Yezekele 27:1-36
-
Mbembo mu kuma kia Turo, e nzaza idimuka (1-36)
27 E diambu dia Yave dizidi diaka kwa mono, oku vo:
2 “Vo i ngeye, e mwan’a muntu, bongela Turo e mbembo,*+
3 vovesa Turo vo:
‘Ongeye ozingilanga muna mavitu ma mbu,Ovanganga kinkita yo wantu a sanga yayingi,I wau wuwu kavovele o Mfumu Yave:
“E Turo, ongeye ovovele vo: ‘Yalunga muna vienga.’+
4 E zunga yaku ina vana kati kwa kalunga,Atungi aku bawokese o vienga kwaku.
5 Bavangidi mabaya maku mawonso muna nti a sipelese ya Seni,+Yo sadila nsedele a Lebanone muna kuvangila lunzi dia zitika o nlele a nzaza.
6 Bavadidi e nkafi zaku* muna nti mia terebinte za Basani,Yo vangila ntu aku muna nti a sipre, waviengeselwa muna meno ma nzamba matuka kuna sanga kia Kitimi.+
7 O nlele aku wavangilwa muna lino ya se yaswaswana yatuka kuna Engipito,O nlele a nzaza wa nsinga mia se kia bule ye mika mia se kia nduwa wakala, watuka kuna sanga kia Elisa.+
8 Esi Sidone ye esi Aruvadi+ yau bakala akwa nkafi zaku.*
E Turo, akwa ngangu aku muna salu kia nzaza, yau bakala nsau zaku.+
9 E mbuta za Ngebale+ ye akwa ngangu muna salu kia nzaza, yau bakala alondi a mbamvu zaku.+
E nzaza zawonso za mbu ye nsau zau kwa ngeye zayizanga mu vanga yaku e kinkita.
10 Wantu a Parasa, a Ludime ye a Puti,+ yau bakala muna vu kiaku se makesa ma vita.
Bamanikanga e ngubu ye mpu zau za vita omu ngeye yo wokesa o vienga kwaku.
11 Wantu a Aruvadi ana bakala muna vu kiaku kia makesa, yau batelamanga muna kinzieta kia yaka yaku yawonso,Akwa unkabu bakala muna mayingidilu maku.
Bamanikanga e ngubu zau za vindumuka muna kinzieta kia yaka yaku yawonso
Yo wokesa o vienga kwaku.
12 “‘“Tasisi+ wavanganga yaku e kinkita mu kuma kia ulolo wa kimvuama kiaku.+ Basobanesanga e palata, sengwa, lanta* ye mbodi muna lekwa yaku.+
13 Yavani, Tubali+ ye Meseke+ bavanga yaku e kinkita muna sobanesa e ntaudi+ ye lekwa yau ya nsongo muna lekwa yaku ya teka.
14 E nzo a Tongarema+ basobanesanga e mvalu, mvalu mia vita ye mula zau muna lekwa yaku.
15 O nkangu a Dedane+ bavanga yaku e kinkita; muna sanga yayingi, wakitula wantu se asadi aku; bavananga meno ma nzamba+ ye nti mia ebene se mpaku kwa ngeye.
16 Edome wavanga yaku e kinkita mu kuma kia ulolo wa lekwa yaku. Basobanesanga matadi ma tokwaze, mika mia se kia nduwa, nlele miatoma tungwa muna nsinga mia se yaswaswana, nlele miambote, makolado ye rubi zau muna lekwa yaku.
17 “‘“E Yuda ye nsi a Isaele bavanga yaku e kinkita, basobanesanga witi ya Miniti,+ lekwa yambote ya dia, wiki,+ mazi ye balasamu+ muna lekwa yaku.+
18 “‘“Damaseke+ wavanga yaku e kinkita mu kuma kia ulolo wa lekwa yaku ye kimvuama kiaku kiawonso, wasobanesanga e vinyu a Elebone ye lino ya Zakare.
19 Vedane ye Yavani ya Uzale basobanesanga e sengwa, kasia* ye kane* muna lekwa yaku.
20 O Dedane+ wavanga yaku e kinkita kia nlele mia vuandila vana ntandu a mvalu.
21 Wakitula esi Arabia ye mfumu zawonso za Keda+ se asadi aku, ana bavanganga kinkita kia wan’a mameme, mameme ma makoko ye nkombo.+
22 E minkiti mia Seba ye Rama+ bavanga yaku e kinkita; basobanesanga mazi masundidi e nsunga ma mpila zawonso, matadi mantalu ye wolo wau muna lekwa yaku.+
23 E Karani,+ Kane, Edene,+ minkiti mia Seba,+ Asure+ ye Kidimadi, bavanga yaku e kinkita.
24 Muna mazandu maku bavangilanga e kinkita kia mvuatu miambote, yunga yavangilwa muna nlele mia se kia bule, miatoma tungwa muna nsinga mia se yaswaswana ye tapi ya se yayingi, yawonso yatoma zingwa e ngonzi.
25 E nzaza za Tasisi+ i zau zatwasanga e lekwa yaku yateka,Ekiaki i kuma wazadila ye kimvuama yo toma zita* vana kati kwa kalunga.
26 Afidi aku a nzaza batwese vana kalunga kwanene;Ongeye ofwasilu kwa tembwa kia este vana kati kwa kalunga.
27 Kimvuama kiaku, lekwa yaku, kinkita kiaku, afidi aku a nzaza ye nsau zaku,Awana balondanga e mbamvu zaku, awana wavanganga yau e kinkita+ ye makesa mawonso ma vita+—Nkangu awonso* ova kati kwaku—
Yau awonso bedimuka vana kati kwa kalunga muna lumbu kia lufwasu lwaku.+
28 Vava e nsau zaku zikaza, awana bezingilanga muna nlambu a kalunga bezakama.
29 Awonso besimbanga e nkafi,* ansau ye afidi a nzaza
Bekulumuka muna nzaza zau yo telama vana kumu dia kalunga.
30 Bezangula e ndinga zau yo bokomoka ye dilu mu kuma kiaku+
Yo kuyifumfumwina e mbundukutu vana ntu yo kuyilengomona vana ntoto ampolo.
31 Bevala e ntu miau yo vuatae ngoto;
Bebokomoka ye dilu mu kuma kiaku ye ntantu zawonso.
32 Muna dilu kiau bekubongela e mbembo* yo yimbila vo:
‘Nani una nze Turo, ona obutamene vana kati kwa kalunga?+
33 Vava e lekwa yaku yayizanga tuka vana kati kwa kalunga, ongeye wayukutisanga wantu ayingi.+
O ulolo wa umvuama waku ye kinkita kiaku kiavuamisa e ntinu mia nza.+
34 Owau ofwasilu vana kati kwa kalunga, muna nsi a maza mayingi,+
E yinkita yaku yawonso yo nkangu aku badimukini yaku kumosi muna kalunga.+
35 Awonso bezingilanga muna sanga bekutala yo sivika,+
E ntinu miau bebakama kwa zaka-zaka+—e ndose zau zitokana.
36 E minkiti vana vena e nkangu besika mumpiozi mu kuma kia mana mabwididi.
E mbaninu aku kukinsalukisa ikwizila, yampasi ikala,
Kukala diaka ko yakwele mvu.’”’”+
Mvovo vana yand'a lukaya
^ Yovo “o nkung’a mafwa.”
^ Yovo “malemo maku.”
^ Yovo “malemo maku.”
^ Yovo “foya.” I sia vo, sengwa kina nga mbodi.
^ Tutu diansunga.
^ Nti wafwanana yo nti a kinamone.
^ Nanga, “yo kituka se wankembo.”
^ Mvovo wa sina: “Nkutakani yawonso.”
^ Yovo “malemo.”
^ Yovo “o nkung’a mafwa.”
