Yezekele 24:1-27
24 Muna mvu una wa vua,* muna ngonde ya kumi, muna lumbu kia kumi kia ngonde, e diambu dia Yave dizidi diaka kwa mono, oku vo:
2 “E mwan’a muntu, soneka e lumbu kiaki,* e lumbu kia unu. Kadi e kiaki i lumbu o ntinu a Babele kayantikidi nuanisa e Yerusaleme.+
3 Tela e nzo ya akolami e kingana,* vova mu kuma kiau vo:
“‘I wau wuwu kavovele o Mfumu Yave:
“Teleka e kinzu;* teleka e kinzu vana tiya, sia o maza muna kati kwandi.+
4 Sia mo tini ya mbizi,+ e tini yawonso yambote,E to kiakulu ye to kiakoko; zadisa kio ye visi isundidi o wete.
5 Bonga meme disundidi o wete muna kambi,+ bidika e nkuni kuna nsi a kinzu, muna ndambu zandi zawonso.
Yidisa e tini yo lamba e visi ina mo.”’
6 “Ozevo, i wau wuwu kavovele o Mfumu Yave:
‘Tâtu kwa mbanza ibungulanga o menga,+ e kinzu kina ye mbumbu, kina ke kikatwilu mbumbu ko!
Katula e tini yawonso muna kati, kimosi-kimosi,+ kusodi ko kina okatula.*
7 Kadi o menga mandi mena muna kati kwandi;+ oyitidi mo vana tadi dialelama.
Kayitidi mo va ntoto ko mafukilwa o ntoto.+
8 Muna kumwesa e nsita yo landa e kunda,Nsisidi o menga mandi vana tadi dialelamaKimana malembi fukilwa.’+
9 “Ozevo, i wau wuwu kavovele o Mfumu Yave:
‘Tâtu kwa mbanza ibungulanga o menga!+
Kutika ikutika e kunku kia nkuni.
10 Nukutika e nkuni yo lunga o tiya,Nutoma lamba e mbizi, nuyitila e supu, nuyambula e visi yazina.
11 Sia e kinzu kiankatu vana makala ma tiya kimana kiayandukaYavana e nsongo a kinzu iyanduka yo bwaka.
E mfunzuka andi izeloka muna kati,+ e mbumbu andi izina.
12 E diambu diadi tokanesa ditokanesanga yo yoyesa,Kadi o ulolo wa mbumbu ke ufokoka ko.+
Nutuba e kinzu vana tiya ye mbumbu andi!’
13 “‘Ofunzukidi mu kuma kia mavangu maku mansoni.+ Ntezele kuvelelesa, kansi ongeye kuvelele ko muna mfunzuk’aku. Kuvelela ko yavana e nsita zame muna ngeye zifokoka.+
14 Mono Yave mpovele wo. Ediadi vangama divangama. Kivutuka manima ko, kifwa nkenda ko ngatu kuyibanza.+ Bekufundisila mun’owu wa ngienda zaku yo mavangu maku,’ u kavovele o Mfumu Yave.”
15 E diambu dia Yave dizidi diaka kwa mono, oku vo:
16 “E mwan’a muntu, ke kolo ko ikukatula ndiona otoma zolanga muna mpemona imosi kaka.+ Kukendalala* ko; kudidi ko ngatu vaikisa mansanga.
17 Bumina muna nsi a ntima, kuvangi ko mana mevangamanga mu kuma kia mafwa.+ Vuata e mpu aku a nlele+ ye nsampatu zaku.+ Kufwete fuka nua* ko+ ngatu dia mbolo batwasidi kwa wantu ankaka.”*+
18 Muna mene mbokene yo nkangu, muna nkokela o nkento ame ofwidi. Vava o kuma kukiele, mpangidi wauna yakanikinua.
19 O wantu bangiuvulanga vo: “Nga kukutuzayisa ko mambu momo ovanganga kana nkia nsasa mena kwa yeto e?”
20 Ibavutwidi vo: “E diambu dia Yave diayizidi kwa mono, oku vo:
21 ‘Zayisa e nzo a Isaele vo: “I wau wuwu kavovele o Mfumu Yave: ‘Ke kolo ko isafula e nzo ame avauka,+ e tuku dia lulendo lweno lwasaka, e lekwa nuzolanga ye fulu kina nusianga o ntima.* O wan’eno amakala yo wan’eno amakento ana nusisidi kuna nima, mu nsosolo befwila.+
22 I bosi, oyeno nuvanga wauna mpangidi. Ke nufukila nua* ko ngatu dia mbolo banutwasidi kwa wantu ankaka.+
23 Nuvuata e mpu zeno za nlele ye nsampatu zeno. Ke nukendalala ko ngatu dila. Kansi, nuwola mu kuma kia bi weno,+ nutala muntu yo nkwandi yo buma.
24 O Yezekele okitukidi se sinsu kwa yeno.+ Wauna kavangidi, i una nuvanga. Vava e diambu diadi divangama, nuzaya wo vo mono i Mfumu Yave.’”’”
25 “Vo i ngeye, e mwan’a muntu, muna lumbu kina ikubakatula e nzo au angolo—e lekwa kiantoko kia luyangalalu lwau, e lekwa betoma zolanga, kina besianga o ntima*—kumosi yo wan’au amakala yo wan’au amakento,+
26 ongeye ozayiswa dio kwa ndiona otina.+
27 Muna lumbu kiakina, ongeye oziula o nu’aku, ovovana yo ndiona otinini, kukala diaka baba ko.+ Ongeye okala kwa yau se sinsu, oyau bezaya wo vo mono i Yave.”
Mvovo vana yand'a lukaya
^ I sia vo, mvu wa vua wa kinkole kia Yoyakine wa Ntinu, Yezekele ye Ayuda ankaka. (Tala Yezekele 1:2).
^ Mvovo wa sina: “e nkumbu a lumbu kiaki.”
^ Yovo “ngwala.”
^ Yovo “kinzu kianene.”
^ Mvovo wa sina: “kutela yo nkas’a mienze ko.”
^ Mvovo wa sina: “Kubundi tulu kiaku.”
^ Mvovo wa sina: “befo.”
^ Mvovo wa sina: “ngatu dia mbolo a wantu.”
^ Yovo “kina moyo eno ufwilanga e nkenda.”
^ Mvovo wa sina: “befo.”
^ Yovo “besianga o moyo.”
