Yezekele 25:1-17
25 E diambu dia Yave dizidi diaka kwa mono, oku vo:
2 “E mwan’a muntu, vilula e ndose aku kwa Aneyamone,+ sakula o mambu mambi mu kuma kiau.+
3 Vova kwa Aneyamone vo: ‘Nuwá e diambu dia Yave. I wau wuwu kavovele o Mfumu Yave: “Wau nuvovele kuna luvezo vo: ‘Difwanukini!’ mu kuma kia nzo ame avauka vava yafunzulwa, ye mu kuma kia nsi a Isaele vava yasala e nkatu, ye mu kuma kia nzo a Yuda vava bayenda muna kinkole,
4 ozevo, ikunuyekola kwa nkangu uzingilanga kuna Este se vua diau. Besikidisa e ndo zau* ova kati kweno yo simika e saba yau vovo nuina. Bedia e bundu yeno yo nua e kimvumina kia makambi meno.
5 Ikitula e Raba+ se madilu ma samo, e nsi ya Aneyamone se vundilu dia makambi; nuzaya wo vo mono i Yave.”’”
6 “Kadi i wau wuwu kavovele o Mfumu Yave: ‘Wau vo nusikidi e makonzo,+ nududidi e nsindu muna malu meno yo yangalela muna luvezo lwawonso e mpasi za Isaele,+
7 ikunulambulwila o koko kwame yanuyekola kwa zula se lekwa kia sanza. Ikunukatula vana vena e nkangu yo kunufwasa muna zinsi.+ Ikunufukisa, nuzaya wo vo mono i Yave.’
8 “I wau wuwu kavovele o Mfumu Yave: ‘Wau vo Moabe+ ye Seyire+ bavovele vo: “Tala! E nzo a Yuda yafwanana ye zula yankaka,”
9 isenzeka o luvati lwa* Moabe, kuna kukalanga e mbanza za mwingilu andi, o vienga kwa nsi, i sia vo, Bete-yesimote, Bale-mone ye Kireyataime.+
10 Ivana luvati lolo kumosi ye Aneyamone se vua kwa nkangu uzingilanga kuna Este,+ ozevo Aneyamone ke besungamenua diaka ko vana vena e zula.+
11 Itwasa tumbu kwa Moabe,+ oyau bezaya wo vo mono i Yave.’
12 “I wau wuwu kavovele o Mfumu Yave: ‘Edome olende nzo a Yuda e kunda, onete nkanu wau kabalende kunda;+
13 ozevo i wau wuwu kavovele o Mfumu Yave: “Lambula ilambulwila mpe Edome o koko kwame, ifwasa o wantu ye bulu ina mo, isisa yo e nkatu.+ Tuka kuna Temane yakuna Dedane, bebwila muna nsosolo.+
14 ‘Landa ilanda Edome e kunda muna moko ma nkangu ame Isaele.+ Oyau betwasa makasi mame ye nsita zame kwa Edome, kimana bamona una ilandilanga e kunda,’+ u kavovele o Mfumu Yave.”’
15 “I wau wuwu kavovele o Mfumu Yave: ‘Mu kuma kia kitantu kiau kilembi fokoka, Afelesetia ngindu zambi bena zau za landa e kunda yo twasa lufwasu.+
16 Muna kuma kiaki, i wau wuwu kavovele o Mfumu Yave: “Owau se ilambulwila Afelesetia o koko kwame,+ isukisa Akerete+ yo fwasa awana besala o moyo muna awana bezingilanga muna nlambu a mbu.+
17 Ikubaland’e kunda kiangolo muna tumbu yansita, oyau bezaya wo vo mono i Yave vava ikubaland’e kunda.”’”
