Yezekele 20:1-49
20 Muna mvu wansambwadi,* muna ngonde yatanu, muna lumbu kiakumi kia ngonde, akaka muna akuluntu a Isaele bezidi yuvula Yave, bafongele ova ntadisi ame.
2 I bosi, e diambu dia Yave dizidi kwa mono, oku vo:
3 “E mwan’a muntu, vovana ye akuluntu a Isaele, ubazayisa vo: ‘I wau wuwu kavovele o Mfumu Yave: “Nga mono nuizidi yuvula e? ‘E nkal’ame kaka, kikunuvana mvutu ko,’+ u kavovele o Mfumu Yave.”’
4 “Nga wakubama wina mu kubafundisa e? E mwan’a muntu, nga wakubama wina mu kubafundisa e? Ubazayisa o mambu mangemi bavanga akulu au.+
5 Ubavovesa vo: ‘I wau wuwu kavovele o Mfumu Yave: “Muna lumbu kina yasola Isaele,+ yadia mpe ndofi* kwa mbongo a nzo a Yakobo, yayisengomona kwa yau muna nsi ya Engipito.+ Elo, yadia e ndofi kwa yau vo: ‘Mono i Yave wa Nzambi eno.’
6 Muna lumbu kiakina, yadia e ndofi vo ikubavaikisa muna nsi ya Engipito yo kubanata muna nsi ina yabasolela,* e nsi ifwamfumukanga kimvumina yo wiki.+ I nsi yasunda o wete* vana vena e nsi zawonso.
7 I bosi yabavovesa vo: ‘Konso muntu mu yeno kafwete loza e lekwa yangemi ina ova ntadisi andi; ke nuyisafula ko muna teke yangemi* ya Engipito.+ Mono i Yave wa Nzambi eno.’+
8 “‘“Kansi oyau bankolamena, ke bazolele kungwila ko. Ke balozele lekwa yangemi ko ikedi ova ntadisi au, ke babembwele teke yangemi ya Engipito ko.+ Muna kuma kiaki, yasia nsilu wa yitila nsita zame muna yau yo vaikisa makasi mame mawonso muna yau muna nsi ya Engipito.
9 Kansi mpangidi diambu mu kuma kia nkumbu ame, kimana yalembi funzulwa muna zula ina bazingilanga.+ Kadi yakisunzula kwa yau* vana ntadisi a zula yayi vava yabavaikisa* muna nsi ya Engipito.+
10 Ozevo, yabavaikisa muna nsi ya Engipito yo kubanata muna makanga.+
11 “‘“I bosi, ibavene nsiku miame yo kubazayisa e nzengo zame za mfundisa,+ kimana ndiona olanda zo, i mûna kevuila o moyo.+
12 Ibavene mpe lumbu yame ya vundu+ se sinsu vana vena mono yo yau,+ kimana bazaya vo mono Yave, mono ikubavaulanga.
13 “‘“Kansi, e nzo a Isaele yankolamena muna makanga.+ Ke badiatila muna nsiku miame ko, babembola e nzengo zame za mfundisa, ezi zina vo, avo muntu olende zo, i mûna kevuila o moyo. Bafunzula kikilu e lumbu yame ya vundu. Muna kuma kiaki, yasia nsilu wa yitila nsita zame muna yau muna makanga yabafukisa.+
14 Mpangidi diambu mu kuma kia nkumbu ame, kimana yalembi funzulwa vana vena e zula, vana ntadisi a zula muna yabavaikisa.*+
15 Yabadila mpe ndofi muna makanga vo kikubakotesa ko muna nsi ina yabavana+—e nsi ifwamfumukanga kimvumina yo wiki,+ e nsi isundidi o wete* vana vena e nsi zawonso—
16 wau vo babembola e nzengo zame za mfundisa, ke badiatila muna nsiku miame ko, bafunzula e lumbu yame ya vundu, kadi e ntima miau mialandanga e teke yau yangemi.+
17 “‘“Kansi yabafwila* e nkenda, kiabafwasa ko; kiabafukisa ko muna makanga.
18 Yavovesa o wan’au muna makanga vo:+ ‘Ke nudiatila muna mîna mia akulu eno ko,+ ke nulandi mfundisa zau ko ngatu kuyisafula muna teke yau yangemi.
19 Mono i Yave wa Nzambi eno. Nudiatila muna nsiku miame, nulunda e nzengo zame za mfundisa, nulemvokela zo.+
20 Nuvaula e lumbu yame ya vundu,+ ikala se sinsu vana vena mono yo yeno, kimana nuazaya wo vo mono i Yave wa Nzambi eno.’+
21 “‘“Kansi, o wana bayantika kunkolamena.+ Ke badiatila muna nsiku miame ko, ke balunda ko ngatu lemvokela e nzengo zame za mfundisa, ezi zina vo, avo muntu olende zo, i mûna kevuila o moyo. Bafunzwidi e lumbu yame ya vundu. Muna kuma kiaki, yasia o nsilu wa yitila e nsita zame muna yau yo vaikisa o makasi mame muna yau muna makanga.+
22 Kansi, yakanga o ntima+ yo vanga diambu mu kuma kia nkumbu ame,+ kimana yalembi funzulwa vana vena e zula, vana meso ma zula muna yabavaikisa.*
23 Vana ntandu, yabadila e ndofi muna makanga vo ikubatiakanesa muna zula yo kubamwanganesa mu nsi zayingi,+
24 wau vo ke balemvokela nzengo zame za mfundisa ko, babembola nsiku miame,+ bafunzula e lumbu yame ya vundu, balanda* teke yangemi ya akulu au.+
25 Ibayambwidi mpe vo balanda e mîna ke miambote ko ye nzengo za mfundisa zina ke zadi kubavana moyo ko.+
26 Ngiambwidi vo basafuka muna yimenga yau—vava beyokanga o wan’antete* awonso vana tiya+—kimana yabasisa moko mankatu, bazaya wo vo mono i Yave.”’
27 “Muna kuma kiaki, e mwan’a muntu, vovesa e nzo a Isaele, ubazayisa vo: ‘I wau wuwu kavovele o Mfumu Yave: “I wau mpe akulu eno bantiangunuina, muna kumpanga o mambu ma kondwa kwikizi.
28 Ibatwese muna nsi yadila e ndofi vo ikubavana yo.+ Vava bamwene kundubulu yawonso yazanguka ye nti mia makaya mayingi,+ bayantiki tambika yimenga yau yo tukau twau tufungisanga makasi. I mûna batambikilanga e nsunga zambote za* yimenga yau yo yitila o tukau twau twa ndua.
29 Muna kuma kiaki ibayuvuidi vo: ‘Ayeyi i nsas’a bata diodio kuna nukwendanga e? (Diyikilwanga vo Bata yamu unu kiaki.)’”’+
30 “Owau vovesa e nzo a Isaele vo: ‘I wau wuwu kavovele o Mfumu Yave: “Nga mukuyisafula nuina wauna akulu eno bavanga, muna landa e teke yau yangemi yo tá yau e zumba kia mwanda e?+
31 Nga nuakinu kuyisafula yamu unu kiaki muna tambika yimenga kwa teke yeno yawonso yangemi, muna yoka* o wan’eno vana tiya e?+ Owau, e nzo a Isaele, nga mfwete yambula vo nuangiuvula e?”’+
“‘E nkal’ame kaka,’ u kavovele o Mfumu Yave, ‘Kikunuvana mvutu ko.+
32 Ke disinga vangama ko dina nuyindulanga vava nuvovanga vo: “Yambula twakituka nze esi zula, nze nkangu mia nsi zankaka, ana besambilanga* e nti ye matadi.”’”+
33 “‘E nkal’ame kaka,’ u kavovele o Mfumu Yave, ‘Iyala se ntinu eno yo koko kwankuma, yo koko kwalambuka yo yitila e nsita zame.+
34 Ikunuvaikisa vana vena e nkangu yo kunukutakesa muna nsi zina numwanganeso yo koko kwankuma yo koko kwalambuka yo yitila e nsita zame.+
35 Ikununata muna makanga ma nkangu, i mûna ifundanena yeno mantalani.+
36 “‘Wauna yafundanena yo mase meno muna makanga ma nsi ya Engipito, i una ifundanena yeno,’ u kavovele o Mfumu Yave.
37 ‘Ikunuviokesela kuna nsi a nkau a mvungudi+ yo kunufila nualungisa e* kangu.
38 Kansi, ikatula ova kati kwaku atelameni ye awana bekunkolamenanga.+ Kadi ikubavaikisa muna nsi bezingilanga se nzenza, kansi ke bekota ko muna nsi a Isaele;+ oyeno nuzaya wo vo mono i Yave.’
39 “Vo i yeno, e nzo a Isaele, i wau wuwu kavovele o Mfumu Yave: ‘Konso muntu mu yeno kenda, kasambila e teke yandi yangemi.+ Kansi kuna kulanda, avo ke nukungwila ko, ke nufunzula diaka nkumbu ame avauka ko muna yimenga ye teke yeno yangemi.’+
40 “‘Kadi muna mongo ame avauka, vana mongo wandá wa Isaele,’+ u kavovele o Mfumu Yave, ‘i vana e nzo yawonso ya Isaele, yau awonso, bekunsadila muna nsi.+ Ivana ikubayangalela, lomba ilomba o tukau tweno ye ntomoni za tukau tweno, e lekwa yeno yawonso yavauka.+
41 Mu kuma kia nsunga zambote,* ikunuyangalela vava ikunuvaikisa vana kati kwa nkangu yo kunukutakesa tuka muna nsi zina nuamwanganeswa;+ ivaulwa vana kati kweno vana meso ma zula.’+
42 “‘Nuzaya wo vo mono i Yave+ vava ikununata kuna nsi a Isaele,+ e nsi yadila e ndofi vo ivana yo kwa akulu eno.
43 Okwakuna, nusungamena e fu yo mavangu meno mawonso mana nuyisafulwidi,+ nkele nukuyimwena* mu kuma kia mambu mawonso mambi nuvangidi.+
44 Ozevo nuzaya wo vo mono i Yave, vava ikunuvanga mambu mama mu kuma kia nkumbu ame,+ ke mun’owu wa fu yeno yambi ko yovo mun’owu wa mavangu meno mambi, e nzo a Isaele,’ u kavovele o Mfumu Yave.”
45 E diambu dia Yave dizidi diaka kwa mono, oku vo:
46 “E mwan’a muntu, tala kuna zunga kia sude, samuna kwa sude; sakula kwa mfind’a zunga kia sude.
47 Zayisa kwa mfinda sude vo: ‘Wá e diambu dia Yave. I wau wuwu kavovele o Mfumu Yave: “Ikukwikila tiya,+ o tiya tubomona e nti miawonso miasavuka ye nti miawonso miayuma omu ngeye. O nlaku a tiya ke uzimwa ko,+ uyoka e ndose zawonso, tuka kuna sude yakuna node.
48 Wantu awonso* bemona vo mono Yave nkwikidi o tiya toto, ozevo ke tuzimwa ko.”’”+
49 Mpovele vo: “Ekwe Mfumu Yave! Edi bevovanga mu kuma kiame vo: ‘Nga ke ngwal’a* nkatu ko ketanga e?’”
Mvovo vana yand'a lukaya
^ I sia vo, mvu wansambwadi wa kinkole kia Yoyakine wa Ntinu, Yezekele ye Ayuda ankaka. (Tala Yezekele 1:2).
^ Mvovo wa sina: “yazangula koko kwame.”
^ Yovo “yabalangila.”
^ Yovo “vienga.”
^ O mvovo wa Kiyibere nanga ngwizani wina yo mvovo “doti,” usadilwanga se mvovo a luvezo.
^ I sia vo, Isaele.
^ I sia vo, Isaele.
^ I sia vo, Isaele.
^ Yovo “vienga.”
^ Mvovo wa sina: “e disu diame diabafwila.”
^ I sia vo, Isaele.
^ Mvovo wa sina: “o meso mau malende.”
^ Mvovo wa sina: “vava beviokesanga mwan’antete.”
^ Yovo “lulembeko lwa.” Mvovo wa sina: “luvuviku lwa.”
^ Mvovo wa sina: “viokesa.”
^ Yovo “besadilanga.”
^ Mvovo wa sina: “yo kunutwasa muna kangwa kia.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
^ Yovo “nukenonoka e ndose zeno.”
^ Mvovo wa sina: “Nitu zawonso.”
^ Yovo “kingana kia.”