Yezekele 12:1-28
12 E diambu dia Yave dizidi diaka kwa mono, oku vo:
2 “E mwan’a muntu, ongeye mu nzo ya akolami ozingilanga. Bena ye meso, kansi ke bemonanga ko, bena ye matu,+ kansi ke bewanga ko, kadi oyau nzo ya akolami.+
3 Vo i ngeye, e mwan’a muntu, kubika e funda kiaku wenda muna kinkole. Muna mwini ekolo betalanga, wenda muna kinkole. Wenda mu kinkole, tuka muna nzo aku yakuna fulu kiankaka ekolo oyau betalanga. Nanga besia e sungididi, kana una vo oyau nzo ya akolami.
4 Muna mwini ekolo betalanga, vaikisa e funda kiaku yo kwenda muna kinkole, i bosi, muna fuku ekolo betalanga, vaika nze muntu oneto mu kinkole.+
5 “Ekolo betalanga, tobola e vundu muna yaka yo vaikisila e lekwa yaku vana vundu.+
6 Ekolo betalanga, sia e lekwa yaku vana vembo yo vaikisa yo kuna mbazi muna fuku. Fuka o lose lwaku kimana walembi mona o ntoto, kadi ikitwidi se sinsu kwa nzo a Isaele.”+
7 Mpangidi wauna nkanikinu. Muna mwini, mpaikisi e funda kiame nze funda kia muntu okwenda mu kinkole. Muna nkokela, ntobwele vundu muna yaka muna moko. Muna fuku, mpaikisi e lekwa yame, ndete yo vana vembo vana meso mau.
8 Muna mene, e diambu dia Yave dizidi diaka kwa mono, oku vo:
9 “E mwan’a muntu, e nzo a Isaele, e nzo ya akolami, nga ke bayuvuidi ko vo: ‘Adieyi ovanganga e?’
10 Ubavovesa vo: ‘I wau wuwu kavovele o Mfumu Yave: “Ezazi i nsangu mu kuma kia mfumu+ wina muna Yerusaleme ye nzo yawonso ya Isaele ina muna mbanza.”’
11 “Vova vo: ‘Omono i sinsu kwa yeno.+ Dina mpangidi, i diau divangama kwa yau. Oyau bekwenda mu nsi a kinzenza, mu kinkole.+
12 O mfumu wina vana kati kwau onatina e lekwa yandi vana vembo yo vaika muna fuku. Otobola e vundu muna yaka yo vaikisila e lekwa yandi vana vundu.+ Ofuka o lose lwandi kimana kalembi mona o ntoto.’
13 Ikuntuba e konde diame, oyandi obakama muna konde diame diankonda.+ I bosi, ikunata kuna Babele, kuna nsi ya Akaladi, kansi ke mona yo ko; i kûna kefwila.+
14 Awonso banzungidi, i sia vo, asadisi andi ye makesa mandi, ikubamwanganesa muna ndambu zawonso;+ ivola o nsosolo muna kubalakama.+
15 Bezaya wo vo mono i Yave vava ikubatiakanesa muna zula yayingi yo kubamwanganesa mu nsi zayingi.
16 Kansi, ivuluza akaka muna yau muna nsosolo, mvengele ye vuku, kimana bazayisa mavangu mau mawonso mangemi kwa zula ina bekwenda; bezaya wo vo mono i Yave.”
17 E diambu dia Yave dizidi diaka kwa mono, oku vo:
18 “E mwan’a muntu, ofwete dila e mbolo aku muna zakamu yo nuina maza maku muna ntokani yo ntelamw’a moyo.+
19 Zayisa kwa nkangu a nsi vo: ‘I wau wuwu kavovele o Mfumu Yave kwa esi Yerusaleme bena muna nsi ya Isaele: “Bedila e mbolo au muna ntelamw’a moyo yo nuina o maza mau muna wonga, kadi e nsi au isala emvimba e nkatu+ mu kuma kia nsoki wa wantu awonso bezingilanga mo.+
20 E mbanza zizingilanga o wantu zisala e nkatu, e nsi ikituka se makanga;+ nuzaya wo vo mono i Yave.”’”+
21 E diambu dia Yave dizidi diaka kwa mono, oku vo:
22 “E mwan’a muntu, nkia kingana kiokio nutanga momo Isaele vo: ‘E lumbu iviokanga, kansi e mona-meso yawonso ke ilungananga ko’?+
23 Muna diadi, ubazayisa vo: ‘I wau wuwu kavovele o Mfumu Yave: “Sukisa isukisa e kingana kiokio, ke besadila kio diaka ko muna Isaele.”’ Kansi ubazayisa vo: ‘E lumbu ifinamene,+ e mona-meso yawonso ilungana.’
24 Kadi ke mukala diaka mona-meso kialuvunu ko ngatu mpandu za malengo* muna nzo a Isaele.+
25 ‘“Kadi omono Yave ivova. Konso dina ivova dilungana, ke dizingila diaka ko.+ Muna lumbu yeno,+ e nzo ya akolami, ivova e diambu yo lungisa dio,” u kavovele o Mfumu Yave.’”
26 E diambu dia Yave dizidi diaka kwa mono, oku vo:
27 “E mwan’a muntu, o nkangu* a Isaele uvovanga vo: ‘E mona-meso kamwene ke kilungana wau ko, dina kesakulanga dia kusentu.’+
28 Muna kuma kiaki: ‘Ubazayisa vo i wau wuwu kavovele o Mfumu Yave: “‘Ke umosi ko muna mvovo miame uzingila; konso dina mvova dilungana,’ u kavovele o Mfumu Yave.”’”
