Yeremiya 52:1-34
52 Sedekiya+ mvu 21 kakala miau vava kayantika yala, mvu 11 kayala muna Yerusaleme. E nkumbu a ngudi andi, Kamutale+ wa mwan’a Yeremiya wa musi Libena.
2 Wakwamanana vanga mambu mambi vana meso ma Yave, mun’owu wa mambu mawonso mana Yoyakime kavanga.+
3 Mambu mama mavangama muna Yerusaleme ye Yuda mu kuma kia makasi ma Yave, yavana kabayinga vana ndose andi.+ Sedekiya wakolamena ntinu a Babele.+
4 Muna mvu wa vua wa luyalu lwa Sedekiya, muna ngonde ya kumi, muna lumbu kia kumi kia ngonde, o Nebukandesa* wa Ntinu a Babele wizidi nuanisa Yerusaleme yo makesa mandi mawonso. Basikidisi e ndo yo tunga e yaka muna nzunguluk’andi yawonso.+
5 Bazungidi e mbanza yamuna mvu wa 11 wa luyalu lwa Sedekiya wa Ntinu.
6 Muna ngonde ya nyá, muna lumbu kia vua kia ngonde,+ o mvengele wasaka muna mbanza, ke mwakala madia ko mu dikila o nkangu a nsi.+
7 I bosi, baziudi e vundu muna yaka kia mbanza. Makesa mawonso batinini muna mbanza muna fuku vana vitu dina vana kati kwa yaka yau yole ina lukufi ye mpatu a ntinu, ekolo Akaladi bazunganga e mbanza; bakwamanene kwendela muna nzila ya Araba.+
8 Kansi, makesa ma Akaladi balakamene o Sedekiya+ wa ntinu, bambakidi muna makanga ma Yeriko, makesa mandi mawonso mamwangane.
9 I bosi, bakangidi o ntinu, banete kwa ntinu a Babele kuna Rebela muna nsi ya Kamati, unzengele e tumbu.
10 O ntinu a Babale ovondele wan’a Sedekiya vana meso mandi, ovondele mpe mfumu zawonso za Yuda kuna Rebela.
11 I bosi, ntinu a Babele otobwele meso ma Sedekiya,+ unkangidi muna tuvambu twa nsongo yo kunata kuna Babele, unsidi muna pelezo yamuna lumbu kia lufwa lwandi.
12 Muna ngonde ina yatanu, muna lumbu kia kumi kia ngonde, i sia vo, muna mvu wa 19 wa luyalu lwa Nebukandesa* wa Ntinu a Babele, Nebuzadani wa mfumu ayingidi, wa selo kia ntinu a Babele, wizidi muna Yerusaleme.+
13 Oyokele nzo a Yave,+ nzo a ntinu* ye nzo zawonso muna Yerusaleme; oyokele mpe nzo zawonso zanene.
14 Makesa mawonso ma Akaladi mana makala yo mfumu a ayingidi, babangwidi e yaka yazunga Yerusaleme.+
15 Nebuzadani wa mfumu a ayingidi, oyalwidi akaka muna asukami a nkangu ye awana basala muna mbanza, ubanete muna kinkole ye nkangu wankaka una wasiswa muna mbanza kumosi ye akwa umbangu ana basala.+
16 Kansi Nebuzadani wa mfumu a ayingidi, osisidi nkangu wankaka muna nsi ana bakala vo asukami kikilu kimana basalanga muna mpatu za vinyu se asadi a salu yangolo.+
17 Akaladi bakosomwene malunzi ma nsongo+ ma nzo a Yave ye makalu+ yo Kalunga kwa nsongo+ kwakala muna nzo a Yave, banete nsongo wawonso kuna Babele.+
18 Banete mpe e yinzu ya katulwila ntoto ampolo, pawu, zengelwa ya nsing’a mwinda, pidi,+ mbungwa+ ye lekwa yawonso ya nsongo yasadilwanga muna salu kia tempelo.
19 O mfumu a ayingidi obongele malonga masukulwila,+ natinua ya tiya, zangikilwa ya minda,+ mbungwa ye pidi ya wolo walembi sangwa lekwa ye palata.+
20 Vo i malunzi mau mole, Kalunga ye ngombe 12 za nsongo+ zakala kuna nsi a Kalunga ye makalu mana Solomo wa Ntinu kavanga mu kuma kia nzo a Yave, e zitu dia nsongo ke dialendakana tezwa ko muna lekwa yayi yawonso.
21 Vo i malunzi, konso lunzi diakala ye yinkoso* 18 muna lá, nsinga watezela wa yinkoso 12 wazietanga konso lunzi;+ o nkandu a lunzi diantete wa nlembo nyá,* muna kati vuvulu diakala.
22 E lunzi dimosi diakala ye ntu ansongo, o ntu wakala yo lá kwa yinkoso tanu;+ e konde ye nganata* zawonso zazingwa muna ntu zansongo zakala. E lunzi dianzole diafwanana ye dina diantete ye nganata mpe.
23 Mwakala ye 96 lwa bundu ya nganata* muna ndambu; muna kinzieta kiawonso kia konde mwakala ye 100 bundu ya nganata.+
24 O mfumu a ayingidi obongele mpe Seraya+ wa mbut’anganga yo Sefaniya+ wa nganga anzole ye ayingidi atatu a mielo.+
25 Obongele mbanda-mbanda ona wakala se mfumu a makesa muna mbanza ye aludiki nsambwadi a ntinu ana bawanuka muna mbanza yo nsoneki a mfumu a makesa ona wasonekanga o nkangu a nsi muna salu kia kisoladi ye 60 ma mpasi wantu ana bakala muna mbanza.
26 Nebuzadani wa mfumu ayingidi ubabakidi yo kubanata kwa ntinu a Babele kuna Rebela.
27 O ntinu a Babele ubawende yo kubavondela kuna Rebela+ kuna nsi a Kamati. Muna diadi, Ayuda banatwa kuna kinkole tuka muna nsi au.+
28 Olwalu i lutangu lwa wantu luna Nebukandesa* kanata kuna kinkole: muna mvu wa nsambwadi wa luyalu lwandi, 3.023 ma Ayuda.+
29 Muna mvu wa 18 wa luyalu lwa Nebukandesa,*+ 832 ma wantu banatwa tuka kuna Yerusaleme.
30 Muna mvu wa 23 wa luyalu lwa Nebukandesa,* Nebuzadani wa mfumu ayingidi, wanata Ayuda kuna kinkole, 745 ma wantu.*+
Yau awonso, 4.600 za wantu* banatwa kuna kinkole.
31 I bosi, muna mvu una wa 37 wa kinkole kia Yoyakine+ wa ntinu a Yuda, muna ngonde ya 12, muna lumbu kia 25 kia ngonde, muna mvu una Evile-merodake kayantika yala se ntinu muna Babele, wavevola* Yoyakine wa ntinu a Yuda yo kumvaikisa muna pelezo.+
32 Umvovesele kuna ngemba yo tundidika e kunda kia kimfumu kiandi lutila kunda ya atinu ankaka ana bakala yandi muna Babele.
33 Muna kuma kiaki, Yoyakine okatwidi mvuatu miandi mia pelezo, odididi vana meza ma ntinu e lumbu yawonso ya zingu kiandi.
34 Watambulanga e kunku kia madia ntangwa zawonso kuna kwa ntinu a Babele, lumbu ke lumbu, yamuna lumbu kia lufwa lwandi, e lumbu yawonso ya zingu kiandi.
Mvovo vana yand'a lukaya
^ Mvovo wa sina: “Nebukadrezare,” mpila yankaka yasonekena yo.
^ Mvovo wa sina: “Nebukadrezare,” mpila yankaka yasonekena yo.
^ Yovo “lûmbu lwa ntinu.”
^ I sia vo, bundu kina nze ngavua yovo mfuluta.
^ I sia vo, bundu kina nze ngavua yovo mfuluta.
^ Mvovo wa sina: “Nebukadrezare,” mpila yankaka yasonekena yo.
^ Mvovo wa sina: “Nebukadrezare,” mpila yankaka yasonekena yo.
^ Mvovo wa sina: “Nebukadrezare,” mpila yankaka yasonekena yo.
^ Yovo “mioyo.”
^ Yovo “mioyo.”
^ Mvovo wa sina: “wazangula ntu wa.”
