Yezekele 13:1-23
13 E diambu dia Yave dizidi diaka kwa mono, oku vo:
2 “E mwan’a muntu, sakula mu kuma kia ngunza za Isaele,+ vovesa awana besokanga ungunza wau*+ vo: ‘Nuwá e diambu dia Yave.
3 I wau wuwu kavovele o Mfumu Yave: “Nkenda kwa mazowa ma ngunza, ana belandanga e ngindu za yau kibeni,* kana una vo ke bamwene diambu ko!+
4 E Isaele, e ngunza zaku zikitukidi nze mfwenge muna mazumbu.
5 Oyeno ke nukwenda ko muna fulu yawudika ina muna yaka ya matadi kimana nuatungulula yo mu kuma kia nzo a Isaele,+ kimana e Isaele yakala ngingi muna vita muna lumbu kia Yave.”+
6 “Bamwene mona-meso yaluvunu yo sakula luvunu, bevovanga vo: ‘Edi kavovele o Yave,’ kana una vo ke Yave ko ubatumini ye bevingilanga vo e diambu diau dialungana.+
7 Nga ke mona-meso kialuvunu ko kina numwene yo sakula luvunu vava nuvovanga vo: ‘Edi kavovele o Yave,’ kana una vo kivovele kwame diambu ko e?”’
8 “‘Ozevo, i wau wuwu kavovele o Mfumu Yave: “‘Wau vo luvunu nuvovele, e mona-meso yeno mpe yaluvunu, inusidi e kitantu,’ u kavovele o Mfumu Yave.”+
9 O koko kwame kutumba e ngunza zimonanga e mona-meso yaluvunu yo sakula o luvunu.+ Ke bekala vana kati kwa nkangu ko una ibundanga e vuvu; yovo sonekwa muna lusansu lwa nzo a Isaele; ngatu vutuka kuna nsi a Isaele; oyeno nuzaya wo vo mono i Mfumu Yave.+
10 Mawonso mama mevangama kadi bavukumwini o nkangu ame muna vova vo: “Luvuvamu luna vo!” kana una vo ke vena kwandi luvuvamu ko.+ O muntu avo otungidi e yaka kiakondwa e ngolo, oyau bakusidi kio e mpemba.’*+
11 “Vovesa awana bekusanga e mpemba muna yaka vo e yaka bwa kibwa. Mvul’angolo ikwiza, e mvul’a matadi inoka,* e tembwa yangolo ibwisa kio.+
12 Vava e yaka kibwa, o wantu bekunuyuvula vo: ‘Akweyi ina e mpemba nuakusa?’+
13 Ozevo, i wau wuwu kavovele o Mfumu Yave: ‘Muna nsita zame, itwasa yimbongela yangolo, muna makasi mame itwika mvul’angolo ye muna nsita zame zasaka itwasa mvul’a matadi.
14 Ibwisa e yaka kina nukusidi e mpemba; ibwisa kio vana ntoto, e nkubilwa andi isenzekwa. Vava e mbanza ibwa, oyeno muna kati kwa mbanza nufwila; nuzaya wo vo mono i Yave.’
15 “‘Vava ivaikisa o makasi mame mawonso muna yaka kiakina ye muna awana bakusa kio e mpemba, ikunuvovesa vo: “E yaka ke kina diaka ko, awana mpe bakusa kio e mpemba ke bena diaka ko.+
16 E ngunza za Isaele ke zina diaka ko, ana basakulanga mu kuma kia Yerusaleme, ana bamonanga e mona-meso yaluvuvamu mu kuma kia Yerusaleme, ekolo ke vakala luvuvamu ko,”’+ u kavovele o Mfumu Yave.
17 “Vo i ngeye, e mwan’a muntu, vilula e ndose aku muna wan’amakento a nkangu aku, ana besokanga ungunza wau, ongeye sakula mu kuma kiau.
18 Ubazayisa vo: ‘I wau wuvu kavovele o Mfumu Yave: “Nkenda kwa akento betunganga e tenda ya kanga mu moko* ma wantu awonso ye tambala ya mpila zawonso, kimana babaka e mioyo mia wantu awonso! Nga nubenze vo nulenda baka e mioyo mia nkangu ame yo vuluza e mioyo mieno?
19 Nga nukunsafula vana vena o nkangu ame mu kuma kia koko kwazala ye bale ye nkesona za mbolo,+ muna vonda awana ke bafwete fwa ko yo vukisa awana ke bafwene kala moyo ko, muna fila nkangu ame watamba o matu muna tuvunu tweno e?”’+
20 “Ozevo, i wau wuwu kavovele o Mfumu Yave: ‘E akento, diambu ivanga mu kuma kia tenda yeno ina nusadilanga mu baka o wantu nze nuni. Katula ikatula yo muna moko meno yo vuluza awana nukondanga nze nuni.
21 Vula ivula e tambala yeno yo kûla o nkangu ame vana moko meno. Ke bekala diaka se lekwa kia baka mu nkonda ko kwa yeno, nuzaya wo vo mono i Yave.+
22 Kadi nukendelekele o nkwa ntim’ansongi muna luvunu lweno,+ ekolo mono kibeni kinkendelekele* ko. Nukumikini o moko ma kimpumbulu,+ kalembi yambula e nzila zandi zambi, kakwamanana zinga.+
23 Muna kuma kiaki, yeno akento ke numona diaka mona-meso yaluvunu ko yo tá ngombo.+ I vuluza o nkangu ame vana moko meno, nuzaya wo vo mono i Yave.’”
Mvovo vana yand'a lukaya
^ Yovo “besakulanga mambu metukanga muna ntima miau.”
^ Mvovo wa sina: “belandanga mwand’au.”
^ I sia vo, muntu avo otungidi yaka kiakondwa e ngolo, oyau bekusanga kio e mpemba kiamoneka vo kiangolo.
^ Mvovo wa sina: “ongeye, e mvula matadi onoka.”
^ I sia vo, tenda yankisi yavuikwanga vana kongonia yovo muna koko.
^ Yovo “kimwesese mpasi.”
