Yeremiya 43:1-13
43 Vava Yeremiya kamana vovesa nkangu wawonso mambu mama mawonso ma Yave wa Nzambi au, elo, mambu mawonso mana Yave wa Nzambi au kantuma kabavovesa,
2 Azareya wa mwan’a Osaya, Yokanane+ wa mwan’a Kareka, ye akwa lulendo awonso bavovese Yeremiya vo: “Luvunu ovovele! Yave wa Nzambi eto katumini ko wavova vo: ‘Ke nuendi kuna Engipito ko nuazingila kûna.’
3 Kansi, Baruki+ wa mwan’a Neraya uvukumwini wavova mbi mu kuma kieto, kimana watuyekola kwa Akaladi batuvonda yovo batunata kuna kinkole kuna Babele.”+
4 Muna kuma kiaki, Yokanane wa mwan’a Kareka, mfumu zawonso za makesa ye nkangu wawonso ke balemvokele nkanikinu a Yave ko, wa kala kaka mu nsi a Yuda.
5 Kansi, Yokanane wa mwan’a Kareka ye mfumu zawonso za makesa banete nkangu wawonso a Yuda ana bavutuka kimana bazingila muna nsi a Yuda tuka muna zula yawonso ina bamwanganesenua.+
6 Banete akala, ankento, yingiana-ngiana, wan’amakento a ntinu ye awonso ana Nebuzadani+ wa mfumu ayingidi kasisa yo Ngedaleya+ wa mwan’a Akikami+ wa mwan’a Safani,+ kumosi yo Yeremiya wa ngunza yo Baruki wa mwan’a Neraya.
7 Bele kuna nsi ya Engipito, kadi ke balemvokele nding’a Yave ko, bele yakuna Takepankese.+
8 I bosi, e diambu dia Yave diayiza kwa Yeremiya kuna Takepankese, oku vo:
9 “Bonga matadi mampwena, wasweka mo vana ntadisi a Ayuda muna nteke ya tungila nzo ina vana vitu dia nzo a Faro muna Takepankese.
10 I bosi ubavovesa vo: ‘I wau wuwu kavovele o Yave a vu, wa Nzambi a Isaele: “Tumisa itumisa Nebukandesa* wa ntinu a Babele, wa selo kiame,+ isia kunda kiandi kia kimfumu vana ntandu a matadi mama nswekele, oyandi okûndika saba kiandi kia kimfumu vana ntandu a matadi mama.+
11 Kwiza kekwiza kanuanisa e nsi ya Engipito.+ Konso ona ofwene fwila muna vuku, muna vuku kefwila, konso ona ofwene natwa kuna kinkole, muna kinkole kenatwa, konso ona fwene fwila muna nsosolo, muna nsosolo kefwila.+
12 Isia tiya muna nzo za nzambi za Engipito,+ oyoka zo yo nata nkangu muna kinkole. Okuyifuka ntoto a Engipito nze mvungudi uyifukidi mvuatu miandi, ku luvuvamu kekatukila mo.
13 Okosomona malunzi ma Bete-semese* muna nsi ya Engipito, yoka keyoka nzo* za nzambi za Engipito.”’”
Mvovo vana yand'a lukaya
^ Mvovo wa sina: “Nebukadrezare,” mpila yankaka yasonekena yo.
^ Yovo “Nzo (Tempelo) ya Ntangwa,” i sia vo, Eliopolisi.
^ Yovo “tempelo.”
