Yeremiya 42:1-22
42 I bosi, e mfumu zawonso za makesa yo Yokanane+ wa mwan’a Kareka, Yezaneya wa mwan’a Osaya ye nkangu awonso, tuka muna nleke yamuna mbuta, bafinamene
2 yo vovesa Yeremiya wa ngunza vo: “Dodokolo, wá ludodokelo lweto, samba kwa Yave wa Nzambi aku mu kuma kieto ye mu kuma kia awonso basala,+ kadi muna ndonga ayingi, akete kaka basidi, nze una omwene.
3 Yambula Yave wa Nzambi aku katusonga e nzila ina tufwete landa ye dina tufwete vanga.”
4 Yeremiya wa ngunza ubavutwidi vo: “Ke diambu ko, se yasamba kwa Yave wa Nzambi eno mun’owu wa ndomba eno; ikunuzayisa mambu mawonso mana kekunuvovesa o Yave. Kisweka kana diambu dimosi ko.”
5 Bavutwidi kwa Yeremiya vo: “Yambula Yave kakala se mbangi aludi ye waziku oku kwa yeto avo ke tulungisa ko emvimba mana Yave wa Nzambi aku kekutuvovesa muna ngeye.
6 Diakala diambu diambote yovo diambi, tulemvokela nding’a Yave wa Nzambi eto, ona tutumìni kimana twakala kiambote wau vo tulemvokele nding’a Yave wa Nzambi eto.”
7 Vioka lumbu kumi, e diambu dia Yave dizidi kwa Yeremiya.
8 I bosi, Yeremiya obokele Yokanane wa mwan’a Kareka ye mfumu zawonso za makesa ana bakedi yandi ye nkangu awonso, tuka muna nleke yamuna mbuta.+
9 Ubavovese vo: “I wau wuwu kavovele o Yave wa Nzambi a Isaele, ona nuntumini yasunzula e ndodokela zeno kwa yandi:
10 ‘Avo nukala kaka muamu nsi yayi, ikunutunga, ke mu kunubangula ko, ikunukuna ke mu kunuvuza ko, kadi ikuyibanza muna* mpasi zina inutwasidi.+
11 Ke numoni wonga wa ntinu a Babele ko ona numwenanga o wonga.’+
“‘Ke numoni wonga ko mu kuma kiandi,’ u kavovele o Yave, kadi ngina yeno, muna kunuvuluza yo kunukûla vana moko mandi.
12 Ikunufwila e nkenda+ yandi mpe okunufwila e nkenda yo kunuvutula muna nsi eno.
13 “‘Kansi avo nuvovele vo: “Ve, ke tukala mu nsi yayi ko!” yo lembi lemvokela nding’a Yave wa Nzambi eno
14 yo vova vo: “Ve, kwenda tukwenda kuna nsi ya Engipito,+ kuna ke tumona vita ko yovo wá zú dia mpungi ngatu fwa nzala; i kûna tuzingila,”
15 ozevo, nuwá diambu dia Yave, o yeno nuasala muna Yuda. I wau wuwu kavovele o Yave a vu, wa Nzambi a Isaele: “Avo nusiandamene kaka kwenda kuna Engipito yo zingila kûna,*
16 o nsosolo una numwenene wonga ukunulwakila kuna nsi a Engipito, o mvengele una numwenene wonga ukunulanda kuna Engipito, i kûna nufwila.+
17 Wantu awonso ana bazolele kwenda kuna Engipito kimana bazingila kûna, befwila muna nsosolo, muna mvengele ye vuku.* Ke mosi ko ovuluka muna mpasi zina ikubatwasila.”’
18 “Kadi i wau wuwu kavovele o Yave a vu, wa Nzambi a Isaele: ‘Wauna yatiamunuina makasi mame ye nsita zame muna nkangu a Yerusaleme,+ i una yitiamunuina nsita zame omu yeno, avo nuele kuna Engipito, nukala se sibu ye kuma kia mwena wonga yo luvezo yo lusembo;+ ke numona diaka fulu kiaki ko.’
19 “Yave ovovele mu kuma kieno, e yeno nuasala muna Yuda. Ke nuendi kuna Engipito ko. Nuzaya wo vo yinulukisi o unu
20 vo mioyo mieno nuvidisa mu kuma kia bi weno. Kadi yeno nuntumini kwa Yave wa Nzambi eno, oku vo: ‘Utusambidila kwa Yave wa Nzambi eto, i bosi utuzayisa mawonso kekutuvovesa o Yave wa Nzambi eto, i mau tuvanga.’+
21 O unu inuvovese, kansi oyeno avo ke nulemvokela nding’a Yave wa Nzambi eno ko, ke nuvanga kana diambu dimosi ko muna mana kantumini yanuvovesa.+
22 Muna kuma kiaki, nuzaya wo vo muna nsosolo, muna mvengele ye vuku nufwila kuna fulu kina nuzolele kwenda zingila.”+
Mvovo vana yand'a lukaya
^ Yovo “ikendalala mu kuma kia.”
^ Yovo “zingila kûna mu kolo kiandwelo.”
^ Yovo “mayela.”
