Yezekele 23:1-49
23 E diambu dia Yave dizidi diaka kwa mono, oku vo:
2 “E mwan’a muntu, vakedi akento wole, wan’a ngudi mosi.+
3 Bakitukidi se akembi muna Engipito;+ bakivene muna zumba tuka muna kileke kiau. I kûna o mayene mau maniemeno, i kûna mpe tulu kia kimwenze kiau kisakaneno.
4 E nkumbu a ndiona wambuta Ola,* o nleke andi Oliba.* Bakitukidi se bame, bawutidi wan’amakala yo wan’amakento. Vo i nkumbu zau, o Ola i Samaria,+ o Oliba i Yerusaleme.
5 “O Ola oyantikidi tá e zumba+ ekolo kakedi wame. Okedi ye nsatu zasaka za makangu mandi,+ esi Asuri, bena vo i mfinangani zandi.+
6 Bavuete mvuatu mia bule, anguvulu ye alandi a anguvulu—yau awonso miote mia matoko, bekwendelanga vana mvalu.
7 Okwamanene tá e zumba yo wan’awonso a Asuri basundidi e kimote, uyifunzwidi+ muna teke yangemi* ya awana kemwenanga e nsatu zasaka za vukana.
8 E zumba katelenge kuna Engipito kayambwidi kio ko, kadi bavukane yandi muna kileke kiandi, basakanene tulu kia kimwenze kiandi yo kunyitidila e nsatu zau zasaka za vukana.*+
9 Ekiaki i kuma yinyekolwele vana moko ma makangu mandi, o wan’a Asuri,+ ana kemwenanga e nsatu zasaka za vukana.
10 Basenzekele kimpene kiandi+ yo kanga o wan’andi amakala yo wan’andi amakento,+ bamvondele muna nsosolo. Okitukidi se mbandu ambi kwa akento, bamfundisi yo kuntumba.
11 “Vava o nleke andi Oliba kamwene wo, e nsatu zandi za vukana ziwokele diaka, e vangu diandi dia zumba diviokele edi dia mpangi andi.+
12 Oyandi wakala ye nsatu zasaka za vukana ye mfinangani zandi, o wan’a Asuri,+ anguvulu ye alandi a anguvulu ana bavuete mvuatu miantalu, bekwendelanga vana mvalu—yau awonso miote mia matoko.
13 Vava kayifunzwidi, mbwene vo yau awole nzila mosi balende.+
14 Kansi, oyandi okwamanene nkutu tá e zumba mu mpila iviokele tezo. Omwene fwaniswa ya wan’amakala yabandulwa muna yaka, fwaniswa ya Akaladi yakuswa e mbwaki,
15 ivuete mponda muna luketo, ye mpu anlele zivevomokanga vana ntu miau, ina ye mpwa za makesa, yau awonso Babele besunzulanga, kuna nsi ya Akaladi bawutukila.
16 Vava kabamwene, vana vau omwene nsatu zasaka za vukana yau, ubatwikidi anati a nsangu kuna Kaladi.+
17 Muna kuma kiaki, o wana amakala a Babele bayizanga vukana yandi vana mfulu andi, bamfunzwidi muna nsatu zau zasaka za vukana.* Vava bamfunzwidi, oyandi* ubamwenene nkele, ubavavukidi.
18 “Vava kakwamanene tá e zumba kondwa nsoni yo senzeka e kimpene kiandi,+ imwenene nkele yo kumvavuka, wauna yamwena mpangi andi ankento e nkele yo kumvavuka.+
19 Owokese mavangu mandi ma zumba,+ muna sungamena e lumbu ya kileke kiandi vava katanga e zumba muna nsi ya Engipito.+
20 Okedi ye nsatu zasaka za vukana nze za makangu ma awana bena ye kiyakala nze kia buluku, awana bena ye kiyakala nze kia mvalu.
21 Ongeye omwene viangi kia mavangu mansoni ma kileke kiaku kuna Engipito,+ vava basakanenanga e tulu kiaku, e ntulu za+ kileke kiaku.
22 “Ozevo, e Oliba, i wau wuwu kavovele o Mfumu Yave: ‘Itelamesa makangu maku,+ ana omwenene nkele yo kubavavuka, ikubatwasa tuka muna fulu yawonso beza kunuanisa,+
23 o wan’a Babele+ ye Akaladi awonso,+ o wantu a Pekode,+ Soa ye Koa, kumosi yo wan’awonso a Asuri. Yau awonso miote mia matoko, anguvulu ye alandi anguvulu, makesa ma vita ye wantu basolwa,* yau awonso bekwendelanga vana mvalu.
24 Oyau bekunuanisa ye makalu mau ma vita mansisi yo tungungu yo ulolo wa makesa ma vita, ye ngubu zanene ye ngubu zakete* ye mpu za vita. Bekuzunga muna ndambu zawonso, omono ikubavana e wisa kia kumfundisa, oyau bekumfundisila konso una bazolele.+
25 Ikusonga makasi mame, oyau muna nsita zawonso bekuvangila o mambu. Bekuzenga o nzunu yo matu, awana besala o moyo vovo wina muna nsosolo befwila. Benata o wan’aku amakala yo wan’aku amakento, awana besala moyo vovo wina bebomonua muna tiya.+
26 Bekuvula e mvuatu miaku+ yo bonga e nsanga miaku miantoko.+
27 Sukisa isukisa o mavangu maku mansoni ye ma zumba,+ mana wayantikila kuna nsi ya Engipito.+ Ongeye oyambula kubasia o meso,* kusungamena diaka Engipito ko.’
28 “Kadi i wau wuwu kavovele o Mfumu Yave: ‘Ke kolo ko ikuyekola vana moko ma awana omenganga, awana omwenene nkele yo kubavavuka.+
29 Oyau bekuvangila mambu muna lumengo, benata yawonso ina wafuntukina+ yo senzeka kimpene kiaku. E nsoni za kimpene kiaku yo mavangu maku ma zumba yo mavangu maku mansoni ye kinkembi kiaku kisenzekwa.+
30 I mambu mama bekuvanga wau vo olend’e zula nze nkembi,*+ kadi uyifunzwidi muna teke yau yangemi.+
31 Olende nzila yau imosi yo mpangi aku,+ isia e mbungw’andi vana koko kwaku.’+
32 “I wau wuwu kavovele o Mfumu Yave:
‘Ongeye onua e mbungw’anene ye yakoba ya mpangi aku,+Okituka se kuma kia tusevo yo luvezo luna luzele muna mbungwa.+
33 Ongeye osundwa kwa* nkolwa yo lukendalalu,E mbungw’a zakamu yo lufwasu,
E mbungw’a mpangi aku Samaria.
34 Nua onua yo, ofokola yo,+ obukuta e belengenze yandi
Ozenga e ntulu zaku.
“Kadi mono kibeni mpovele wo,” u kavovele o Mfumu Yave.’
35 “Ozevo, i wau wuwu kavovele o Mfumu Yave: ‘Wau vo umpilakene ye umvezele emvimba,*+ ongeye obaka e mfwilu mia mavangu maku ma usafu yo mavangu maku ma zumba.’”
36 I bosi, Yave umpovese vo: “E mwan’a muntu, nga osamuna e mfundisa Ola yo Oliba+ yo kubasonga mavangu mau mangemi e?
37 Oyau batele zumba,*+ o moko mau mazele yo menga. Ke batele kaka zumba ye teke yau yangemi ko, kansi bayokele* mpe vana tiya o wana ana bangutila, babatambikidi se madia kwa teke yau.+
38 Ke diau kaka ko bamvangidi: Bafunzwidi e nzo ame avauka muna lumbu kiokio, basafwidi e lumbu yame ya vundu.
39 Muna lumbu kiokio, vava bavondele wan’au mu kubakela se kimenga kwa teke yau yangemi,+ bezidi muna nzo ame avauka bafunzula yo.+ I diau bavangidi muna nzo ame.
40 Batumini nkutu anati a nsangu babokela wan’amakala tuka kuna kwandá. Vava bayizanga,+ ongeye uyisukwidi, okusidi e lekwa ya viengesela o meso yo vuata nsanga miantoko.+
41 Ovuende vana kunda kiatoma viengeswa,+ o meza matoma kubikwa makedi vana ntwala,+ otensekele vo e ndumbu+ yo mazi mame.+
42 Tuka mwamuna, e zú dia ulolo wa wantu bena mu luvuvamu diwakanene, vana kati kwau vakedi nduvu za malavu zatwaswa tuka kuna makanga. Bavuikidi e nlunga muna moko ma wan’amakento ye kolowa za ntoko kuna ntu miau.
43 “I bosi, mpovele mu kuma kia ndiona oyovokele mu kuma kia ulolo wa zumba katele vo: ‘Owau okwamanana tá e zumba kiandi.’
44 Muna kuma kiaki, oyau bakwamanene kwenda kwa yandi, wauna o muntu kekwendelanga kwa nkembi.* I una bekwendelanga kwa Ola yo Oliba, akento akwa mavangu mansoni.
45 Kansi, akala akwa unsongi bekuntumba* wauna utumbilwanga muntu otele zumba+ yo muntu obungwidi o menga;+ kadi oyau minta zumba, o moko mau mazele yo menga.+
46 “Kadi i wau wuwu kavovele o Mfumu Yave: ‘E vu kia makesa kikubalwakila mu kubakitula se kuma kia mwena o wonga ye lekwa kia sanza.+
47 E vu kia makesa kikubatuba matadi+ yo kubavondela muna nsosolo. Oyau bevonda o wan’au amakala yo wan’au amakento,+ beyoka e nzo zau muna tiya.+
48 Ifokola mavangu mansoni muna nsi, akento awonso belongokela vo diambu, ke betanginina mavangu meno mansoni ko.+
49 Bekunutwasila e mfwilu mia mavangu meno mansoni ye masumu meno nuavola muna teke yeno yangemi; nuzaya wo vo mono i Mfumu Yave.’”+
Mvovo vana yand'a lukaya
^ Ina ye nsasa vo: “Muna Yandi i Mwina e Saba Kiame.”
^ Ina ye nsasa vo: “Saba Kiandi.”
^ O mvovo wa Kiyibere nanga ngwizani wina yo mvovo “doti,” usadilwanga se mvovo a luvezo.
^ Mvovo wa sina: “e zumba yau.”
^ Yovo “o moyo andi.”
^ Mvovo wa sina: “muna zumba yau.”
^ Mvovo wa sina: “babokelwa.”
^ E ngubu zakete zisadilwanga kwa akwa mfumba.
^ I sia vo, Esi Engipito.
^ Yovo “nkento a ndumba.”
^ Mvovo wa sina: “ofuluka ye.”
^ Mvovo wa sina: “Wau vo untubidi kuna nima aku.”
^ Mvovo wa sina: “baviokesele.”
^ I sia vo, zumba muna kimwanda.
^ Yovo “nkento a ndumba.”
^ I sia vo, Oliba.
