Yezekele 30:1-26
30 E diambu dia Yave dizidi diaka kwa mono, oku vo:
2 “E mwan’a muntu, sakula, vova vo: ‘I wau wuwu kavovele o Mfumu Yave:
“Nukendalala yo vova vo: ‘Ekwe! E lumbu mu kwiza kina!’
3 Kadi e lumbu kifinamene, elo, e lumbu kia Yave kifinamene.+
Lumbu kia matuti matombe,+ e ntangwa yasikidiswa mu kuma kia zula.+
4 O nsosolo ulwakila Engipito, Etiopia ibakamwa kwa wonga vava mavimbu melavalala muna Engipito;Vava kimvuama kia Engipito kibongwa, e nkubilwa zandi zifwaswa.+
5 Etiopia,+ Puti,+ Ludi ye nkangu watuka muna zula yankaka,E Kubi kumosi yo wan’a nsi ana yakanga yau e kangu,*Yau awonso befwila muna nsosolo.”’
6 I wau wuwu kavovele o Yave:
‘Awana mpe beyikamanga e Engipito fwa befwa,O umvuania wa nkum’andi ukululwa.’+
“‘Tuka muna Mingedole+ yakuna Siene,+ befwila muna nsosolo muna nsi,’ u kavovele o Mfumu Yave.
7 ‘Zikituka se nsi zisundidi o sala e nkatu, e mbanza zau zikituka se mbanza zisundidi o fwasuka.+
8 Bezaya wo vo mono i Yave vava ikwika o tiya muna Engipito yo tufakesa awonso bekunyikamanga.
9 Muna lumbu kiakina, itwika anati a nsangu muna nzaza mu zakamesa Etiopia eyi ikuyibundanga e vuvu; bebakamwa kwa zaka-zaka muna lumbu kina kilwakila Engipito, kadi kwiza kikilu kikwiza.’
10 “I wau wuwu kavovele o Mfumu Yave: ‘Isadila Nebukandesa* wa Ntinu a Babele mu fokola o ulolo wa nkangu muna Engipito.+
11 Oyandi ye makesa mandi, e zula kisundidi o nsoki,+ betwaswa mu fwasa e nsi. Bevola e nsosolo miau mu fwasa Engipito yo zadisa e nsi yo mavimbu.+
12 Ikitula e nsuku mia Nile+ se ntoto ayuma yo yekola* e nsi vana moko ma wantu ambi. Isadila e nzenza mu sisa e nsi ye lekwa yawonso ina mo e nkatu.+ Mono kibeni Yave mpovele wo.’
13 “I wau wuwu kavovele o Mfumu Yave: ‘Ifwasa mpe teke yangemi* yo sukisa e fwafwala ya nzambi za Nofe.*+ Muna nsi a Engipito ke mutuka diaka mfumu ko, isia o wonga muna nsi ya Engipito.+
14 Isisa e Paterose+ e nkatu, ikwika tiya muna Soane yo tumba e No.*+
15 Iyitila e nsita zame muna Sini, e swekameno diangolo dia Engipito, ifwasa o nkangu a No.
16 Ikwika tiya muna Engipito; e Sini ibakama e zakamu, e No ibuka e mbamvu, e Nofe inuaniswa muna mwini!
17 O matoko ma One* ye Pi-besete befwila muna nsosolo, awana bezingilanga muna zimbanza bekwenda mu kinkole.
18 E lumbu kibukama e tombe muna Takepankese vava itololwela mo e vangu kia Engipito.+ O umvuania wa nkum’andi ufokoka,+ o matuti mekumfuka, o wantu a mbanza zandi bekwenda mu kinkole.+
19 Itumba e Engipito, bezaya wo vo mono i Yave.’”
20 Muna mvu una wa 11,* muna ngonde yantete, muna lumbu kia nsambwadi kia ngonde, e diambu dia Yave dizidi kwa mono, oku vo:
21 “E mwan’a muntu, ntolwele o koko kwa Faro wa ntinu a Engipito; ke kuwukwa ko kwalembi sasuka ngatu kangwa tenda kwakumama yo simba o nsosolo.”
22 “Ozevo, i wau wuwu kavovele o Mfumu Yave: ‘Nsidi Faro wa ntinu a Engipito e kitantu,+ tolola itolola o moko mandi, oku kwakumama ye oku kwatoloka,+ iyambula vo o nsosolo vana koko kwandi wabwa.+
23 I bosi, imwanganesa esi Engipito muna zula yayingi yo kubatiakanesa muna zinsi.+
24 Ikumika o moko ma ntinu a Babele+ yo sia o nsosolo ame vana koko kwandi,+ itolola o moko ma Faro, obuma ye ngolo zawonso vana meso mandi* nze muntu ofwa.
25 Ikumika o moko ma ntinu a Babele, vo i moko ma Faro mezebalala; bezaya wo vo mono i Yave vava isia o nsosolo ame vana moko ma ntinu a Babele kasadila wo mu fwasa e nsi ya Engipito.+
26 Imwanganesa esi Engipito muna zula yayingi yo kubatiakanesa muna zinsi,+ bezaya wo vo mono i Yave.’”
Mvovo vana yand'a lukaya
^ Nanga Aneyisaele ana bakanga e kangu ye Engipito beyikwanga ovava.
^ Mvovo wa sina: “Nebukadrezare,” mpila yankaka yasonekena yo.
^ Mvovo wa sina: “teka.”
^ Yovo “Memfise.”
^ O mvovo wa Kiyibere nanga ngwizani wina yo mvovo “doti,” usadilwanga se mvovo a luvezo.
^ I sia vo, Tebese.
^ I sia vo, Eliopolise.
^ I sia vo, mvu wa 11 wa kinkole kia Yoyakine wa Ntinu, Yezekele ye Ayuda ankaka. (Tala Yezekele 1:2).
^ I sia vo, vana ntadisi a ntinu a Babele.