Yezekele 10:1-22
10 Ekolo ntadidinge, mbwene lekwa kiayalumuka nze tadi dia safire vana ntandu a akelubi, e lekwa kiayalumuka kikedi vana ntandu a ntu miau, kikedi nze kunda kia kimfumu.+
2 I bosi, ovovese o muntu ovuete mvuatu a lino vo:+ “Kota vana kati-kati kwa tungungu,+ kuna nsi a akelubi, zadisa o moko maku ye makala ma tiya+ metuka vana kati-kati kwa akelubi, mwanga mo muna mbanza.”+ Ekolo ntadidinge o muntu okotele.
3 O muntu vava kakotele, akelubi batelamene kuna ndambu alunene lwa nzo, e tuti difukidi e yanzala kiakati.
4 O nkembo a Yave+ utombokele vana vena akelubi, wele kuna sumbuka* kia mwelo a nzo, malembe-malembe e nzo izele ye tuti.+ E yanzala kizele yo nkezimu a nkembo a Yave.
5 Mazu ma mave ma akelubi mawakane kuna yanzala kiambazi nze nding’a Nzambi a Mpungu-ngolo vava kevovanga.+
6 I bosi, okanikini o muntu ovuete mvuatu a lino vo: “Bonga tiya vana kati-kati kwa tungungu, vana vena akelubi.” O muntu okotele yo telama vana ndambu a lungungu.
7 Mosi muna akelubi olambwidi koko kwandi vana tiya tuna vana vena akelubi.+ Obongele fitiya yo sia fio vana moko ma ndiona ovuete mvuatu a lino.+ Oyandi otambwidi fio, ovaikidi.
8 Kuna nsi a mave ma akelubi kukedi lekwa ina nze moko ma muntu.+
9 Ekolo ntadidinge, mbwene tungungu yá vana ndambu a akelubi, lungungu lumosi vana ndambu a konso nkelubi, o tungungu twakezimanga nze tadi dia kerusolito.+
10 Vo i mpw’a tungungu twau yá yafwanana, vika sia vo lungungu lumosi luna muna kati kwa lungungu lwankaka.
11 Vava tungungu tukwendanga, tukwendanga kuna konso ndambu muna ndambu zau yá lembi viluka, kadi tukwendanga kuna kutadidi e ntu mia akelubi lembi viluka.
12 E nitu zau zawonso, nima zau, moko mau, mave mau ye tungungu twau yá, tuzele yo meso muna ndambu zawonso.+
13 Muna matu mame, ngwidi e ndinga ibokanga kwa tungungu vo: “Londoka!”
14 Konso vangwa* kikedi ye ndose yá. E ndose antete i ndose a nkelubi, e ndose azole i ndose a muntu, eyi yantatu i ndose a nkosi ye ina ya nyá i ndose a ngo-zulu.+
15 Akelubi batombokele—e vangwa yayi yamoyo yau yamona vana nkoko a Keba+—
16 vava akelubi bayendanga, o tungungu mpe twayendanga vana ndambu au; vava akelubi bazangulanga mave mau mu tomboka vana ntandu a ntoto, o tungungu ke twavilukanga ko ngatu katuka vana ndambu a akelubi.+
17 Vava baningamanga, tungungu mpe twaningamanga; vava batombokanga, o tungungu mpe twatombokanga kumosi yo yau, kadi o mwanda wafilanga e vangwa yamoyo* wakala mpe muna tungungu.
18 I bosi, o nkembo a Yave+ ukatukidi vana sumbuka* kia mwelo a nzo, utelamene vana ntandu a akelubi.+
19 Ekolo ntadidinge, akelubi bazangwidi mave mau, batombokele vana ntandu a ntoto. Vava bavaikidi, o tungungu mpe tukedi vana ndambu au. Akelubi baningamene vana nkotelo a vitu dia este dia nzo a Yave, o nkembo a Nzambi a Isaele ukedi vana ntandu au.+
20 E vangwa yayi yamoyo i yau yamona kuna nsi a kunda kia kimfumu kia Nzambi a Isaele vana nkoko a Keba,+ muna kuma kiaki yabakula vo i akelubi.
21 Yau awonso bakedi ye ndose yá, mave mayá, kuna nsi a mave mau kukedi lekwa ina nze moko ma muntu.+
22 E mpw’a ndose zau yakala nze ndose zina yamona vana nkoko a Keba.+ Konso vangwa kuntwala kaka kiayendanga.+
Mvovo vana yand'a lukaya
^ I sia vo, vana veviokelanga e kielo avo kiziwilu.
^ I sia vo, konso nkelubi.
^ Mvovo wa sina: “o mwand’a vangwa yamoyo.”
^ I sia vo, vana veviokelanga e kielo avo kiziwilu.
