Yeremiya 40:1-16
40 E diambu dia Yave diayiza kwa Yeremiya vava Nebuzadani+ wa mfumu a ayingidi kamvevola kuna Rama.+ Yeremiya wakangama kakala muna tuvambu vava Nebuzadani kankatula vana kati kw’abakami awonso a Yerusaleme ye Yuda ana banatwanga muna kinkole kuna Babele.
2 Mfumu wa ayingidi obakidi Yeremiya, umvovese vo: “Yave wa Nzambi aku wasakula e mpasi zazi mu kuma kia fulu kiaki,
3 Yave otwese mpasi zazi nze una kavova, kadi yeno nuasumukina Yave yo lembi lemvokela nding’andi. Kiaki i kuma diambu diadi dinubwididi.+
4 Owau ikatwidi tuvambu twina muna moko maku. Avo ozolele kwenda yame kuna Babele, twenda, itoma kulunga-lunga. Kansi, avo kuzolele kwenda yame kuna Babele ko, sala kwaku. Tala, e nsi yawonso ina va ndose aku. Wenda konso kuna ozolele.”+
5 Una Yeremiya kavilukidi ko kimana kenda, Nebuzadani ovovele vo: “Vutuka kuna kwa Ngedaleya+ wa mwan’a Akikami,+ wa mwan’a Safani,+ ona ntinu a Babele kavana kiyekwa kia mbanza za Yuda, wenda kala yandi vana vena o nkangu; yovo wenda konso kuna ozolele.”
E mfumu a ayingidi umvene madia yo lukau, i bosi unsindikidi.
6 I dianu vo, Yeremiya wele kwa Ngedaleya wa mwan’a Akikami kuna Misepa,+ okedi yandi kumosi yo nkangu una wasala muna nsi.
7 Kuna kwalanda, mfumu za makesa ana bakala muna nzanza yo wantu au, bawidi wo vo ntinu a Babele ovene kiyekwa kia nsi kwa Ngedaleya wa mwan’a Akikami yo kunyekeka e wisa kia wan’amakala ye amakento ye yingiana-ngiana, asukami a nsi ana ke banatwa ko kuna Babele.+
8 Ozevo, bele kwa Ngedaleya kuna Misepa.+ E zazi i nkumbu zau: Yisemaele+ wa mwan’a Netaneya, Yokanane+ yo Yonatane wan’a Kareka, Seraya wa mwan’a Tankumete, wan’a Efai wa musi Netofa, Yezaneya+ wa mwan’a Anemaka kumosi yo wantu bakala yau.
9 Ngedaleya wa mwan’a Akikami, wa mwan’a Safani ubadididi e ndofi yo wantu ana bakala yau, oku vo: “Ke numoni wonga ko wasadila Akaladi. Nukala mu nsi yo sadila ntinu a Babele, e zingu kieno kiambote kikala.+
10 Vo i mono, ikala kuna Misepa se nsunzudi eno* vana vena Akaladi ana bezidi kwa yeto. Kansi oyeno nuenda kutika vinyu, bundu ya nsungi a mvula* yo mazi, nulunda lekwa yayi muna yitunga, nukala muna mbanza zina nubakidi.”+
11 Ayuda awonso ana bakedi muna Moabe, Amone, Edome ye awana bakala muna nsi zankaka bawidi wo mpe vo ntinu a Babele osisidi wantu akaka muna Yuda yo kubatumbikila Ngedaleya wa mwan’a Akikami wa mwan’a Safani e kinkengi.
12 Muna kuma kiaki, Ayuda awonso bavutukidi muna fulu ina bamwanganeswa, bezidi muna nsi a Yuda yo kwenda kwa Ngedaleya kuna Misepa. Bakutikidi vinyu ye bundu yayingi ya nsungi a mvula.*
13 Yokanane wa mwan’a Kareka ye mfumu zawonso za makesa ana bakala muna nzanza bezidi kwa Ngedaleya kuna Misepa.
14 Bamvovese vo: “Nga kuzeye wo ko vo Balisi wa ntinu Aneyamone+ otwikidi Yisemaele wa mwan’a Netaneya kàvonda?”+ Kansi, Ngedaleya wa mwan’a Akikami kabakwikidi ko.
15 I bosi, Yokanane wa mwan’a Kareka ovovese Ngedaleya kuna Misepa, kuna kinsweki vo: “Nzolele kwenda vonda Yisemaele wa mwan’a Netaneya, ke muntu ko ozaya wo. Ekuma kafwete kuvondela? Ekuma nkangu wawonso wa Yuda bena yaku bafwete mwanganesenua ye nsadiswa za Yuda bafukiswa emvimba?”
16 Kansi, Ngedaleya+ wa mwan’a Akikami ovovese Yokanane wa mwan’a Kareka vo: “Kuvangi diambu diadi ko, kadi luvunu ovovele mu kuma kia Yisemaele.”
Mvovo vana yand'a lukaya
^ Mvovo wa sina: “yatelama.”
^ Musungula bundu ya nsanda, nanga ye bundu ya dinsongwa.
^ Musungula bundu ya nsanda, nanga ye bundu ya dinsongwa.
