Yezekele 22:1-31
22 E diambu dia Yave dizidi diaka kwa mono, oku vo:
2 “Vo i ngeye, e mwan’a muntu, nga wakubama mu samuna e mfundis’a* mbanza ibungulanga o menga+ yo kunzayisa mambu mandi mawonso mangemi?+
3 Vova vo: ‘I wau wuwu kavovele o Mfumu Yave: “E mbanza ibungulanga o menga+ mu kati kwandi, ina vo e ntangw’andi ifwene,+ mbanza ina ivanganga e teke yangemi* mu kuyifunzula,+
4 o menga obungwidi matwasidi o nkanu,+ e teke yaku yangemi isafwidi.+ Okufikidi e mbaninu a lumbu yaku, e mbaninu a mvu miaku ifwene. Kiaki i kuma ikukitulwila se kuma kia luvezo kwa zula, se kuma kia lusembo kwa nsi zawonso.+
5 E nsi zina lukufi ye nsi zina kwandá seva zikuseva,+ ongeye una ye nkumbu afunzuka, wazala ye mvuanga.
6 Tala! E mfumu zawonso za Isaele vovo wina besadilanga wisa kiau mu bungula o menga.+
7 Bevezanga mase ye ngudi zau ova kati kwaku.+ Bevunginikanga e nzenza, bebangikanga mwana wakondwa se* yo nkento wafwilwa yakala.”’”+
8 “‘Ongeye ovezele fulu yame yavauka yo safula e lumbu yame ya vundu.+
9 Omu ngeye muna ye akumbi bena ye kani dia bungula o menga.+ Omu ngeye, o wantu bedianga e yimenga vana miongo yo kuyivana muna mavangu ma usafu ova kati kwaku.+
10 Omu ngeye, o wantu befunzulanga e mfulu a* mase mau,+ bevukananga yo nkento afunzuka ekolo kena ku ngonde.+
11 Omu kati kwaku, o muntu ovanganga mambu mangemi yo nkento a mfinangani andi,+ wankaka ofunzunanga mwan’andi a nzitu muna mavangu ma usafu,+ wankaka ovukananga yo nsang’andi, o mwana ankento a se diandi.+
12 Omu ngeye, wantu betambulanga mbabu mu bungula menga.+ Ongeye odevesanga mu vua nluta+ yovo ndandu, oyiyanga e nzimbu za mfinangani zaku.+ Elo, umvilakene emvimba,’ u kavovele o Mfumu Yave.
13 “‘Tala! Nsikidi e makonzo kuna lukendalalu mu kuma kia nluta otambulanga muna luvunu ye mu kuma kia mavangu ma bungula o menga ova kati kwaku.
14 Nga okwamanana kala yo unkabu,* o moko maku mekala kaka makumama muna lumbu ina ita yaku o mbalu?+ Mono kibeni Yave mpovele, mono mpe ivanga wo.
15 Ikutiakanesa muna zula yo kumwanganesa mu nsi zayingi,+ ifokola e mfunzuka aku.+
16 Ofusulwiswa e nsoni vana meso ma zula yayingi, ongeye ozaya wo vo mono i Yave.’”+
17 E diambu dia Yave dizidi diaka kwa mono, oku vo:
18 “E mwan’a muntu, kuna kwa mono, e nzo a Isaele ikitukidi nze mvindu, ke ina diaka mfunu ko. Yau awonso bena se nsongo, lanta,* sengwa ye mbodi muna fûlu dia tiya. Bakitukidi se mvindu a palata.+
19 “Muna kuma kiaki, i wau wuwu kavovele o Mfumu Yave: ‘Wau vo yeno awonso nukitukidi nze mvindu, ke luna mfunu ko,+ ikunukutakesa muna kati kwa Yerusaleme.
20 Wauna ukutakeselwanga palata, nsongo, sengwa, mbodi ye lanta* muna fûlu dia tiya kimana yavemonuenua o tiya yo zelola yo, i una mpe ikunukutakesela muna makasi mame ye nsita zame, ikunuvemonuena yo kunuzelola.+
21 Ikunukutakesa yo kunuvemonuena o tiya twa nsita zame,+ oyeno nuzeloka muna kati kwa mbanza.+
22 Wauna uzelokelanga e palata muna fûlu dia tiya, i una nuzelokela muna kati kwa mbanza; nuzaya wo vo mono kibeni Yave inuyitididi e nsita zame.’”
23 E diambu dia Yave dizidi diaka kwa mono, oku vo:
24 “E mwan’a muntu, umvovesa vo: ‘Ongeye u nsi ke iveleleswa ko ngatu nokwa e mvula muna lumbu kia makasi.
25 Omu ngeye, e ngunza zaku zivuende mfulu+ nze nkosi ankwiti itiazunanga e bulu kabakidi.+ Bedianga wantu. Bakutumwini tusalu ye lekwa yantalu. Bakitwidi akento ayingi se akento ansona muna kati kwandi.
26 E nganga zaku zikulwidi o nsiku ame+ yo safula e fulu yame yavauka.+ Ke bevanganga nswaswani ko vana vena lekwa kiavauka ye mpasi lekwa,+ ke bezayisanga wantu ko e nswaswani vana vena eki kiafunzuka ye eki kiavelela,+ ke bezolanga lunda lumbu yame ya vundu ko, omono yasafuka vana kati kwau.
27 Akuluntu aku muna kati kwaku bena nze mevua metiazunanga e bulu; bebungulanga o menga yo vonda nkangu mu vua nluta kuna luvunu.+
28 Kansi e ngunza zaku zifukidi o mavangu mau mambi wauna ukusilwanga e mpemba muna yaka. Bemonanga mona-meso yaluvunu yo tá e ngombo zaluvunu,+ bevovanga vo: “I wau wuwu kavovele o Mfumu Yave,” kana una vo yandi kibeni o Yave kavovele kwandi diambu ko.
29 O nkangu a nsi uvunginikanga yo yiya,+ umwesanga akondami ye asukami e mpasi, uvunginikanga e nzenza yo lembi kunsonga unsongi.’
30 “‘Mpavidi muntu vana bena ona olenda tungulula e yaka kia matadi yovo telama vana vundu vana ntadisi ame muna wete dia nsi, kimana yalembi fwaswa,+ kansi kisolwele kana mosi ko.
31 Muna kuma kiaki, ikubayitidila o makasi mame yo kubafwasa muna tiya twa nsita zame. Itwasa e mfwilu mia nzila zau vana ntu miau,’ u kavovele o Mfumu Yave.”
Mvovo vana yand'a lukaya
^ Mvovo wa sina: “nga ofundisa, nga ofundisa.”
^ O mvovo wa Kiyibere nanga ngwizani wina yo mvovo “doti,” usadilwanga se mvovo a luvezo.
^ Yovo “mwan’a nsona.”
^ Mvovo wa sina: “wantu befukulanga e kimpene kia.”
^ Mvovo wa sina: “ntima.”
^ Yovo “foya.” I sia vo, sengwa kina nga mbodi.
^ Yovo “foya.” I sia vo, sengwa kina nga mbodi.
