Yesaya 14:1-32
14 Kadi Yave ofwila Yakobo e nkenda,+ osola diaka Isaele.+ Okubasikidisa* muna nsi au,+ e nzenza zikubayikama, zilaminina e nzo a Yakobo.+
2 E nkangu mikubabonga yo kubavutula* vana fulu kiau, muna nsi a Yave, e nkangu mikituka se ntaudi zamakala ye zamakento za nzo a Isaele;+ e Isaele ikanga awana babanata muna kinkole yo yala awana babasadisanga e salu yangolo.*
3 Muna lumbu kina o Yave kekuvundisa muna mpasi zaku, muna ntokani zaku ye muna ubundu una wasiwa,+
4 ongeye oveza ntinu a Babele muna kingana eki:
“Ekwe nsuka kasukidi ndiona wasadisanga akaka e salu yangolo!*
O lubangamu lufokokele!+
5 Yave otolwele o nkau a kimpumbulu,E mvual’a ayadi,+
6 Ndiona wawendeng’e nkome kwa nkangu ntangwa zawonso kuna makasi,+Ndiona wayadiding’e zula kuna nsita yo lubangamu lwangolo.+
7 Owau e nza yawonso ivundidi, ivuvamene.
O nkangu ukazidi ye kiese.+
8 Kana nkutu i nti mia sipelese miyangalele mu kuma kiaku,Kumosi ye nsedele mia Lebanone.
Mivovele vo: ‘Tuka wabwididi,Ke vena nzengi a nti ko wizidi kutuzenga.’
9 Kana nkutu i Ziami* kuna nsi mu zaka-zaka kinaMu wanana yaku vava okulumuka.
Mu kuma kiaku, e ziami kisikamesa awana bakondelo nkuma muna lufwa,Afidi awonso bena vo abangiki* ova nza.
Kitelamese atinu awonso a zula vana kunda yau ya kimfumu.
10 Yau awonso bamvovese vo:
‘Ongeye mpe otovokele nga i yeto e?
Okitukidi nga i yeto e?
11 O umvuania waku ukulumwinu muna Ziami,*Kumosi ye mazu ma nsambi zaku.+
E mimvidi miyalumukini kuna nsi aku nga mfulu,E ngambu* i vunga diaku.’
12 Ekwe mpila osangumukini tuka kuna zulu,Ongeye ntetembwa a nkezimi, mwan’a nkielelo!
Ekwe mpila ozengelo yo nungunua vana ntoto,Ongeye wasundanga e zula!+
13 Ongeye ovovele muna ntim’aku vo: ‘Tomboka itomboka kuna zulu.+
Izangika e kunda kiame kia kimfumu vana ntandu a ntetembwa za Nzambi,+Yo vuanda vana mongo a lukutakanu,Kuna nsuka-nsuka za node.+
14 Itomboka vana ntandu a matuti;Ikuyifwananesa yo Mpungu-nene.’
15 Kansi, okulumunua yamuna Ziami,*Yamuna sina dia wulu.
16 Awana bekumona bekutungununa;Bekufinama yo kutaluziola yo vova vo:
‘Nga ndioyu i muntu wanikwining’e nza,Ona wazakamesenge yitinu,+
17 Ona wakitula e nza nga makangaYo bangula e mbanza zandi,+Ona kayambulanga abakami andi ko bavutuka kuna nzo?’+
18 Atinu awonso a zula,Elo, yau awonso, balekele kuna nkembo,Konso muntu muna ziami kiandi.*
19 Vo i ngeye, olozelo kondwa kwa ziami,Nga ntombo angemi,*Ofukilu kwa mavimbu ma awana batompwelo muna nsosolo,Ana bekulumukanga muna wulu diazala yo matadi,Nga vimbu didiatakeso.
20 Ongeye kuzikwa kumosi ye atinu ko,Kadi ongeye ofwasidi e nsi aku,Ovondele o nkangu aku.
E nkumbu a mbongo a wantu ambi ke iyikwa diaka ko.
21 Nukubika e fulu kia vondela wan’andiMu kuma kia bi wa akulu au,Kimana balembi telama yo vua e nzaYo zadisa e nza ye mbanza zau.”
22 “Ikubatelamena,”+ u kavovele o Yave a vu.
“Ifukisa emvimba muna Babele e nkumbu andi, nsadiswa andi, mbongo andi ye ana belanda,”+ u kavovele o Yave.
23 “Ikitula yo se vua dia nsekele ye zunga kia mayanga, ikomba yo muna sesa kia lufwasu,”+ u kavovele o Yave a vu.
24 Yave a vu odidi e ndofi vo:
“Wauna ngindwidi i una divangamena,Wauna nkanini i una dilunganena.
25 Ikosomona Nsuri muna nsi ame,Ikundiatakesa muna miongo miame.+
E vangu kiandi kikatulwa muna nkangu ame,E zitu diandi dikatulwa vana mavembo mau.”+
26 Ezazi i nzengo zibakilu mu kuma kia* nza yawonso,Okwaku i koko kulambukidi mu kuma kia* zula yawonso.
27 Kadi Yave a vu obakidi e nzengo,Nani olenda zo fungisa?+
O koko kwandi kulambukidi,Nani olenda ko vutula?+
28 Muna mvu una o Ntinu Akazi kafwa,+ Nzambi watwika e nsangu ezi:
29 “E Felesetia, ke mosi ko omu ngeye ofwete yangalala,Wau vo e mvual’a ndiona wanuwandanga itolwelo.
Kadi muna mwanzi a nioka+ muvaika niok’a mânga ampondi,+E mbongo andi ikala se niok’ampondi itilumukanga.*
30 Ekolo wan’antete a akondami bediaYe asukami belekela mu luvuvamu,Ivondela o mwanzi aku muna nzala,Ina isala omu ngeye vondwa ivondwa.+
31 Dila, e vitu! Kaza, e mbanza!
Kendalala nukendalala yeno awonso, e Felesetia!
Kadi o mwisi utuka kuna node,Ke kesa dimosi ko divengomokene muna nlongaandi.”
32 Adieyi bevutula kwa anati a nsangu a zula?
Bekubavutula vo Yave okubidi e nkubilw’a Zione,+I mûna mutinina awana bakondwa nsadisi muna nkangu andi.
Mvovo vana yand'a lukaya
^ Yovo “Okubavundisa.”
^ I sia vo, mivutula Aneyisaele.
^ Yovo “yo sakidika afidi au a salu.”
^ Yovo “o mfidi a salu.”
^ Yovo “Seol,” i sia vo, ziami kia wantu awonso. Tala Nsas’a Mvovo.
^ Mvovo wa sina: “E nkombo zawonso za makoko.”
^ Yovo “Seol,” i sia vo, ziami kia wantu awonso. Tala Nsas’a Mvovo.
^ Yovo “nsalu.”
^ Yovo “Seol,” i sia vo, ziami kia wantu awonso. Tala Nsas’a Mvovo.
^ Mvovo wa sina: “muna nzo andi.”
^ Yovo “tayi kiangemi.”
^ Mvovo wa sina: “Ediadi i longi diveno kwa.”
^ Yovo “kukubamene mu wanda.”
^ Yovo “niok’a tiya itilumukanga.”
