Yezekele 3:1-27
3 I bosi, umpovese vo: “E mwan’a muntu, dia eki kina ova ntadisi aku.* Dia o nkanda wau, wenda, vovesa kwa nzo a Isaele.”+
2 Nziwidi o nua, oyandi undikidi o nkanda.
3 Umpovese diaka vo: “E mwan’a muntu, dia o nkanda wau ikuvananga, zadisa e vumu kiaku yo nkanda wau.” Muna kuma kiaki, ngiantikidi wo dia, ukedi wa nzenzo omu nu’ame nga wiki.+
4 Oyandi umpovese vo: “E mwan’a muntu, kota vana kati kwa nzo a Isaele, ubazayisa e mvovo miame.
5 Kadi kutuminu kwa nkangu ko uvovanga ndinga ina vo yampasi mu bakula yovo ndinga ke izayakene ko, kansi kwa nzo a Isaele otuminu.
6 Ongeye kutuminu kwa nkangu miayingi ko mivovanga e ndinga ina vo yampasi mu bakula yovo ndinga ke izayakene ko, ana bena vo e mvovo miau kulendi mio bakula ko. Kele vo yatuma kwa yau, oyau badi kuwá.+
7 Kansi, e nzo a Isaele ke bezola kuwila ko, kadi ke bazolele kungwila ko.+ Yau awonso muna nzo a Isaele akwa ntu miangolo ye ntima miabala.+
8 Tala, mbadisi e ndose aku nze ndose zau yo badisa e nkut’aku a lose nze nkuta zau za lose.+
9 Nkitwidi nkut’aku a lose nga diamanta, yabala kikilu nga tadi diangolo.+ Kubamoni wonga ko ngatu mona wonga wa ndose zau,+ kadi oyau i nzo ya akolami.”
10 Umpovese diaka vo: “E mwan’a muntu, winikina yo sia muna ntima o mambu mawonso ikuvovesanga.
11 Wenda vana vena o nkangu aku wina muna kinkole,+ vovana yau. Bawá yovo lembi wá,+ ubavovesa vo: ‘I wau wuwu kavovele o Mfumu Yave.’”
12 I bosi, o mwanda undete,+ ngwidi mazu mangolo kuna nim’ame ye ndinga ivovele vo: “Yambula o nkembo a Yave wakembelelwa tuka vana fulu kiandi.”
13 Ngwidi mpe mazu ma mave ma vangwa yamoyo matotakananga+ yo mazu ma tungungu tukedi vana ndambu au,+ ngwidi mpe mazu mangolo.
14 O mwanda undete yo kunkatula vavana, ngiele yakendalala yo ntima wakangama, o koko kwa Yave kukedi e ngolo omu mono.
15 Muna kuma kiaki, ngiele kwa nkangu wakala muna kinkole kuna Tele-abibe, una wazingilanga vana ndambu a nkoko a Keba.+ Nkedi vana bazingilanga; mfongele vana kati kwau lumbu nsambwadi, ntumbalele kaka.+
16 Kuna mfoko a lumbu nsambwadi, e diambu dia Yave dizidi kwa mono, oku vo:
17 “E mwan’a muntu, itumbikidi se nyingidi a nzo a Isaele;+ avo owidi e diambu ditukidi omu nu’ame, ofwete kubazayisa lulukisu lwame.+
18 Avo mpovese kimpumbulu vo: ‘Fwa ofwa,’ kansi ongeye kunlukisi ko, kuvovele ko muna lukisa kimpumbulu kayambula e nzil’andi yambi kimana kakala o moyo,+ oyandi ofwa mu kuma kia bi wandi wau vo oyandi kimpumbulu,+ kansi o menga mandi kwa ngeye ivavila mo.*+
19 Kansi ongeye, avo olukisi e kimpumbulu, oyandi kayambwidi bi wandi ko ye nzil’andi yambi, oyandi ofwa mu kuma kia bi wandi, vo i ngeye ovuluza o moyo aku.+
20 Kuna diaka e sambu, avo muntu ansongi oyambwidi unsongi wandi yo vanga diambu diambi, isia sakuba vana ntadisi andi, oyandi ofwa.+ Kansi avo kunlukisi ko, oyandi ofwa mu kuma kia sumu diandi, mavangu mandi mansongi ke mesungamenua ko, kansi o menga mandi kwa ngeye ivavila mo.*+
21 Kansi ongeye, avo olukisi muntu ansongi kalembi sumuka, ye kasumukini ko, oyandi okwamanana zinga wau vo olukisu,+ ongeye ovuluza o moyo aku.
22 Ikuna o koko kwa Yave kwayizila omu mono, umpovese vo: “Telama, wenda kuna nzanza, ikûna ivovanena yaku.”
23 Muna diadi ntelamene, ngiele kuna nzanza, mbwene ko o nkembo a Yave+ nze i nkembo una yamona vana ndambu a nkoko a Keba,+ mbwidi o mambukama.
24 I bosi, o mwanda ukotele omu mono, untelamese,+ oyandi umpovese vo:
“Wenda, uyizikidila muna nzo aku.
25 Kansi ongeye, e mwan’a muntu, oyau besia e nsinga omu ngeye yo kunkangila muna nsinga miomio kimana walembi vaika vana bena.
26 Nlamika lubini lwaku kuna ntandu a nu’aku, okituka se baba, kulenda kubasemba ko, kadi oyau nzo ya akolami.
27 Kansi, vava imokena yaku iziula o nu’aku, ofwete kubavovesa vo:+ ‘I wau wuwu kavovele o Mfumu Yave.’ Ndiona ozolele wá yambula kawá,+ ndiona kazolele wá ko yambula kalembi wá, kadi oyau nzo ya akolami.+
Mvovo vana yand'a lukaya
^ Mvovo wa sina: “dia kina osolwele.”
^ Yovo “kansi ngeye o tá e mbalu a menga mandi.”
^ Yovo “kansi ngeye o tá e mbalu a menga mandi.”
