Yeremiya 44:1-30
44 Yeremiya watambula diambu muna samuna kwa Ayuda awonso ana bazingilanga muna nsi ya Engipito,+ ye awana bakala muna Mingedole,+ muna Takepankese,+ Nofe*+ ye nsi ya Paterose,+ oku vo:
2 I wau wuwu kavovele o Yave a vu wa Nzambi a Isaele: ‘Numwene mpasi zawonso ntwese muna Yerusaleme+ ye mbanza zawonso za Yuda, o unu ina se mazumbu, ke mu zingilanga diaka wantu ko.+
3 Ediadi divangamene mu kuma kia mambu mama mambi bavanga muna kumfungisa makasi, bakela yimenga+ yo sadila nzambi zankaka zina ke bazaya ko, oyeno ngatu mase meno.+
4 Yakwamanana tuma selo yame yawonso a ngunza, yabatumanga ntangwa ke ntangwa,* oku vo: “Dodokolo, ke nuvangi mambu mama mangemi ko mana imenganga.”+
5 Kansi oyau ke bawá ko ngatu tamba o matu kimana bayambula o bi wau wakela yimenga kwa nzambi zankaka.+
6 I dianu vo, yatiamuna makasi mame ye nganzi zame, zina zakwama muna mbanza za Yuda yamuna nzila za Yerusaleme, zakituka se mazumbu ye mfuta, nze una zina o unu.’+
7 “Ozevo, i wau wuwu kavovele o Yave wa Nzambi a vu, wa Nzambi a Isaele: ‘Ekuma nukuyitwasilanga mpasi zayingi yamu tezo kia twasila lufwasu kw’akala awonso, akento, wana ye nsedia muna Yuda, yo lembi sisa kana mosi?
8 Ekuma nukumfungisilanga makasi muna mavangu ma moko meno wau nutambikanga yimenga kwa nzambi zankaka muna nsi a Engipito ina nuayenda zingila? Fwa nufwa yo kituka se lekwa kiangemi yo luvezo vana vena zula yawonso ya nza.+
9 Nga nuvilakene mavangu mambi ma mase meno yo mavangu mambi ma atinu a Yuda,+ mavangu mambi m’akento au+ ye mavangu mambi m’akento eno+ mana mavangama muna nsi ya Yuda muna nzila za Yerusaleme?
10 Yamu unu kiaki ke nuayikulula* ko, ke nuamvumina ko,+ ngatu diatila muna nsiku ame ye mîna miame mina yavana kwa mase meno.’+
11 “I dianu vo, i wau wuwu kavovele o Yave a vu, wa Nzambi a Isaele: ‘Mpasi kikilu ikunutwasila, fwasa ifwasa Yuda yawonso.
12 Bonga ibonga nkangu a Yuda ana babaka nzengo za kwenda zingila kuna nsi ya Engipito, awonso befwila muna nsi ya Engipito.+ Bebwila muna nsosolo ye mvengele; tuka muna nleke yamuna mbuta, befwila muna nsosolo ye mvengele. Bekituka se sibu, lekwa kia kenonokena, lusembo ye luvezo.+
13 Itumba awana bena muna nsi ya Engipito wauna yatumbila Yerusaleme muna nsosolo, muna mvengele ye vuku.*+
14 E nsadiswa za Yuda ana bayenda zingila muna nsi ya Engipito, ke bevuka ko, ke betina ko yovo vuluzwa kimana bavutuka muna nsi a Yuda. Bekala ye luzolo lwavutuka yo zingila mo, kansi ke bevutuka ko, nanga vo akete kaka bevuka.’”
15 Akala awonso ana bazaya wo vo akazi au yimenga bakelanga kwa nzambi zankaka ye akento awonso ana batelama vavana, bavavanga e buka, kumosi yo nkangu wawonso wazingilanga kuna Paterose+ muna nsi a Engipito,+ bavutwidi kwa Yeremiya vo:
16 “Ke tuwa diambu diaku ko dina ovovele muna nkumbu a Yave.
17 Kansi, tuvanga mambu mawonso mavaikidi mu nua mieto, i sia vo, tutambika yimenga kwa Ntinu Ankento a Zulu* yo kunyitila tukau twa ndua,+ nze una twavanganga oyeto, mase meto ye atinu eto ye akuluntu eto muna mbanza za Yuda ye muna nzila za Yerusaleme, muna ntangwa yayina, vava twakala ye ulolo wa madia, ke twakondwanga lekwa ko ngatu mona mpasi.
18 Kansi, tuka twayambulwila kela yimenga kwa Ntinu Ankento a Zulu* yo kunyitidila tukau twa ndua, ke twakalanga diaka ye lekwa ko, twafukiswa kwa nsosolo ye mvengele.”
19 Akento bavovele diaka vo: “Vava twakelanga yimenga kwa Ntinu Ankento a Zulu yo kunyitila tukau twa ndua, nga ke akazi eto ko batuvana nswa vo twavanganga mbolo za tukau muna fwaniswa kiandi yo kunyitila tukau twa ndua?”
20 I bosi, Yeremiya ovovese nkangu wawonso, akala, akento au yo wantu awonso ana bavovanga yandi vo:
21 “E yimenga yeno, ya mase meno, ya atinu eno, akuluntu eno ye yimenga ina bakelanga nkangu wawonso muna mbanza za Yuda ye muna nzila za Yerusaleme,+ Yave osungamene yo, elo ilweke muna ntim’andi!
22 I bosi Yave kalenda diaka zizidila mavangu meno mambi ko ye mavangu mangemi mana nuavanga, e nsi eno yafwasakana yo kituka se kuma kia mwena wonga ye sibu yo kondwa wantu yamu unu kiaki.+
23 Wau vo nuakela yimenga yayi yo sumukina Yave muna lembi lemvokela nding’a Yave yo lembi landa nsiku andi, nkanikinu miandi ye lulukisu lwandi, i dianu mpasi zazi zinulwakidi, nze una numwene o unu.”+
24 Yeremiya okwamanene vovesa nkangu wawonso ye akento awonso vo: “Nuwa diambu dia Yave, yeno Ayuda awonso nuina muna nsi ya Engipito.
25 I wau wuwu kavovele o Yave a vu wa Nzambi a Isaele, ‘Dina nuvovele muna nua mieno, oyeno ye akazi eno, i diau nuvangidi muna moko meno, kadi nuvovele vo: “Lungisa tulungisa e ndofi twadia vo tukelela yimenga kwa Ntinu Ankento a Zulu* yo kunyitidila tukau twa ndua.”+ E yeno akento lungisa kikilu nulungisa ndofi ina nuadia yo vanga dina nuasila o nsilu.’
26 “Dianu vo nuwá diambu dia Yave, eyeno Ayuda awonso nuina muna nsi ya Engipito: ‘“Ndidi e ndofi muna nkumbu ame anene,” u kavovele o Yave, “muna nsi ya Engipito yawonso ke mukala diaka musi Yuda ko+ oyika nkumbu ame muna dia ndofi, oku vo, ‘I nkal’a Mfumu Yave kaka!’+
27 Ibasidi e sungididi muna kubatwasila mpasi ke diambu diambote ko,+ akala awonso a Yuda muna nsi ya Engipito, befwila muna nsosolo ye mvengele yavana befokoka e mvimba.+
28 Akete kaka bevuluka muna nsosolo yo vaika muna nsi a Engipito bavutuka muna nsi a Yuda.+ I bosi, e nsadiswa yawonso a Yuda ana batuka kuna nsi a Engipito izingila kûna, bezaya kana vo diambu dia nani dilungana, diame yovo diau.”’”
29 “‘Kiaki i sinsu kwa yeno,’ u kavovele o Yave, ‘Tumba ikunutumba va fulu kiaki, kimana nuazaya wo vo o nsilu ame wakunutwasila mpasi, lungana ulungana.
30 I wau wuwu kavovele o Yave: “Iyekola Faro Kofere wa ntinu a Engipito vana moko ma mbeni zandi ye vana moko m’awana bevavanga katula moyo andi, wauna yayekolwela Sedekiya wa ntinu a Yuda vana moko ma Nebukandesa* wa ntinu a Babele, ona wakala se mbeni andi wavavanga katula moyo andi.”’”+
Mvovo vana yand'a lukaya
^ Yovo “Memfise.”
^ Mvovo wa sina: “yababundumunanga muna mene-mene yo kubatuma.”
^ Muna mvovo wa sina: “bayikulula.”
^ Yovo “mayela.”
^ Nkumbu yayikilwanga nzambi ankento wasambilwanga kwa Aneyisaele ana bavengomoka, nanga nzambi a mawuta.
^ Nkumbu yayikilwanga nzambi ankento wasambilwanga kwa Aneyisaele ana bavengomoka, nanga nzambi a mawuta.
^ Nkumbu yayikilwanga nzambi ankento wasambilwanga kwa Aneyisaele ana bavengomoka, nanga nzambi a mawuta.
^ Mvovo wa sina: “Nebukadrezare,” mpila yankaka yasonekena yo.
