko,Ke nukunina muna mwina nsende ko.+
4 Nuyizengesa kuna kwa Yave,Nukatula kutu ya ntima mieno,+E yeno nkangu a Yuda ye Yerusaleme,Kimana makasi mame malembi kwama nze tiyaYo lema, ke vekala ye ona ozima mo ko,Muna kuma kia mavangu meno mambi.”+
5 Nusamuna dio muna Yuda, nuzayisa dio muna Yerusaleme.
Nukaza yo sika e mpungi muna nsi yawonso.+
Nuboka muna nding’angolo, oku vo: “Nukutakana,Yambula twatinina muna mbanza zangolo.+
6 Nutelamesa sinsu* kisonga nzil’a Zione.
Nuvava e tininu, ke nuningama ko,”Kadi itwasa e mpasi tuka kuna node,+ lufwasu lwampwena.
7 O mfwasi a zula osimbidi nzila.+
Obundumukini vana fulu kiandi nze nkosi;+Ovaikidi vana fulu kiandi kimana kakitula nsi aku se lekwa kia kuyizengenekena.
Mbanza zeno zikituka se mazumbu, ke mukala diaka wantu ko.+
8 I dianu vo, nuvuata ngoto,+Nudila* yo kendalala,Kadi nsita za makasi ma Yave ke zikatukidi omu yeto ko.
9 “Muna lumbu kiakina,” u kavovele o Yave, “o ntim’a* ntinu uzeza,+Ye ntima mia* mfumu mpe;Anganga bekuyizengeneka, angunza besivika.”+
10 I bosi mpovele vo: “E Mfumu Yave! Ngeye ovunginikini nkangu wau+ ye Yerusaleme, oku vo: ‘Nukala yo luvuvamu,’+ kansi, o nsosolo ulweke mu malaka meto.”*
11 Muna ntangwa yayina, divovua kwa nkangu wau ye Yerusaleme vo:
“E tembwa kia mbangazi kituka muna miongo mia makangaKilwakila mwan’ankento* a nkangu ame;Ke kikwiza veva titi ya witi ko ngatu velelesa wo.
12 E tembwa kia ngolo muna fulu yayina kituka muna nkanikinu ame.
Owau fundisa ikubafundisa.
13 Nutala, o mbeni kwiza kekwiza nze matuti ma mvula,Makalu mandi ma vita mena nze kimbongela.+
E mvalu miandi misundidi ngo-zulu muna nswalu.+
Tâtu kwa yeto, kadi tufwasukidi!
14 E Yerusaleme, sukula o bi muna ntim’aku, wavuluzwa.+
Yamu nkia kolo okwamanana ye ngindu zambi?
15 Kadi e ndinga isamuna e nsangu tuka kuna Dani,+Yo zayisa sumbula tuka muna miongo mia Eferaime.
16 Nuzayisa dio kwa zula;Nusamuna dio mu kuma kia Yerusaleme.”
“Ayingidi mukwiza bena tuka kuna nsi ina kwandá,Betatula ndinga zau muna mbanza za Yuda.
17 Banzungidi muna ndambu zawonso nze ayingidi a mpatu,+Kadi untelamene,”+ u kavovele o Yave.
18 “E nzila zaku yo mavangu maku mekala muna ntu aku.+
Ekwe ndudi a lufwasu lwaku,Kadi lulweke kikilu muna ntim’aku!”
19 Ekwe mpasi,* ekwe mpasi!
Mpasi zayingi kikilu mbwene omu ntim’ame.*
Ntim’ame ududilanga omu mono.
Kilendi butama ko,Kadi ngwidi e zú dia mpungi,E mpungi* ya anuani a vita.+
20 Basamwini lufwasu vana ntandu a lufwasu,Kadi e nsi yawonso mu fwaswa ina.
E saba yame ifwasilu kuna kinsalukisa,E nlele miame mia saba mifwasilu muna nday’a meso.+
21 Yamu nkia kolo ikwamanana mona sinsu?*
Yamu nkia kolo ikwamanana wa zú dia mpungi?+
22 “Kadi nkangu ame mazowa kwau;+Ke bekumvuanga mfunu ko.
Wan’a mazowa, ke bena ye umbakuzi ko.
Bavuidi ngangu zayingi mu vanga e mbi,Kansi ke bazeye vanga o wete ko.”
23 Ntadidi e nsi au, mbwene vo yakituka se mfuta, yasala e nkatu.+
Ntadidi e zulu, ke dina diaka yo ntemo ko.+
24 Ntadidi e miongo, mbwene vo miazakamanga,E kundubulu yazakamanga.+
25 Ntadidi, mbwene vo ke vena diaka muntu ko,E nuni za zulu zitinini.+
26 Ntadidi, mbwene vo mpatu yakituka se makanga,E mbanza zandi zawonso zabangulwa.+
Muna kuma kia Yave,Muna kuma kia nsita za makasi mandi.
27 Kadi i wau wuwu kavovele o Yave: “E nsi yawonso nkatu isala,+Kansi, kifwasa yo mvimba ko.
28 Muna kuma kiaki, e nsi dila idila,+E zulu dia ntandu dibukama e tombe.+
Kadi mono mpovele wo, mono mbakidi nzengo,Kisoba ngindu* ko ngatu vutuka manima.+
29 Muna kuma kia mazu m’akwa mvalu ye akwa maswanga,Wantu awonso muna mbanza batinini.+
Bakotele muna mfinda,Bamente muna matadi.+
E mbanza zawonso zibembwelo,Ke zizingilanga diaka wantu ko.”
30 Ongeye wau ofwasilu, adieyi ovanga?
Wavuatanga nlele mia se kia nduwa,Wakiviengesela ye lekwa ya wolo,Yo vongesa meso maku muna tinta ya ndombe.
Kansi, nkatu-nkatu wakiviengesa,+Kadi azolw’aku batinini;Owau bevavanga kuvonda.*+
31 Kadi ngwidi e bumu nze kia nkento obakamene nsongo,Ngwidi kazu nze kia nkento owutanga mwan’andi antete,Nding’a mwan’ankento a Zione ona ofulumwinanga muna mpasi.
Wau kalambwidi moko, ovovele vo:+
“Tâtu kwa mono, kadi ngioyele mu kuma kia avondi!”
Mvovo vana yand'a lukaya
^ I sia vo, “Yave.”
^ I sia vo, “Yave.”
^ Yovo “lunzi dia sinsu.”
^ Yovo “Nubunda e ntulu zeno.”
^ Yovo “unkabu wa.”
^ Yovo “unkabu wa.”
^ Yovo “kansi, o nsosolo ulweke mu mioyo mieto.”
^ Mpovelo ya ngana, nanga muna songa nkenda yovo ngemba.
^ Mvovo wa sina: “Ekwe ndia miame!”
^ Mvovo wa sina: “omu yaka ya ntim’ame.”
^ Nanga, “mbok’a vita.”
^ Yovo “lunzi dia sinsu.”
^ Yovo “Kikuyibanza.”
^ Yovo “bevavanga moyo aku.”
