Yeremiya 41:1-18
41 Muna ngonde ya nsambwadi, Yisemaele+ wa mwan’a Netaneya wa mwan’a Elisama muna luvila lwa kintinu,* mosi muna mbanda-mbanda za ntinu, wele kumosi yo wantu kumi kuna kwa Ngedaleya wa mwan’a Akikami kuna Misepa.+ Ekolo badianga kumosi kuna Misepa,
2 Yisemaele wa mwan’a Netaneya yo wantu kumi ana bakala yandi, batelamene bavondele Ngedaleya wa mwan’a Akikami, wa mwan’a Safani muna nsosolo. Ovondele ndiona ntinu a Babele kavana kiyekwa kia nsi.
3 Yisemaele ovondele mpe Ayuda awonso ana bakala yo Ngedaleya muna Misepa kumosi yo makesa ma Akaladi ana bakala kûna.
4 Muna lumbu kiazole una ke diazayakana kwa muntu ko vo Ngedaleya ovondelo,
5 valwaka 80 lwa wantu batuka kuna Sekeme,+ Silo+ ye Samaria.+ Bakala ye nzevo za zengwa ye mvuatu miabakuka, bamana kuyilweka,+ bakala yo tukau twa mbwaza ye ndumbu a nti a lebona+ vana moko kimana banata yo muna nzo a Yave.
6 Yisemaele wa mwan’a Netaneya okatukidi kuna Misepa wele kubakika, wele didingi. Vava kawanana yau, ubavovese vo: “Nuiza kwa Ngedaleya wa mwan’a Akikami.”
7 Kansi, vava balweke muna mbanza, Yisemaele wa mwan’a Netaneya ye wantu andi, babavondele yo kubatuba muna sima.
8 Kansi vakala wantu kumi vana bena, bavovese Yisamaele vo: “Kutuvondi ko, kadi tuna ye malundilu ma witi,* bale, mazi yo wiki tuswekele muna mpatu.” Muna diadi, ubayambwidi kabavonda ko nze una kavanga kwa mpangi zau.
9 Yisemaele otubidi mavimbu ma wantu awonso ana kavonda muna sima kianene. O ntinu Asa yandi watima sima kiakina mu kuma kia Basa wa ntinu a Isaele.+ Ekiaki i sima kina Yisemaele wa mwan’a Netaneya kazadisa mavimbu ma wantu ana bavondwa.
10 Yisemaele wanata nkangu wawonso wasala muna Misepa+ se abakami kumosi yo wan’amakento a ntinu yo nkangu wawonso wasala muna Misepa, una Nebuzadani wa mfumu a ayingidi kasia muna wisa kia Ngedaleya+ wa mwan’a Akikami. Yisemaele wa mwan’a Netaneya wanata abakami, wayenda kuna ndambu a nsi a Aneyamone.+
11 Yokanane+ wa mwan’a Kareka ye mfumu zawonso z’ayingidi ana bakala yandi vava bawá e mbi yawonso ina kavanga Yisemaele wa mwan’a Netaneya,
12 babongele akala awonso bele nuanisa Yisemaele wa mwan’a Netaneya, bansolwele vana ndambu a maza mayingi* kuna Ngibone.
13 Wantu awonso ana bakala ye Yisemaele bayangalala vava bamona Yokanane wa mwan’a Kareka ye mfumu za makesa bakala yandi.
14 Wantu awonso ana Yisemaele kakanga kuna Misepa,+ bavilukidi yo vutuka kumosi yo Yokanane wa mwan’a Kareka.
15 Kansi, Yisemaele wa mwan’a Netaneya ye nana diandi dia wantu, batina Yokanane, bayenda kuna nsi ya Aneyamone.
16 Yokanane wa mwan’a Kareka ye mfumu zawonso za makesa ana bakala yandi banata nkangu wasala kuna Misepa, ana bakûla vana moko ma Yisemaele wa mwan’a Netaneya, vava kavonda Ngedaleya+ wa mwan’a Akikami. Batwese akala, makesa, akento, yingiana-ngiana ye mbanda-mbanda za lûmbu tuka kuna Ngibone.
17 Bayenda yo telama vana fulu kia Kimami kia tambulwila nzenza, kina lukufi ye Beteleme,+ bakala ye kani dia kwenda kuna Engipito+
18 mu kuma kia Akaladi. Kadi babamwena wonga, wau vo Yisemaele wa mwan’a Netaneya ona wavonda Ngedaleya wa mwan’a Akikami, ona ntinu a Babele kavana kiyekwa kia nsi.+
Mvovo vana yand'a lukaya
^ Mvovo wa sina: “mbongo a kintinu.”
^ Witi i mbwaza zivangilwanga e mfumfu a mbolo.
^ Nanga, “lundilu dianene.”
