Yezekele 19:1-14
-
Mbembo mu kuma kia mfumu za Isaele (1-14)
19 “Bonga e mbembo* mu kuma kia mfumu za Isaele,
2 yimbila vo:
‘O ngudi aku nani kakala e?Nkosi ankento vana vena nkosi zamakoko.
Obubamene vana vena wan’a nkosi ankuma,* osansidi nsedia miandi.
3 Osansidi mosi muna nsedia miandi, okitukidi se mwan’a nkosi ankuma.+
Olongokele tiazuna e bulu,Yo dia nkutu o wantu.
4 E zula iwidi e nsangu mu kuma kiandi, bambakidi muna wulu diau,Banete kuna Engipito muna tuvaku.+
5 O ngudi ovingidi e mvutuk’a mwan’andi, kansi e vuvu kidimbukidi.
Muna kuma kiaki, obongele mwan’ankaka muna nsedia miandi, unkitwidi se mwan’a nkosi ankuma.
6 Oyandi mpe okangalele vana vena e nkosi zamakoko yo kituka se mwan’a nkosi ankuma.
Olongokele tiazuna e bulu yo dia nkutu o wantu.+
7 Ozietel’e nzo zau zandá zangolo yo fwasa e mbanza zau,Muna kuma kiaki, e zú diandi diwakane muna nsi yawonso yasala e nkatu.+
8 E zula ya mvivu mina muna ndambu, izidi mu tuba makonde mau muna yandi,Obakamene muna wulu diau.
9 Bamvakikidi o tuvaku yo kunsia muna mpaka, banete kwa ntinu a Babele.
Okwakuna, bansidi mu pelezo kimana e zú diandi dialembi wakana diaka muna miongo mia Isaele.
10 O ngudi aku wakala nze nsing’a vinyu+ muna menga maku,* wakunua vana mbel’a maza mayingi.
Wayima e bundu ye wazala ye tayi mu kuma kia ulolo wa maza.
11 Uvaikisi e tayi yangolo, yafwana mu vangila mvuala za* ayadi.
Ukudidi, uviokele nti miankaka muna lá,Umonekene tuka kuna kwandá mu kuma kia lá wandi ye mu kuma kia ulolo wa makaya mandi.
12 Kansi uvuzilu kuna makasi+ yo bwiswa vana ntoto,E tembwa kia este kiyumisi e bundu yandi.
E tayi yandi yangolo itolokele yo yuma,+ o tiya tubomwene yo.+
13 Owau, ukuninu muna makanga,Mu ntoto wakondwa o maza, wayuma.+
14 O tiya tuyandangiane muna tayi yandi,* tubomwene ntombo zandi ye bundu yandi,Ke vasuvidi kana tayi kimosi ko kiangolo, kana mvual’a yadila.+
“‘Eyayi mbembo, ikala kaka se mbembo.’”
Mvovo vana yand'a lukaya
^ Yovo “nkung’a mafwa.”
^ Yovo “wan’a nkosi a mika miayingi muna nsingu.”
^ Nanga, “muna mpatu aku a vinyu.”
^ Yovo “nkau mia.”
^ Yovo “nkau miandi.”
