Yezekele 17:1-24
17 E diambu dia Yave dizidi diaka kwa mono, oku vo:
2 “E mwan’a muntu, tá e ngwala ye kingana mu kuma kia nzo a Isaele.+
3 Vova vo: ‘I wau wuwu kavovele o Mfumu Yave: “O ngo-zulu anene,+ una yo mave manene ye nsala zandá, ozele ye nsala za se ya mpila mu mpila, wizidi oku Lebanone,+ odokwene nsongi a nti a nsedele.+
4 Odokwene ntombo ina vana nsongi, onete yo kuna nsi ya akiti,* okunini yo mu mbanz’akiti.+
5 Obongele ndambu a mbongo a nsi,+ okunini yo va ntoto ambote. Okunini yo nze nti a wilo vana ndambu a maza mayingi.
6 Imenene yo kituka se nsing’a vinyu wankufi ye wayalumuka,+ makaya mandi matadidi mu nsi, e mianzi miandi mimenene kuna nsi. Muna mpila yayi, ikitukidi se nsing’a vinyu, uvaikisi e ntombo ye tayi.+
7 “‘“Vezidi diaka ngo-zulu ankaka anene,+ ina yo mave manene ye nsala zandá.+ O nsing’a vinyu wowo uyalumwini e mianzi miandi kwa ngo-zulu mu nzaki, kuna mbazi a nkala mina kakunua, uyalumwini o makaya mandi kwa ngo-zulu kimana kayitidila mo maza.+
8 Va ntoto ambote wateka kunua vana ndambu a maza mayingi, kimana wavaikisa e tayi ye bundu yo kituka se nsing’a vinyu anene.”’+
9 “Vova vo: ‘I wau wuwu kavovele o Mfumu Yave: “Nga usikila e? Nga ke bevuza mianzi miandi ko+ yo wolesa e bundu yandi yo lengelesa e ntombo zandi e?+ E mpila uyumina, ke divava koko kwa ngolo ko ngatu wantu ayingi bavuza wo muna mianzi.
10 Kana nkutu vo uvuzilu yo kunua va fulu kiankaka, nga usikila e? Nga ke uyuma mvimba ko vava e tembwa kia este kivevomokena wo e? Uyumina muna nkala una umenene.”’”
11 E diambu dia Yave dizidi diaka kwa mono, oku vo:
12 “Dodokolo, zayisa e nzo yakolami vo: ‘Nga ke nubakwidi nsas’a mambu mama ko e?’ Vova vo: ‘Nutala! O ntinu a Babele wele kuna Yerusaleme, obakidi ntinu a Yerusaleme ye akuluntu, wizidi yau muna Babele.+
13 Vana ntandu, obongele mosi muna mbongo a kintinu+ yo kanga yandi e kangu, undisisi e ndofi.+ I bosi, onete akwa tunda a nsi,+
14 mpasi vo e kintinu kiakululwa, kialembi kuyitelamesa, kimana kiakwamanana sikila, avo kilunda e kangu diandi.+
15 Kuna kwalanda, o ntinu* otelamene ntinu a Babele*+ muna twika anati a nsangu kuna Engipito mu lomba e mvalu+ ye vu kianene kia makesa.+ Nga onunga e? Ndiona ovanganga mambu mama, nga ovenga e tumbu e? Nga olenda kulula e kangu yo vuluka e?’+
16 “‘“E nkal’ame kaka,” u kavovele o Mfumu Yave, “oyandi* mu Babele kefwila, vana fulu kezingilanga o ntinu* ona wantumbika se ntinu, ona kadila e ndofi ina kavezele ye kakanga yandi e kangu dina kakulwidi.+
17 E vu kianene ye ulolo wa makesa ma Faro ke mekunsadisa ko muna vita,+ vava makesa ma Babele bebumbika e kundubulu yo tunga yaka mu zunga e mbanza muna fwasa mioyo miayingi.
18 Oyandi ovezele ndofi yo kulula e kangu. Kana una vo nsilu kasia,* ovangidi mambu mama mawonso. Muna kuma kiaki, ke vuluka ko.”’
19 “‘Ozevo, i wau wuwu kavovele o Mfumu Yave: “E nkal’ame kaka, itwasa vana ntu andi e mfwilu mia veza e ndofi ame+ yo kulula e kangu diame.
20 Ikuntuba e konde diame, oyandi obakama muna konde diame diankonda.+ I bosi, ikuntwasa oku Babele, i kwaku ifundanena yandi mu kuma kia kondwa kwikizi kansongele.+
21 O makesa mandi mawonso ana betaya, mu nsosolo befwila; ana besala, muna ndambu zawonso*+ bemwanganeswa. Ozevo, nuzaya wo vo mono Yave mvovele wo.”’+
22 “‘I wau wuwu kavovele o Mfumu Yave: “Idokona e ntombo vana nsongi a nti a nsedele+ yo kuna yo, idokona e ntombo ampa vana nsongi za tayi yandi,+ mono kibeni ikuna yo va mongo wandá kikilu.+
23 Va mongo andá a Isaele ikuna yo; e tayi yandi ikola, iyima e bundu yo kituka se nsedele anene. E nuni za mpila zawonso zikala kuna nsi andi yo zingila vana viozi kia makaya mandi.
24 E nti miawonso mia nzanza mizaya wo vo mono Yave nkulwidi o nti andá yo zangula o nti ankufi;+ ngiumisi o nti ankunzu yo vaikisa e mvuma muna nti ayuma.+ Mono kibeni Yave mpovele yo vanga wo.”’”
Mvovo vana yand'a lukaya
^ Mvovo wa sina: “nsi ya Kenani.”
^ I sia vo, Nebukandesa.
^ I sia vo, Sedekiya.
^ I sia vo, Sedekiya.
^ I sia vo, Nebukandesa.
^ Mvovo wa sina: “ovene o koko kwandi.”
^ Mvovo wa sina: “muna tembwa kiawonso.”
