Yezekele 29:1-21
29 Muna mvu una wa kumi,* muna ngonde ya kumi, muna lumbu kia 12 kia ngonde, e diambu dia Yave dizidi kwa mono, oku vo:
2 “E mwana muntu, vilula e ndose aku kwa Faro wa ntinu a Engipito, sakula mu kuma kiandi ye mu kuma kia Engipito yawonso.+
3 Vova vo: ‘I wau wuwu kavovele o Mfumu Yave:
“Ngina yaku e kitantu, e Faro wa ntinu a Engipito,+E vangwa kiansisi kia mbu kilavalele muna nsuku mia Nile*+ andi,Ona ovovele vo: ‘E Nzadi a Nile yame.
Mono yavanga yo mu kuma kiame.’+
4 Kansi, isia tuvaku muna matokolo maku, ifila e mbizi za maza za Nile aku zalaminina muna mavavala maku.
Ikuvaikisa muna Nile aku kumosi ye mbizi zawonso za maza za Nile zina zilaminini muna mavavala maku.
5 Ikusisa muna makanga, ongeye kumosi ye mbizi zawonso za maza za Nile aku.
Muna nzanza obwila, ke vekala muntu ko okunona yo kuzika.+
Ikuvana se madia kwa bulu ya ntoto ye nuni za zulu.+
6 Awonso bekalanga muna Engipito bezaya wo vo mono i Yave,Kadi oyau ke belenda diaka sadisa nzo a Isaele ko, wau vo bakitukidi se tini kia nti ayuma.*+
7 Vava basimbidi vana koko, ongeye otolokele,E vembo diau dilwele.
Vava bayekamene omu ngeye, ongeye owudikidi,O malu mau* mazakamene.”+
8 “‘Ozevo, i wau wuwu kavovele o Mfumu Yave: “Se itwasa o nsosolo omu ngeye,+ fwasa ifwasa o wantu ye bulu omu ngeye.
9 E nsi ya Engipito ikituka se fulu kiasala e nkatu ye kiafwasuka;+ bezaya wo vo mono i Yave, kadi ongeye* ovovele vo: ‘E Nzadi a Nile yame; mono mosi yavanga yo.’+
10 Muna kuma kiaki, isidi e kitantu, nsidi mpe kitantu kwa Nile aku, ikitula e nsi ya Engipito se fulu kiafwasuka ye kiayuma, se nsi yasala e nkatu,+ tuka kuna Mingedole+ yakuna Siene,+ yakuna mwingilu a Etiopia.
11 Kana wantu yovo bulu ke beviokela mo ko,+ ke muzingila wantu ko mu mvu 40.
12 Ikitula e nsi ya Engipito se nsi isundidi o sala e nkatu, e mbanza zandi zikala se mbanza zisundidi o sala e nkatu mu mvu 40;+ imwanganesa esi Engipito muna zula yayingi yo kubatiakanesa mu nsi zayingi.”+
13 “‘Kadi i wau wuwu kavovele o Mfumu Yave: “Vava kivioka mvu 40, ikutakesa diaka esi Engipito muna nkangu mina bamwanganeswa;+
14 esi Engipito ana bayenda mu kinkole ikubavutulwisa kuna Paterose,+ muna nsi ina batuka. Okwakuna, bekituka se kintinu kiakondwa o mfunu.
15 Engipito isakalala vioka yintinu yankaka, ke iyala diaka zula yankaka ko,+ ikubakevesa kikilu kimana balembi yala diaka e zula yankaka.+
16 E nzo a Isaele ke ibunda diaka vuvu muna Engipito ko,+ kansi Engipito ikubasungamesa kaka o bi wau wa kwenda lomba lusadisu kwa yau. Oyau bezaya wo vo mono i Mfumu Yave.”’”
17 Muna mvu una wa 27,* muna ngonde yantete, muna lumbu kiantete kia ngonde, e diambu dia Yave dizidi kwa mono, oku vo:
18 “E mwana muntu, o Nebukandesa* wa Ntinu+ a Babele osadisi makesa mandi e salu kiangolo mu nuanisa e Turo.+ E ntu miawonso mimenen’e vandu, o mavembo mawonso matunukini. Kansi, oyandi yo makesa mandi ke batambwidi mfutu ko mu kuma kia salu kiangolo kasadidi kia nuanisa e Turo.
19 “Ozevo, i wau wuwu kavovele o Mfumu Yave: ‘Ivana e nsi ya Engipito kwa Nebukandesa* wa Ntinu a Babele,+ oyandi onata kimvuama kia Engipito, onata e sanzu ye ina kekutumuna; owau ukala se mfutu a makesa mandi.’
20 “‘Ikumvana e nsi ya Engipito se mfutu mu kuma kia salu kiandi kiangolo kasadidi mu nuanisa e Turo,+ wau vo mono basadidi,’ u kavovele o Mfumu Yave.
21 “Muna lumbu kiakina, ibundumuna nkw’a ngolo mu kuma kia* nzo a Isaele,+ ivana e lau kwa ngeye wavova vana kati kwau; oyau bezaya wo vo mono i Yave.”
Mvovo vana yand'a lukaya
^ I sia vo, mvu wa kumi wa kinkole kia Yoyakine wa Ntinu, Yezekele ye Ayuda ankaka. (Tala Yezekele 1:2).
^ Omu tini kiaki ye muna tini ilanda, o mvovo “Nile” nzadi a Nile ye nsuku miandi uyikanga.
^ Mvovo wa sina: “se tutu.”
^ Mvovo wa sina: “O tuketo twau.”
^ Mvovo wa sina: “oyandi.”
^ I sia vo, mvu wa 27 wa kinkole kia Yoyakine wa Ntinu, Yezekele ye Ayuda ankaka. (Tala Yezekele 1:2).
^ Mvovo wa sina: “Nebukadrezare,” mpila yankaka yasonekena yo.
^ Mvovo wa sina: “Nebukadrezare,” mpila yankaka yasonekena yo.
^ Yovo “ivana nkuma kwa.” Mvovo wa sina: “ivaikisa mpoka mu kuma kia.”
